Read Kurmanji Încîl Îşaya 54 Bible Online

Îşaya 54 - Kurmanji Încîl bible

Îşaya 54

¹«Ya jina bêber, ji kêfê biqîre! Ya ku zarok neanîn! Ya ku êşa zarokanînê nekişand, Bi şahî û bi dengê bilind biqîre! Çimkî wê kurên jina wêranbûyî, Ji kurên jina bi mêr pirtir bin» Xudan dibêje.

²«Cihê konê xwe fireh bike, Bila perdeyên konên te bên ragirtin. Xwe nede paş. Qeytanên xwe dirêj bike, Singên xwe qewîn bike.

³Çimkî tê bi milê çep û rastê ve berfireh bibî. Wê ziriyeta te miletan ji xwe re bike milk Û li bajarên ku wêran bûye, rûne.

⁴«Netirse, tê şermezar nebî! Şerm neke, tê rezîl nebî! Çimkî tê şerma ciwaniya xwe ji bîr bikî Û riswatiya jinebîbûna xwe careke din bi bîr neyinî.

⁵Çimkî mêrê te Afirînerê te ye, Navê wî Xudanê Karîndar e. Rizgarkarê te Pîrozê Îsraîl e, Ewê ku jê re tê gotin, Xwedayê hemû dinyayê.

⁶Çimkî Xudan, wekî jina berdayî û ruh bi êş, Wekî jina di ciwaniyê de zewicî lê hat redkirin, Gazî te kir» Xwedayê te dibêje.

⁷«Min ji bo demeke kurt tu berdayî, Lê ezê te bi rehma mezin bicivînim.

⁸Min bi lehiya xezebê Ji bo demeke kurt rûyê xwe ji te veşart, Lê ezê bi dilovaniya herheyî li te werim rehmê» Rizgarkarê te, Xudan dibêje.

⁹«Çimkî ji bo min, ev wekî tofana Nûh e. Çawa ku min sond xwar ku Wê tofana Nûh careke din li ser dinyayê ranebe, Min sond xwar ku Ezê li dijî te hêrs nebim, Ezê careke din erzê te neşikênim.

¹⁰Dibe ku çiya ji cihê xwe rabin Gir jî bihejin. Lê wê dilovaniya min ji ser te ranebe, Peymana min a aştiyê naheje» Xudanê ku li te were rehmê dibêje.

¹¹Bindesto! Bajarê ku bi ber bahozê ketiye Û teselî nedîtiye! Ezê bi xerca rengxweş kevirên te bi cih bikim, Ezê bi kevirên lapîs bingehên te deynim.

¹²Ezê bi aqûtan bircên te, Bi cewherên sor dergehên te Û bi kevirên hêja sûrên te çêkim.

¹³Wê hemû kurên te şagirtên Xudan bin, Wê aştiya kurên te gelek be.

¹⁴Tê bi edaletê xurt, Ji zordestiyê dûr bî. Tê qet netirsî. Wê helakbûn ji te dûr be, Wê qet nêzîkî te nebe.

¹⁵Va ye, heger kesekî êrîş dike hebe, Ew ne ji aliyê min e. Her kesê êrîşê te bike, Wê ji ber te têk here.

¹⁶«Va ye, hosteyê ku pif dike agirê komirê Û li gorî karê xwe çekan çêdike, min afirand. Kesê xera û helak dike jî min afirand.

¹⁷Tu çekeke ku li dijî te bê çêkirin Wê bi kêr neyê. Hemû zimanê ku di dadbarkirinê de li dijî te rabe Tê sûcdar derînî. Ev e mîrasa kesên ji Xudan re xulamiyê dikin, Rûspîtiya wan ji min e» Xudan dibêje.