Read Kurmanji Încîl Îşaya 2 Bible Online

Îşaya 2 - Kurmanji Încîl bible

Îşaya 2

¹Dîtiniya Îşayayê kurê Amots a li ser Cihûda û Orşelîmê:

²Di rojên dawî de, Çiyayê Mala Xudan wê bê danîn ku Bibe çiyayê herî bilind. Wê li ser hemû giran bikeve. Wê hemû milet biherikê.

³Wê pir gel herinê û bêjin: «Werin Çiyayê Xudan, Werin, em herin Mala Xwedayê Aqûb. Wê riyên xwe hînî me bike Û emê di rêçikên wî de bimeşin.» Çimkî wê Şerîet ji Siyonê, Peyva Xudan ji Orşelîmê derkeve.

⁴Wê Xudan dadbariyê bike di nav miletan de, Wê meseleyên pir gelan çareser bike. Wê şûrên xwe bikin gîsin Û rimên xwe bikin kêra rezvaniyê. Wê milet li dijî hev şûr ranekin, Êdî hînî şer nebin.

⁵Ya Mala Aqûb, werin em di ronahiya Xudan de rêve herin.

⁶Ya Xudan, te gelê xwe, Mala Aqûb berda. Çimkî dilê wan bi baweriyên ji rojhilat tên tije bû. Ew jî wek Filîstiyan bû sêrbaz Û tevî zarokên xerîban dest dane hev.

⁷Welatê wan bi zêr û zîv tije ye, Dawiya xezîneyên wan tuneye. Welatê wan bi hespan tije ye, Dawiya erebeyên wan ên şer tuneye.

⁸Welatê wan bi pûtan tije ye. Ew li ber tiştên bi destên xwe, Tiştên bi tiliyên xwe çêkirine diçin ser çokan.

⁹Mirov hatin tewandin, Herkes hat nizimkirin. Wan nebexişîne, ya Xudan!

¹⁰Ji ber tirs û xofa Xudan, Ji ber rewnaqiya wî, Herin xwe bispêrin zinaran Û xwe di nav tozê de veşêrin.

¹¹Wê çavên bilind bên nizimkirin, Pozbilindiya mirovan bê şikandin. Wê rojê wê tenê Xudan bê berzkirin.

¹²Çimkî roja Xudanê Karîndar, Wê li dijî hemû qure û pozbilindan be. Wê rojê hemû kesên hatine bilindkirin, Wê bêne nizimkirin.

¹³Wê li dijî hemû darên sedrê yên berz û bilind ên Lubnanê, Li dijî hemû darberûyên Başanê,

¹⁴Li dijî tevahiya çiyayên bilind, Li dijî tevahiya girên mezin,

¹⁵Li dijî hemû bircên bilind, Li dijî hemû sûrên asê,

¹⁶Li dijî tevahiya gemiyên Tarşîşê Û wê li dijî tevahiya keştiyên xweş be.

¹⁷Wê pozbilindiya mirovan bê şikandin Û quretiya wan bê nizimkirin. Di wê rojê de, wê tenê Xudan bilind be

¹⁸Û wê pût bi tevahî ji holê rabin.

¹⁹Çaxê Xudan rabe dinyayê bitirsîne, Wê mirov ji ber tirs û xofa Xudan, Ji ber rewnaqiya wî, Bikevin şikeftên zinaran û qulên axê.

²⁰Di wê rojê de wê mirov Pûtên zêrîn û zîvîn ên ji bo perizîna xwe çêkirine, Bivirvirînin şevşevok û koremişkan.

²¹Çaxê Xudan rabe ku dinyayê bitirsîne, Wê mirov ji ber tirs û xofa Xudan, Ji ber rewnaqiya wî, Bikevin qelîştokên zinaran Û şikeftên zinarên bilindciyan.

²²Êdî baweriya xwe bi mirovan neyine, Roj tê nefes lê namîne. Ma qedrê wî çi ye?