Read Kurmanji Încîl Îşaya 26 Bible Online

Îşaya 26 - Kurmanji Încîl bible

Îşaya 26

¹Wê rojê wê li welatê Cihûdayê ev stran bê gotin: Bajarekî me yê hêzdar heye. Bi sûr û dîwarên wî Xwedê rizgariyê tîne.

²Dergehan vekin! Miletê rast û dilsoz bikeve hûndir.

³Tu kesê niyeta wan naleqe, Di nav aştiyê de diparêzî. Ji bo ew bi te ewle ne, Ew di nav aştiyê de ne.

⁴Bi Xudan her û her ewle bin, Çimkî Xudan[33] zinarekî herheyî ye.

⁵Wî kesên li bilindahiyan rûdinin tewandin. Bajarê bilind nizim dike, Heta erdê, heta axê Ew nizim dike.

⁶Wê bajar bikeve bin lingan, Lingên bindestan. Wê di bin gavên belengazan de were perçiqandin.

⁷Riya rastan rastî ye, Ya Yê Rast, riya rastan rast dikî.

⁸Belê ya Xudan, em di rê û rêbazên te de Li benda te man. Daxwaza dilê me Navê te û salixdana te ye.

⁹Bi şevan dilê min te dixwaze, Di hinavê min de, Canê min zû li pey te tê. Çimkî çaxê rêbazên te li dinyayê bin, Wê rûniştiyên erdê hînî rastiyê bin.

¹⁰Kerem li xeraban bê kirin jî, Rastiyê hîn nabin. Ew li diyarê heqiyê neheqiyê dikin, Heşmeta Xudan nabînin.

¹¹Ya Xudan, destê te bilind bû, Lê ew nabînin. Bila ew xîreta te ya ji bo gel Bibînin û şerm bikin. Wê agir neyarên te bixwe û biqedîne.

¹²Ya Xudan, tê aştiyê bidî me. Çimkî her karê me, te ji bo me kir.

¹³Ya Xwedayê me Xudan, Ji xeynî te, xweyên din serweriya me kirin, Lê emê tenê salixdana navê te bikin.

¹⁴Ew mirin, wê nejîn. Ew sî ne, wê ranebin. Çimkî te ew ceza û helak kirin, Te bibîranîna wan tune kir.

¹⁵Lê te gel zêde kir, ya Xudan, te gel zêde kir. Tu birûmet î, Te hemû sînorên welêt fireh kirin.

¹⁶Ya Xudan, ew di tengasiyê de li te geriyan, Gava terbiyekirina te gihîşt wan, Wan duaya bêdeng ji nava xwe rijand.

¹⁷Çawa jina li ber zarokanînê êş dikişîne Û ji ber êşên xwe diqîre, Ya Xudan, em jî li pêş te wisa bûn.

¹⁸Em bi zaro man, Me êş kişand. Lê tenê ba ji me re bû. Me ne rizgarî ji dinyayê re anî, Ne jî rûniştiyan ji erdê re anî.

¹⁹Lê wê miriyên te vejin, Wê bedenên wan rabin. Kesên di nav tozê de dijîn, Şiyar bin û bi kêf biqîrin! Çimkî xunava te xunava ronahiyê ye Û wê dinya miriyên xwe bîne jiyanê.

²⁰Were gelê min! Bikeve odeyên xwe yên hûndir Û li pişt xwe deriyan bigire. Demeke kurt xwe veşêre, Heta ku xezeb derbas bû.

²¹Çimkî, va ye Xudan ji cihê xwe dertê. Wê ji ber neheqiyên wan, Rûniştiyên dinyayê ceza bike. Wê dinya xwîna li ser xwe derxe meydanê, Wê kuştiyan êdî veneşêre.