Read Kurmanji Încîl Îşaya 6 Bible Online

Îşaya 6 - Kurmanji Încîl bible

Îşaya 6

¹Di sala mirina Ûzziyayê Padîşah de, min dît ku Reb li ser textekî berz û bilind rûniştibû. Daw û delingê xiftanê wî Perestgeh tije dikir.

²Li raserê wî Seraf[4] disekinîn. Şeş baskên her yekî ji wan hebûn. Bi diduyan rûyê xwe dinixamtin, bi diduyan lingên xwe dinixamtin û bi diduyan difiriyan.

³Yekî gazî yê din dikir û digot: «Xudanê Karîndar pîroz e, pîroz e, pîroz e. Rûmeta wî tevahiya dinyayê dadigire.»

⁴Ji dengê Serafan zirze û şêmikên deriyan hejiyan û mal bi dûyê tije bû.

⁵Min got: «Wey li min! Ez helak bûm. Çimkî ez zilamekî lêvqirêj im û di nav miletekî lêvqirêj de rûdinim. Lê çavê min Padîşah, Xudanê Karîndar dît.»

⁶Ji Serafan yek ber bi min ve firiya û di destê wî de sotikeke êgir hebû. Wî ew bi maşikê ji ser gorîgehê hildabû.

⁷Wî ew bi devê min ve danî û got: «Va ye, ev agir li lêvên te ket. Loma sûcê te hat rakirin û gunehê te hat bexişandin.»

⁸Piştre min dengê Reb bihîst. Wî digot: «Ez kê bişînim? Wê kî ji bo me here?» Min got: «Ez li vir im, min bişîne.»

⁹Wî got: «Rabe here û ji vî gelî re bêje: «‹Her bibihîzin, lê fêm nekin, Her bibînin, lê tênegihîjin.

¹⁰Dilê vî gelî hişk bike, Guhên wan giran bike Û çavên wan bigire Ku bi çavê xwe nebînin, Bi guhên xwe nebihîzin Û bi dilê xwe fêm nekin. Li min venegerin û şifayê nebînin.›»

¹¹Min pirsî û got: «Heta kengê ya Reb?» Wî got: «Heta bajar wêran û bêkes bimînin Û xanî bêmirov bimînin. Heta ax bi tevahî bibe wêran.

¹²Wê Xudan mirovan bavêje derên dûr, Deverên welêt ên vikîvala wê zêde bin.

¹³Li welêt ji dehan yek jî bimîne, Wê dîsa bê şewitandin. Wekî darberû û darmaziyan, gava qelibîn, Wê tenê qurmê wan bimîne. Ziriyeta pîroz wê wekî wî qurmî be.»