Read Kurmanji Încîl Îşaya 52 Bible Online

Îşaya 52 - Kurmanji Încîl bible

Îşaya 52

¹Hişyar be! Hişyar be! Ya Siyon, hêza xwe li xwe bike! Ya Orşelîm, bajarê pîroz! Cilên xwe yên xweşik li xwe bike! Çimkî wê kesên nesinetkirî û qirêj Êdî nekevin hûndirê te.

²Toza li ser xwe daweşîne! Ya Orşelîma êsîr rabe[62]! Ya Siyona keça êsîr, Werîsên stûyê xwe derxe!

³Çimkî Xudan wiha dibêje: «Hûn hatine firotin, Lê hûnê bêpere bên rizgarkirin.»

⁴Reb Xudan wiha dibêje: «Dema berê gelê min daket Misrê Ku li wir xerîb bû, Aşûriyan jî bêsedem zor lê kir.»

⁵Lê niha gotina Xudan ev e: «Gelê min beredayî hilanîn û birin, Ma karê min li vir çi ye? Serwerên wan dikin zarîn, Hergav, tevahiya rojê navê min tê kêmkirin.» Ev e gotina Xudan.

⁶«Loma wê gelê min navê min nas bike. Loma wê rojê, wê bizanibe ku Yê ku dibêje: ‹Ez im,› va ye ez im.»

⁷Lingên mizgînvanê serê çiyê çiqas xweşik in Ku peyva aştiyê dide bihîstin, Mizgîniya qenciyê tîne Rizgariyê dide bihîstin Û ji Siyonê re dibêje: «Xwedayê te serweriyê dike!»

⁸Dengek tê! Nobedarên te dengê xwe bilind dikin, Bi hev re ji kêfan diqîrin. Çimkî vegera Xudan a Siyonê Bi çavên xwe dibînin!

⁹Ya wêraneyên Orşelîmê! Rabin, bi hev re ji kêfan biqîrin! Çimkî Xudan gelê xwe teselî kir, Orşelîmê rizgar kir.

¹⁰Xudan li ber çavê hemû miletan Zendê xwe yê pîroz hilda. Hemû mirovên binê dinyayê jî Wê rizgarkirina Xwedayê me bibînin.

¹¹Xwe bidin alî, xwe bidin alî! Ji wê derê derkevin Û dest nedin tiştê qirêj. Ya kesên ku taximên Xudan hildigirin! Ji nav wê derê derkevin Û xwe paqij bikin.

¹²Çimkî hûnê bi lez dernekevin, Hûnê bi rev neçin. Çimkî wê Xudan li pêşiya we here, Xwedayê Îsraîlê wê parêzvanê li pey we be.

¹³Va ye, wê xulamê min bi ser bikeve. Wê bê rakirin û bilindkirin, Wê gelek berz be.

¹⁴Çawa ku gelek kes ji bo wî şaş û metel man — Çimkî dîtina wî ji ya mirovan Û dirûvê wî ji yê mirovan ewqas xera bû —

¹⁵Wê gelek miletan şaş bike, Wê padîşah devê xwe ji ber wî bigirin. Çimkî wê ya ku ji wan re nehatiye gotin, bibînin Û ya ku nebihîstine, fêm bikin.