Read Kurmanji Încîl Îşaya 56 Bible Online

Îşaya 56 - Kurmanji Încîl bible

Îşaya 56

¹Xudan wiha dibêje: «Heqiyê biparêzin û edaletê pêk bînin. Çimkî rizgarkirina min nêzîk e Û wê edaleta min xuya be.

²Xwezî bi wî mirovî Ku vê yekê pêk tîne û qewîn pê digire; Mirovê Roja Septê digire û mirdar nake, Mirovê xwe ji her cure xerabiyê dûr dixe.»

³Bila her xerîbê ku xwe bi Xudan ve girê daye, nebêje: «Wê Xudan esse min ji gelê xwe veqetîne.» Bila tu nemêr jî nebêje: «Ez dareke hişk im.»

⁴Çimkî Xudan wiha dibêje: «Ji nemêrên rojên min ên Septê digirin, Tiştên ku dilê min jê xweş in hildibijêrin Û qewîn bi peymana min digirin re

⁵Ezê wan li mala xwe, Di nav dîwarên xwe de, Nav û cihekî bîranînê bidim wan Ku ji ya kur û keçan çêtir in. Ezê navekî herheyî bidim wan ku nayê avêtin.

⁶«Ezê xerîbên ku xwe bi Xudan ve girê dabûn Ku jê re xizmetê bikin, Ji navê Xudan hez bikin Û bibin xulamên wî, Her xerîbê Roja Septê digire û mirdar nake, Û qewîn bi peymana min digire,

⁷Ezê wan bînim çiyayê xwe yê pîroz Û li mala xwe ya duayê şa bikim. Wê qurbanên wan ên şewitandinê û qurbanên wan ên din Li ser gorîgeha min bên qebûlkirin. Çimkî wê ji mala min re, Mala duayê bê gotin Ku ji bo hemû miletan e.»

⁸Gotina Rebê Xudan ê ku sirgûnên Îsraîl dicivîne ev e: «Ji xeynî kesên êdî civiyane, Ezê kesên din jî bi ser wan de bicivînim.»

⁹Ya hemû heywanên çolê, Ya hemû heywanên daristanan werin bixwin!

¹⁰Nobedarên Îsraîl kor in, Hemû nezan in. Wekî seyên bêziman in, Hemû nikarin biewtin. Radizin û xewnan dibînin Ji xewê hez dikin!

¹¹Rast e, ev se têrnexwar in, Nizanin têrbûn çi ye. Ew şivanên nezan in. Gava her kesî qezenc kir, Hemûyan da ser riya xwe.

¹²Ew dibêjin: «Werin em şerabê bînin Û têra xwe meyê vexwin. Wê sibê jî wekî îro be Û wê gelekî zêdetir be.»