Read Kurmanji Încîl Îşaya 53 Bible Online

Îşaya 53 - Kurmanji Încîl bible

Îşaya 53

¹Kê baweriya xwe bi xebera me anî? Zendê Xudan ji kê re xuya bû?

²Ew li hizûra wî wekî şaxekî teze, Wekî koka li axa ziwa mezin bû. Ne bedewiya wî, ne jî rewnaqiya wî hebû Ku em lê binêrin. Di dîtina wî de tiştekî dilê me herê tunebû.

³Ji aliyê mirovan ve Ew hat kêmkirin û redkirin. Mirovê êş û eleman bû, Nexweşî nas kirin. Wekî zilamê ku mirov rûyê xwe jê vedişêrin, Ew hat kêmkirin. Me qedir neda wî.

⁴Bi rastî wî nexweşiyên me hildan, Êş û elemên me hilgirtin. Lê me hesab kir bela lê hatî, Em fikirîn ku Xwedê lê xist û eziyet kir.

⁵Lê ew ji ber neheqiyên me birîndar bû, Ji ber sûcên me perçiqî. Cezayê ji bo aştiya me, Bi ser wî de hat. Me bi birînên wî şifa dît.

⁶Me hemûyan wekî pêz riya xwe şaş kir, Her yekî ji me ber bi riya xwe ve çû. Lê Xudan sûcê me hemûyan xist stûyê wî.

⁷Tadayî û eziyet li wî hat kirin, Lê wî devê xwe venekir. Wekî berxekî diçe serjêkirinê, Wekî miya li ber hevringkirinê bêziman e, Wî devê xwe venekir.

⁸Ew bi xedarî hat dadbarkirin û birin, Di nifşê wî de kî fikirî Ku ji ber asîbûna gelê wî, Ew hat lêxistin û ji diyarê zindiyan avêtin.

⁹Tevî ku zordarî nekiriye Û hîle ji devê wî derneketiye, Gora wî li ba xeraban çêkirin, Di mirina xwe de li ba dewlemendan bû.

¹⁰Lê Xudan ji perçiqandina wî razî bû, Wî xwest ew were eziyetkirin. Çimkî gava canê wî bû pêşkêşiya berdêlê, Wê ziriyeta xwe bibîne û emrê wî dirêj be. Wê armanca Xudan di destê wî de pêşve here.

¹¹Wê ji keda ruhê xwe ronahiyê bibîne[63], Wê bi zanîna xwe têr bibe. Wê xulamê min ê rast, Gelekan bi zanîna xwe rast bike, Wê sûcên wan hilde ser xwe.

¹²Loma ezê bi mezinan re parekê bidim wî, Wê talên bi hêzdaran re parî bike. Çimkî wî canê xwe da ber mirinê Bi asiyan re hat hejmartin. Lê wî gunehê gelekan hilgirt Û ji bo wan asiyan lava kir.