Read Kurmanji Încîl Îşaya 17 Bible Online

Îşaya 17 - Kurmanji Încîl bible

Îşaya 17

¹Peyama li ser Şamê: Va ye wê Şam ji holê bê rakirin, Wê bibe wêrane.

²Wê bajarên Eroêrê vikîvala bibin. Wê bibin cihên keriyan Ku li wir mexel bin Û kesek wan sil neke.

³Wê li Efrayîmê bajarên bisûr, Li Şamê padîşahî nemînin. Wê bermayiyên Aramê Wekî rûmeta Îsraîlê bişikên. Ev e gotina Xudanê Karîndar.

⁴Wê rojê, wê rûmeta Aqûb qels bibe, Wê bezê goştê wî bihele.

⁵Çawa ku pale dexil dide hev, Çawa ku bi destê xwe simbilan bidirû, Çawa ku li Deşta Refayiyan zilamek simbilan bidirû, Wê wisa be.

⁶Wê tenê jibermayî bimînin. Çawa ku dara zeytûnê hatibe daweşandin, Wê li ser guliyên jorîn du sê heb bimînin, Wekî li ser çiqlên dara fêkiyê, Çar pênc lib bimînin. Ev e gotina Xwedayê Îsraîl Xudan.

⁷Wê rojê wê mirov berê xwe bidin yê ku ew afirandine û çavê wan li Pîrozê Îsraîl binêrin.

⁸Wê berê xwe nedin gorîgehên ku bi destên xwe çêkirine. Wê li yê ku tiliyên wan çêkiriye nenêrin. Wê ne li pûtên Aşêrayê û ne jî li gorîgehên bixûrê binêrin.

⁹Wê rojê bajarên wan ên hêzdar wê bibin wek derên Hîwî û Amoriyên[20] ku ji ber Îsraîliyan terikandin. Wê bibin wêrane.

¹⁰Çimkî te Xwedayê xilaskarê xwe ji bîr kir, Zinarê ku te kiribû sitara xwe bi bîr neanî. Loma tu şaxên xweş datînî Û dêliyên xerîb diçînî[21].

¹¹Roja tu wan datînî ew zîl didin Û dotira rojê dikarin bûtik bidin. Lê di roja nexweşî û êşa bêderman de, Wê ber wêran bibe.

¹²Heywax, xuşîna gelek miletan, Wekî xuşîna deryayê ye. Heywax, xumîna neteweyan Wekî xumîna avên xurt e.

¹³Netewe wekî avên rabûne bixumin jî, Gava Xwedê erzê wan bişikêne wê dûr birevin. Wekî hûrika kaya çiyan Li ber bayê bikevin, Wekî toza gêrbûyî Li ber babelîskê bipengizin.

¹⁴Dema êvarê, va ye tirs û saw! Beriya ku bibe sibe, tune bûn. Ev e para kesên me talan dikin, Pişka kesên me bişelînin.