Read Kurmanji Încîl Îşaya 8 Bible Online

Îşaya 8 - Kurmanji Încîl bible

Îşaya 8

¹Xudan ji min re got: «Tu lewheyekî mezin hilde û li ser bi nivîseke hêsan, ‹Yê Mahêr-Şalal-Haş-Baz e›[7] binivîse.

²Ji bo vê jî bila Ûriyayê Kahin û Zekeriyayê kurê Yeverêkya ku dilsoz in bibin şahidên min.»

³Ez çûm ba jina xwe ya pêxember, ew bi zaro ma û kurekî anî. Xudan ji min re got: «Tu navê wî ‹Mahêr-Şalal-Haş-Baz› deyne.

⁴Çimkî hê ku zarok hînî gotina: ‹Dayê, bavo› nebûye, wê Padîşahê Aşûrê dewlemendiya Şamê û talanê Sameryayê ji xwe re bibe.»

⁵Xudan careke din ji min re got:

⁶«Ji bo ku vî gelî avên Şîloahê[8] yên bi aramî diherikin red kirin û bi kurê Resîn û Remalya şa dibin,

⁷ez Reb, ezê ava Çemê Firatê ya hêzdar, tevî hemû rûmeta wî, Padîşahê Aşûrê bi ser wan de bişînim. Wê bibe lehî û hemû coyê avê û keviyên wan di bin avê de bihêle.

⁸Wê av Cihûdayê di bin xwe de bihêle û di ser re bavêje. Wê heta qirikê bilind bibe, bi pêlên xwe yên berfireh seranserê welatê wî bigire, ya Îmmanûêl![9]»

⁹Gelno, helak bibin û bişikên! Kesên li welatên dûr, guhdar bin. Bila herkes tevdîra şer bike, lê hûnê bişikên. Belê, bila herkes tevdîra şer bike, lê hûnê bişikên.

¹⁰Hûn çiqas şêwra xwe bikin jî wê vala be. Heta dixwazin biaxivin, lê wê nebe. Çimkî Xwedê bi me re ye.

¹¹Gava Xudan ji min re wiha got, destê wî bi hêzdarî li ser min bû. Wî ez şiyar kirim ku ez di riya vî gelî de neçim û got:

¹²«Her tiştê ku ev gel jê re dibêje fen û fût e, Hûn nebêjin fen û fût e. Ji ya ku ew jê ditirsin netirsin Û jê nebizdin.

¹³«Tenê Xudanê Karîndar pîroz bikin. Ji wî bitirsin, bila xofa we ew be.

¹⁴Wê bibe Pîrozgeh, Lê wê ji bo herdu malên Îsraîl, Bibe kevirekî terpilînê û latekî likumandinê. Ji bo rûniştiyên Orşelîmê, Wê bibe xefik û dafik.

¹⁵Wê ji nav wan gelek kes biterpilin, Wê bikevin û bişikên. Wê bikevin dafikê û bên girtin.»

¹⁶Di nav şagirtên min de, Şahidiyê biparêze, Hînkirinê mor bike!

¹⁷Ezê li benda Xudan bimînim ku rûyê xwe ji Mala Aqûb veşartiye. Ezê hêviya xwe bi wî ve girê bidim.

¹⁸Ez û zarokên ku Xudan dane min, ji aliyê Xudanê Karîndar ê ku li Çiyayê Siyonê rûdine, nîşan û îşaretên li welatê Îsraîl in.

¹⁹Heger hinek ji we re bêjin: «Bi sêrbaz û ruhan bişêwirin ku dikin pistepist û mirînî», ji wan re bêjin: «Ma hewce nake ku miletek bi Xwedayê xwe bişêwire? Mirov qet ji bo zindiyan bi miriyan dişêwire?»

²⁰Vegerin şerîet û şahidiya Xudan! Kesên li gorî van nebêjin, wê li wan nebe şeveq.

²¹Wê birçî û neçar li nava welêt bigerin. Gava birçî bimînin wê hêrs bibin û naletê li Xwedê û padîşahên xwe bînin. Wê li jor

²²û li jêr binêrin. Wê ji taristan, tengasî û tarîtiya diltengiyê pêve tiştekî nebînin. Wê ber bi taristana kûr ve bêne ajotin.