Read Kurmanji Încîl Îşaya 29 Bible Online

Îşaya 29 - Kurmanji Încîl bible

Îşaya 29

¹Wey li Ariyêl[36], Ariyêl! Li bajarê ku Dawid artêşgeh lê danî! Keremke! Salan bavêje ser salan! Bila cejn ji hev neqetin!

²Lê ezê Ariyêlê bixim tengasiyê. Wê bibe feryad û fîgan. Wê Orşelîm ji bo min bibe wekî ariyêlekê.

³Ezê li dijî te artêşgehê çeper bikim, Ezê bi bircan te dorpêç bikim, Li ber sûrên xwe palan çêkim.

⁴Tê bêyî nizimkirin Û ji erdê bipeyivî. Wê ji nav tozê gotina te were. Wê dengê te wek dengê miriyan ji erdê were, Wê gotina te bibe pistepist Û ji nav axê derkeve.

⁵Êrê wê qelebalixa dijminên te wek toza hûr be, Wê qelebalixa zordaran wek hûrika kayê bifire. Lê di cih de, ji nişkave,

⁶Wê Xudanê Karîndar Bi dengê brûskê, Bi erdhejîn û xirecirê, Bi bahoz û taviyê, Bi pêta agirê bi şewat, Te ceza bike.

⁷Wê qelebalixa hemû miletan a li dijî Ariyêlê şer dikin, Hemû kesên li dijî wê û birca wê şer dikin Yên wê dixin tengasiyê, Wê wekî xewnê, Wekî dîtiniya şevê bin.

⁸Çawa ku mirovê birçî Di xewnê de xwarinê dixwe Û çaxê hişyar be, hê birçî ye, Çawa ku mirovê tî Di xewnê de avê vedixwe, Û çaxê hişyar be, hê ji tîbûnê helak dibe, Qelebalixa hemû miletan wê wiha be Ku li dijî Çiyayê Siyonê şer dikin.

⁹Xwe şaşomaşo bikin, Şaş û metel bimînin. Xwe kor bikin û nebînin. Serxweş bin, lê ne bi şerabê, Bişewişin, lê ne ji ber meyê.

¹⁰Çimkî Xudan ruhekî xewa giran Bi ser we de rijand. Wî çavên we girtin, ya pêxemberno! Wî serên we nixamtin, ya kesên ku dibînin!

¹¹Ji bo we, her dîtinî Bû wekî gotinên nivîsa morkirî. Heger wê bidin kesê bi xwendinê dizane Û bibêjin: «Em lava dikin, tu vê nivîsê bixwînî» Wê bibêje: «Ez nikarim, çimkî morkirî ye.»

¹²Heger ew nivîsê bidin kesê bi xwendinê nizane Û bibêjin: «Em lava dikin, tu vê nivîsê bixwînî» Ew jî dibêje: «Ez bi xwendinê nizanim.»

¹³Reb got: «Ev gel bi devê xwe nêzîkî min dibe Û bi lêvên xwe min birûmet dike Lê dilê wan ji min dûr e. Tirsa wan a ji min jî, Tenê emrên mirovan in Ku ji wan hîn bûne.

¹⁴Loma ezê careke din kerametan nîşanî vî gelî bidim, Erê ezê karekî nûwaze û matmayî bikim. Wê şehrezabûna şehrezayan nemîne Û fêmdariya fêmdaran bê veşartin.»

¹⁵Wey li kesên ku pîlanên xwe Ji Xudan di kûrahiyê vedişêrin. Karên wan di tariyê de ne. Ew dibêjin: «Ma kî me dibîne? Ma kî bi me dizane?»

¹⁶We her tiştî serobino kir! Ma cerçêker bi gilê re yek e? Ma avahî ji bo kesê ku ew çêkiriye dikare bibêje: «Ma wî ez çêkirime?!» Ma tiştê ku şikil lê hatiye dayîn, Dikare ji bo kesê ku şikil daye re bibêje: «Ma ew ji tiştekî fêm nake?!»

¹⁷Ma wê di demeke nêzîk de Lubnanê nebe axeke bi ber? Ma wê zeviyeke bi ber nebe daristan?

¹⁸Wê rojê wê mirovên ker peyvên nivîsê bibihîzin, Wê di nav dû û tariya wan de Çavên koran van tiştan bibînin.

¹⁹Wê bindest şahiya xwe ya bi Xudan zêde bikin, Hejarên nav mirovan bi Pîrozê Îsraîl şa bin.

²⁰Çimkî wê zordar tune be, Wê tinazkar nemîne. Hemû kesên ji bo xerabiyê disekinin, Wê bên telefkirin.

²¹Kesên bi gotinên xwe Mirovan sûcdar dertînin, Li dijî dozgerê dergehê bajêr dafik datînin Û bêsedem heqê rastan dixwin. Wê bên telefkirin.

²²Loma Xudanê ku Îbrahîm rizgar kiriye li ser Mala Aqûb wiha dibêje: «Wê êdî Aqûb şermezar nebe, Wê rûyê wî neçilmise.

²³Çimkî gava ew zarokên xwe, Ku karên destê min in Li ba xwe bibîne, Wê zarok navê min pîroz bikin. Wê Pîrozê Aqûb pîroz bikin Û ji Xwedayê Îsraîl bitirsin.

²⁴Kesên ji ruh averê bûne jî, Wê bigihîjin fêmdariyê. Kesên dikin pitepit, Wê bixwazin hîn bibin.»