Read Kurmanji Încîl Îşaya 32 Bible Online

Îşaya 32 - Kurmanji Încîl bible

Îşaya 32

¹Va ye, wê padîşahek bi heqiyê padîşahiyê bike, Wê serek bi edaletê serwerî bikin.

²Wê her yekî ji wan Wekî dereke mirov xwe ji bayê vedişêre, Wekî sitara taviyê, Wekî coyên avê yên dera ziwa, Wekî siya zinarê bilind Li dera westayiyan be.

³Wê çavên kesên dibînin neyên girtin Guhên kesên dibihîzin guhdarî bikin.

⁴Wê dilên kesên nefikirîn fêm bikin, Wê zimanên lal zû û zelal bipeyivin.

⁵Wê êdî ji ehmeq re camêr, Ji bênamûs re birûmet neyê gotin.

⁶Çimkî ehmeq ehmeqiyê dike Û bi dilê xwe neheqiyê dike ku Fesadiyê bike, Li ser Xudan tiştên şaş dibêjin, Vala bihêle zikê birçiyan Û avê nede tîbûyiyan.

⁷Riyên kesên bênamûs xerab in. Ew pîlanên riswatiyê çêdikin ku Gava hejar di doza xwe de mafdar be jî Wî bindestî bi gotinên derew xera bike.

⁸Lê camêr pîlanên camêrane dike, Ew bi karên camêrane li ser lingan dimîne.

⁹Ya jinên bêxem! Rabin, dengê min bibihîzin. Keçên di nav ewlehiyê de dimînin, Guh bidin gotina min.

¹⁰Piştî salekê bi çend rojan, Hûnê bilerizin, ya jinên ewle. Çimkî wê dema çûna ser rezan biqede, Wê dema çinîna fêkiyan neyê.

¹¹Bilerizin, jinên bêxem! Bihejin, jinên di nav ewlehiyê de dimînin! Cilên xwe derxin, Xwe tazî bikin Û çûx li navtenga xwe girê bidin!

¹²Li ser zeviyên berdar, Li ser mêwên biber, Li singê xwe bixin,

¹³Li ser axa gelê min Ku devî û dirî derkevin, Li ser hemû malên şahiyê Yên li bajarê şên jî.

¹⁴Çimkî wê qesir bê berdan, Wê bajarê qelebalix bê terikandin. Wê serê gir û birca çavdêr, Her û her bibe şikeft, Şahiya kerên çolê Û çêreya keriyan.

¹⁵Wê wisa be heta ku Ruhekî ji jor ve bi ser me de bê rijandin, Çol bibe bexçeyê biber Û bexçeyê biber jî bibe daristan.

¹⁶Wê heqî li çolê bimîne, Edalet jî li bexçeyê biber rûne.

¹⁷Wê karê edaletê, aştî Û encama wê, rihetî û ewlehiya herheyî be.

¹⁸Wê gelê min li warê aştiyê, Li avahiyên ewle Û li derên rihet û bêxem rûne.

¹⁹Lê wê daristan bi tevahî ji navê rabe Û bajar bi tevahî bê nizimkirin.

²⁰Xwezî bi we ku li ber hemû avan tovên xwe biçînin Û ga û kerê xwe serbest berdidin.