Read Kurmanji Încîl Îşaya 47 Bible Online

Îşaya 47 - Kurmanji Încîl bible

Îşaya 47

¹«Ya Babîla keça xama! Dakeve xwarê û di nav tozê de rûne! Ya keça Kildaniyan! Textê te tuneye, li erdê rûne! Çimkî wê êdî ji te re ‹Nazik û nazdar› nebêjin.

²Tu girikê hilde û arvan bihêre. Xêliya xwe veke, dawa xwe hilde. Ranên xwe tazî bike, di çeman re derbas bibe.

³Wê tazîbûna te bê vekirin, Wê riswatiya te bê dîtin. Ezê tolê bistînim û li ber kesî nekevim.»

⁴Navê rizgarkarê me Xudanê Karîndar e, Ew Pîrozê Îsraîl e.

⁵«Ya keça Kildaniyan! Bêdeng rûne û bikeve tariyê. Çimkî êdî wê ji te re ‹Şahbanûya padîşahiyan› nebêjin.

⁶Ez li gelê xwe hêrs bûm. Min mîrasa xwe mirdar kir, Min ew da destê te. Tu li wan nehatî rehmê, Te nîrê xwe li ser pîr û kalan pir giran kir.

⁷Te got: ‹Ezê her û her şahbanû bim› Û te ev nekir dilê xwe Dawiya vê yekê neanî bîra xwe.

⁸«Ya jina kêf û zewqê ku di ewlehiyê de rûdine Û di dilê xwe de dibêje: ‹Ez heme Û ji xeynî min, yeka din tuneye. Ezê jinebî nemînim Û windabûna zarokan nebînim› Niha bibihîze!

⁹Tevî ku sêrbaziyên te pir in Û remildariyên te hêzdar in jî, Wê di rojekê de herdu, Windabûna zarokan û jinebîbûnê, Bi tevahî bi hev re bêne serê te.

¹⁰«Çimkî tu bi xerabiya xwe ewle bûyî. Te got: ‹Tu kes min nabîne.› Zanîn û şehrezabûna te tu şaş kirî. Loma te di dilê xwe de got: ‹Ez heme û ji xeynî min yeka din tuneye.›

¹¹Wê felaket were serê te Ku sêrbazên te nikarin dûr bixin. Wê bela bê serê te Ku tê nikaribî kefareta wê bidî. Wê helakbûna tu pê nizanî, Ji nişkave bê serê te.

¹²Niha berdewamiya remildarî Û sêrbaziyên xwe yên pir Ku te ji ciwaniya xwe ve Di ber de ked dane, bike. Belkî tu feyda wan bibînî, Belkî tu mirovan bitirsînî.

¹³Tu ji şîretên li te hatine kirin westiyayî. Bila stêrnas, kesên li ezmanan dinêrin Û kesên bi heyva nû tişta biqewime dibêjin, Niha rabin û te ji tiştên wê bên serê te rizgar bikin.

¹⁴«Va ye, ew wekî hûrika kayê ne, Wê agir wan bişewitîne. Wê nikaribin canê xwe ji destê pêtê rizgar bikin. Wê ev agir, ne ji bo xwegermkirinê teraf be Û ne jî ji bo li ber rûniştinê be.

¹⁵Kesên bi wan re ked didî Û ji zarokatiya xwe ve bi wan re didî û distînî, Wê ji bo te wiha bin. Hemû bi riya xwe ve herin. Kesê te rizgar bike wê tunebe.