Read Kurmanji Încîl Îşaya 3 Bible Online

Îşaya 3 - Kurmanji Încîl bible

Îşaya 3

¹Çimkî niha Xudanê Karîndar Reb, Ji Orşelîm û Cihûdayê Piştgirî û alîkariya wan radike. Ew hemû piştgiriya wan a nan û avê,

²Mêrxas û şervan, Dadger û pêxember, Falbaz û rîspî,

³Serpêncî û zilamê rûmetdar Şêwirmend û sêrbazê şehreza, Remildarê pispor radike.

⁴Ezê zarokan ji wan re bikim serwer, Wê zarokên biçûk serweriya wan bikin.

⁵Wê gel li hev, Her kes li cîranê xwe zilmê bike. Wê zarok li rîspiyan, Beredayî li kesê rûmetdar bêedebiyê bike.

⁶Wê zilamek li mala bavê xwe Ji birayê xwe re bêje: «Qet nebe xiftanê te heye! Rabe bibe serwerê me, Bila ev wêrane di bin destê te de be.»

⁷Lê wê rojê birayê wî, Wê dengê xwe bilind bike û bêje: «Ez nikarim birînan bipêçim, Li mala min ne nan, heye, ne jî xiftan. Min nekin serwerê gel.»

⁸Orşelîm terpilî bû, Cihûda ketibû. Çimkî gotin û kirina wan li dijî Xudan e, Li dijî hizûra rûmeta wî serhildêr in.

⁹Reng û rûyê wan Li dijî wan şahidiyê dike. Gunehên xwe wek Sodomê Bi eşkereyî dibêjin, qet venaşêrin. Wey li wan! Çimkî wan xerabî anî serê xwe.

¹⁰Ji yên rast re bêjin, wê qencî bi wan bibe. Çimkî wê berê kirinên xwe bixwin.

¹¹Wey li xeraban! Wê xerabî bi wan bibe, Wê kirina wan bê pêşiya wan.

¹²Zarok in zordarên gelê min, Jin serweriya wan dikin. Ya gelê min rêberên te, Te ji rê derdixin. Rêçikên tu lê dimeşî tevlihev dikin.

¹³Xudan ji bo doza xwe bike, Ji bo dîwana gelan bike sekiniye.

¹⁴Xudan bi rîspî û serekên gel re Dîwanê dike û dibêje: «Yê ku rez xwarine û qedandine hûn in, Malê talanê bindestan di xaniyên we de ne.

¹⁵Ma çi bi we bûye ku hûn gelê min diperçiqînin Û rûyê bindestan dihêrin?» Ev e gotina Xudanê Karîndar Reb.

¹⁶Xudan got: «Madem keçên Siyonê pozbilind in, stûyê xwe dirêj dikin, çav dişikênin û diçin, xirxalên lingên wan dikin şingînî, xwe dihejînin û rêve diçin,

¹⁷ji ber vê yekê wê Reb serê wan gurî bike û Xudan eyba wan veke.»

¹⁸Wê rojê wê Reb xweşikbûna xirxalan, tîtik, heyvik,

¹⁹guhar, bazin, xêlî,

²⁰şerpe, zendik, piştên, şûşên miskê, nivişt,

²¹gustîl, xizêm,

²²cilên cejnan, kûlav, xiftan, kîsik,

²³neynikên destan, cilên kitanî, kum û çarikan ji navê rake.

²⁴Wê di şûna bêhna xweş de bêhna pîs, Di şûna piştênê de benik, Di şûna lûrelûra keziyan de serê keçel, Di şûna cil û bergên bi xemil de çûx, Di şûna rindiyê de daxkirin hebe.

²⁵Wê mêrên we bi şûr, Mêrxasên we di şer de bikevin.

²⁶Wê dergehên bajêr bikin axîn û şînê bikin, Perîşan bimînin û li ser axê rûnin.