Read Kurmanji Încîl Îşaya 27 Bible Online

Îşaya 27 - Kurmanji Încîl bible

Îşaya 27

¹Wê rojê wê Xudan Bi şûrê xwe yê dijwar, mezin û hêzdar, Livyetanê[34] marê ku zû direve, Livyetanê marê ku fetlometlo diçe, ceza bike. Wê ejderhayê li deryayê bikuje.

²Wê rojê wê Xudan bêje: «Ji bo rezê xweşik, bistrînin!

³Ez Xudan, ez rezvanê wî me. Ez wî hergav av didim. Ji bo tu kes xesarê nedê, Ez bi şev û roj diparêzim.

⁴Li ba min xezeb tuneye. Heger ew devî û dirî bide min, Ezê herim û êrîşê wî bikim Û bi tevahî bişewitînim.

⁵An na, bila xwe bi hêza min ve bigire. Bi min re aştiyê çêke, Bi min re aştiyê çêke.»

⁶Wê di rojên bê de Aqûb kok bide, Wê Îsraîl bûtik bide, kulîlk veke Û tevahiya dinyayê bi fêkiyan dagire.

⁷Ma wî çawa li kesên li wan xistine xist, Wisa li wan jî nexist? Çawa kesên ku ew kuştin hatin kuştin, Ma ew jî nehatin kuştin?

⁸Xudan bi qewirandin û sirgûnê ew darizandin. Wî bi hilma xwe ya dijwar, Di roja bayê rojhilat de berda wan.

⁹Loma wê sûcê Aqûb bi vê bê bexişandin, Wê tevahiya berê rakirina gunehên wan wiha pêk bê: Wê hemû kevirên gorîgehê, Wekî kilsa kutayî biperçiqîne. Êdî wê ne pûtekî Aşêrayê Ne jî gorîgehên bixûrê li ser piyan bimînin.

¹⁰Çimkî bajarê bisûr bi tena serê xwe, Wekî çolê hatiye hiştin Û bûye warekî bêkes. Wê golik li wê derê biçêrin, mexel bin. Wê şaxên wê bixwin û biqedînin.

¹¹Gava guliyên wê hişk bibin, Wê bên jêkirin. Wê jin werin û wan bişewitînin. Çimkî ev gel fêm nake. Loma wê afirandarê wan Li ber wan nekeve, Yê ku şikil daye wan, Wê rehmê li wan neke.

¹²Wê rojê wê Xudan ji Firata bi coş biherike heta Geliyê Misrê, bêndera xwe gêre bike û yek bi yek we bide hev, ya Îsraîlîno!

¹³Wê rojê wê li boriya mezin bê xistin û kesên li welatê Aşûrê li ber helakbûnê ne û kesên li welatê Misrê li sirgûnê ne vegerin. Wê li Çiyayê Pîroz, li Orşelîmê li ber Xudan çok bidin.