Read Kurmanji Încîl Îşaya 19 Bible Online

Îşaya 19 - Kurmanji Încîl bible

Îşaya 19

¹Peyama li ser Misrê: Va ye, Xudan li ewrê bi lez siwar bûye Û diçe Misrê. Pûtên Misrê li ber wî dilerizin, Dilê Misriyan di nava wan de dihele.

²Dibêje: «Ezê Misriyan li dijî Misriyan rakim ser piyan. Wê bira li dijî bira, Cîran li dijî cîran, Bajar li dijî bajaran, Padîşahî li dijî xwe şer bike.

³Wê ziravê Misriyan biqete, Ezê şêwra wan tevlihev bikim. Wê ji pûtan, ji ruhên miriyan, Ji cinbaz û kesên bi ruhan dişêwirîn bipirsin.

⁴Ezê Misriyan bidim destê serwerekî dijwar. Wê padîşahekî dilhişk li ser wan serweriyê bike.» Ev e gotina Xudanê Karîndar Reb.

⁵Wê avên Nîlê ziwa bin, Wê çem biçike û biterike.

⁶Wê bêhn bikeve coyên wê, Wê avên şaxên Nîla Misrê kêm bibin û biçikin. Wê zil û qamîş biçilmisin.

⁷Wê keviyên Nîlê, zilên li ber devê wê Û hemû zeviyên li ber çem ziwa bin. Berê wan li ber bayê bikeve û tune be.

⁸Wê masîvan bikin axîn, Hemû kesên nîka xwe davêjin Nîlê Wê şînê bikin. Kesên tora xwe davêjin ser rûyê avê jî Wê perîşan bin.

⁹Wê kesên karê kitana şehkirî Û cawê spî dihonin şermezar bin.

¹⁰Wê tevinkarên Misrê dilşikestî bin Û hemû kesên bi destheqê xwe dixebitin, Wê aciz bin.

¹¹Serekên Soanê[22] çiqas ehmeq in, Şêwirmendên Firewn ên şehreza, Şîretên bêhişan dikin. Hûn çawa ji Firewn re dibêjin: «Ez kurê şehreza me, Ez kurê padîşahên berê me»?

¹²Ka şehrezayên te li ku ne? Bila ew ji te re bêjin, Bila ew bidin zanîn Ku şêwra Xudanê Karîndar ya ji bo Misrê çi ye.

¹³Serekên Soanê bûn wekî ehmeqan, Serekên Memfîsê[23] xapiyan. Kevirên serê riknên eşîrên Misrê, Ew ji rê derxistin.

¹⁴Xudan ruhekî tevlihev xist nav wan. Çawa ku serxweş bi vereşana xwe dişewişe, Wan Misir jî di her karên wê de şewişand.

¹⁵Ne serî û ne binî, Ne çiqlên dara xurmê û ne zil, Yê ku ji bo Misrê tiştekî bike nema.

¹⁶Wê rojê wê Misrî ji ber destê Xudanê Karîndar ê ku li dijî wan rake, bilerizin û bikevin sawê[24].

¹⁷Wê axa Cihûdayê ji bo Misrê bibe tirs û xof. Ji ber niyeta Xudanê Karîndar ê li dijî wan, her kesê ku navê wî bibihîze wê bikeve sawê.

¹⁸Wê rojê wê li welatê Misrê pênc bajar hebin ku bi zimanê Kenanê dipeyivin. Wê ev bajar ji Xudanê Karîndar re sonda hevalbendiyê bixwin. Wê navê bajarekî ji wan bibe «Bajarê Tavê[25].»

¹⁹Wê rojê wê li nav welatê Misrê ji Xudan re gorîgehek û li sînorê wê ji Xudan re stûnek bê çikandin.

²⁰Wê ev yek ji bo Xudanê Karîndar li welatê Misrê nîşan û şahid be. Gava gel ji ber zordarên xwe ji Xudan re bikin hewar, wê Xudan ji wan re rizgarkar bişîne. Wê parêzeriya wan bike û wan rizgar bike.

²¹Wê Xudan xwe bi Misrê bide zanîn û wê rojê wê Misrî Xudan nas bikin. Wê bi qurban û pêşkêşiyan xulamiya Xudan bikin. Wê ji Xudan re soz bidin û pêk bînin.

²²Wê Xudan li Misrê bixe û paşê baş bike. Wê bizivirin Xudan. Wê lavakirina wan bibihîze û wan baş bike.

²³Wê rojê wê ji Misrê heta Aşûrê riyeke mezin hebe. Wê Aşûrî werin Misrê û Misrî herin Aşûrê. Wê Misrî û Aşûrî bi hev re biperizin.

²⁴Wê rojê wê Îsraîl bi Misir û Aşûrê re bibe welatê sisiyan û li nav dinyayê bereket hebe.

²⁵Çimkî Xudanê Karîndar ew pîroz kirin û got: «Bila gelê min Misir, karê destê min Aşûr û mîrasa min Îsraîl pîroz be.»