Read Kurmanji Încîl Îşaya 36 Bible Online

Îşaya 36 - Kurmanji Încîl bible

Îşaya 36

¹Di çardeh saliya padîşahiya Hîzqiyayê Padîşah de Sanhêrîvê Padîşahê Aşûrê li dijî tevahiya bajarên bisûr ên Cihûdayê derket û ew standin.

²Padîşahê Aşûrê fermandarê xwe bi artêşa mezin re ji Laxîşê şand Orşelîmê ba Hîzqiyayê Padîşah. Fermandar hat û li ber Zeviya Kincşûştinê li ber coya li ba Hewza Jorîn sekinî.

³Êlyaqîmê kurê Hîlqiyayê ku berpirsê qesrê bû, Şevnayê nivîsende û Yoahê dîroknivîsê kurê Asaf, çûn pêşwaziya wî.

⁴Fermandar ji wan re got: «Ji Hîzqiya re bêjin: ‹Padîşahê Mezin, Padîşahê Aşûrê wisa dibêje: Tu bi çi yê xwe ewle yî?

⁵Tu dibêjî ji bo şer pîlan û hêza min heye, lê tenê ev gotinên vala ne. Tu bi kê ewle yî ku tu li dijî min radibî?

⁶Va ye tu bi Misrê ewle yî. Lê kesê xwe bispêre vê şiva ji qamîşê şikestî, wê şiv di destê wî re here û qul bike. Firewnê Padîşahê Misrê, ji her kesê pê ewle ye re wisa ye.

⁷Heger tu ji min re bêjî: Em bi Xwedayê xwe Xudan ewle ne. Ez dibêjim: Ma ew ne ew îlah e ku Hîzqiya bilindciyên perizînê û gorîgehên wî tune kirin?! Ma wî ji gelê Cihûda û Orşelîmê re negot: Divê hûn li ber vê gorîgehê biperizin›?!

⁸«Niha were, bi xweyê min Padîşahê Aşûrê re şert bigire. Heger tu bikarî siwaran peyda bikî, ezê du hezar hespan bidim te.

⁹Gava ji bo erebeyên şer û siwaran bi Misriyan ewle bibî, tê çawa xulamên herî biçûk ên xweyê min têk bibî?

¹⁰Ma ez bêyî destûra Xudan rabûm ku vî welatî xera bikim? Na! Xudan ji min re got: ‹Li dijî vî welatî rabe û xerab bike.›»

¹¹Êlyaqîm, Şevna û Yoah ji fermandar re got: «Em lava dikin ji van xulamên xwe re bi zimanê aramî bêje, çimkî em bi vî zimanî dizanin. Bi me re bi zimanê îbranî nepeyive. Gelê li ser dîwêr guhdariya me dike.»

¹²Fermandar got: «Ma xweyê min ez şandim ku ez bi tenê ji te û xweyê te re van gotinan bibêjim? Ev xeber ji gelê li ser dîwêr rûniştî re jî hate şandin. Tevî we, wê ew jî gûyê xwe bixwin û mîza xwe vexwin.»

¹³Fermandar sekinî û bi dengekî bilind bi zimanê îbranî qîriya û got: «Gotinên Padîşahê Mezin, Padîşahê Aşûrê bibihîzin!

¹⁴Padîşah wiha dibêje: ‹Hîzqiya bila we nexapîne! Çimkî wê nikaribe we rizgar bike.

¹⁵Hîzqiyayê ku dibêje: Wê Xudan me esse rizgar bike û wê ev bajar nekeve destê Padîşahê Aşûrê, bila neke ku hûn bi Xudan ewle bin.

¹⁶Guhdariya Hîzqiya nekin.› Çimkî Padîşahê Aşûrê wiha dibêje: ‹Teslîm bibin, werin xwe bavêjin bextê min. Bila niha herkes ji mêwa xwe û ji darhejîra xwe bixwe û ji bîra xwe avê vexwe.

¹⁷Paşê ezê bêm û we bînim welatekî nû yê wekî welatê we, welatekî şerab û dexil e, welatê nan û rêz e.

¹⁸Bila Hîzqiyayê ku dibêje wê Xudan me rizgar bike we nexapîne. Gelo ji îlahên gelan, heta niha kîjan îlah welatê xwe ji destê Padîşahê Aşûrê rizgar kiriye?

¹⁹Ka îlahên Hamat û Arpadê li ku ne? Ka îlahên Sefarwayîmê li ku ne? Gelo wan Samerya ji destê min rizgar kiriye?

²⁰Di nava hemû îlahên van welatan de, îlahên ku welatên xwe ji destê min rizgar kirine kî ne ku Xudan Orşelîmê ji destê min rizgar bike?›»

²¹Wan dengê xwe nekir û bersiva wî neda. Çimkî emrê padîşah wiha bû: «Bersiva wî nedin.»

²²Êlyaqîmê kurê Hîlqiyayê berpirsê qesrê, Şevnayê nivîsende, Yoahê dîroknivîsê kurê Asaf, kincên xwe çirandin, hatin ba Hîzqiya û gotinên fermandar jê re gotin.