Read Kurmanji Încîl Îşaya 23 Bible Online

Îşaya 23 - Kurmanji Încîl bible

Îşaya 23

¹Peyama li ser Sûrê: Ya gemiyên Tarşîşê, bikin zarîn! Çimkî Sûr wêran bû, Mal û keştîgehên wê jî tunene. Ji diyarê Kîttîmê[29] Haya wan hat pêxistin.

²Ya kesên li keviyan rûdinin, Bêdeng bin! Ya bazirganên Saydayê, Deryavan tu dewlemend kirî.

³Ew ji ser gelek avan dihatin ku Hatina te ji genimê Şîhorê[30], Ji dexla Nîlê be. Tu bazara miletan bûyî.

⁴Ya Sayda, şerm bike! Çimkî derya peyivî, Birca deryayê dibêje: «Min ne êş kişand, Ne jî zarok anî. Min ne xort xweyî kirin, Ne jî keç mezin kirin.»

⁵Gava xebera Sûrê bigihîje Misrê, Ji ber xeberê Wê êş bikişînin.

⁶Derbasî Tarşîşê bibin! Ya kesên li keviyan rûdinin, bikin zarîn!

⁷Ma bajarê we yê şahiyê ku Ji demên berê ve heye Û lingên wî hûn birin cihên dûr ku bi cih bibin, ev e?

⁸Ma kê pîlana li dijî Sûrê kir? Ma kê pîlana bajarê tac dida kir Ku bazirganên wê mîr, Tacirên wê jî rûmetdarên dinyayê bûn?

⁹Xudanê Karîndar ev pîlan kir. Wî kir ku pozbilindiya hemû rewnaqiyê biherimîne Û hemû rûmetdarên dinyayê biçûk bike.

¹⁰Tu diyarê xwe wekî diyarê Nîlê cot bike[31], Ya Tarşîşa keç, êdî keştîgeh tuneye.

¹¹Wî destê xwe bi ser deryayê ve dirêj kir, Wî padîşahî lerizandin. Xudan li ser Kenanê emir kir, Wê kelehên wê helak bibin.

¹²Wî got: «Tê êdî şa nebî, Saydaya keça xama ya zor lê hatîkirî, Rabe, derbasî Kîttîmê bibe, Lê li wir jî ji te re rihetî tuneye.»

¹³Va ye welatê Kildaniyan! Ew gel êdî tuneye[32]. Aşûrê ew ji heywanên çolê re hiştin. Aşûr bircên xwe ava kirin, Qesrên wan hilweşandin, Wê ew wêran kirin.

¹⁴Bikin zarîn ya gemiyên Tarşîşê, Çimkî keleha we hilweşiya.

¹⁵Piştî wê rojê wê Sûr heftê salan, bi qasî rojên padîşahekî bê jibîrkirin. Gava heftê sal qediya, çîroka strana li ser fahîşê çawa be, wê li ser Sûrê jî wisa be.

¹⁶Çeng hilde û li bajêr bigere, Ya fahîşeya jibîrkirî! Ji bo ku tu werî bîra wan, Baş lêxe, gelek stranan bêje.

¹⁷Gava heftê sal temam bû, wê Xudan serdana Sûrê bike. Lê paşê wê bajar dîsa fahîşetiya bi pere bike. Bi hemû padîşahiyên dinyayê re fahîşetiyê bike.

¹⁸Ya ku bajar ji bazirganiyê û ji fahîşetiyê qezenc kiriye wê ji Xudan re bê terxankirin. Wê nekeve xezîneyê û neyê veşartin. Ji bo ku heta têr bibin bixwin û cil û bergên baş li xwe bikin, wê qezenca wê ji wan kesan re be ku li hizûra Xudan rûdinin.