Read Kurmanji Încîl Îşaya 9 Bible Online

Îşaya 9 - Kurmanji Încîl bible

Îşaya 9

¹Lê wê tarîtiya welatê dilteng nemîne. Berê Xwedê herêmên Zebûlon û Neftelî biçûk xist, lê di dema bê de, wê herêmên Riya Deryayê, aliyê din ê Çemê Ûrdunê, Celîleya miletan birûmet bike.

²Gelê ku di tariyê de diçe, Wê ronahiyeke mezin bibîne. Li ser kesên li welatê tariya kur rûdinin, Wê bibe ronahî.

³Te milet zêde kir, Tê şahiya wan jî mezin bikî. Di dema palehiyê de şahî çawa be, Di dema parîkirina talan de çoşbûn çawa be, Wê li pêş te jî wisa şa bibin.

⁴Çimkî çawa ku te di roja Mîdyanê de şikandin, Tê nîrê li ser wan dibe bar, Darê zilma li ser milê wan, Gopalê li ser pişta wan bişikênî.

⁵Her bota şervanê çûye şer, Cilên di xwînê de hatine gevizandin, Wê ji bo êgir bibin êm û bişewitin.

⁶Çimkî wê zarokek ji me re çêbe, Wê kurek ji me re bê dayîn. Wê serwerî li ser milê wî be. Wê navê wî Şêwirmendê Nûwazekar, Xwedayê Karîndar, Bavê Herheyiyê, Mîrê Aştiyê be.

⁷Ji bo textê Dawid û padîşahiya wî, Wê serwerî her ku biçe zêde bibe, Û wê dawiya aştiyê neyê. Wê serweriya xwe li ser heqî û edaletê ava bike. Wê ji niha û heta hetayê bidomîne. Wê Xîreta Xudanê Karîndar Vê yekê pêk bîne.

⁸Reb li dijî Aqûb peyvek şand. Wê ev peyv bi ser Îsraîlê de bikeve.

⁹Wê Efrayîmî û xelkê Sameryayê, Wê tevahiya gel bi vê yekê bizanibe. Lê wê bi pozbilindî Û bi quretiya dilê xwe bibêjin:

¹⁰«Kelpîç ketin, Lê emê bi kevirên qewirandî dîsa çêkin. Darhejîr hatin birîn, Lê emê darên sedrê bixin şûna wan.»

¹¹Wê Xudan li dijî wan, Neyarên Resîn[10] rake, Wê dijminên wî bi ser wî de sor bike.

¹²Wê ji rojhilat Aramiyan, Ji rojava Filîstiyan rake ser piyan. Wê devê xwe vekin û Îsraîlê bixwin. Dîsa jî wê hêrsa Xudan danekeve, Destê wî li dijî wan dirêjkirî bimîne.

¹³Gel li yê ku li wan xistiye venegeriya, Li Xudanê Karîndar negeriya.

¹⁴Wê Xudan ji Îsraîlê Ji serî û binî, Çiqlê dara xurmê û zilê, Di rojekê de bibire.

¹⁵Serî yê rîspî û rûmetdar e Û pêxemberê derewkar binî ye.

¹⁶Çimkî rêberên vî gelî ji rê derdixin, Û kesên li pey wan diçin, tên daqurtandin.

¹⁷Loma wê Reb bi xortan şa nebe Û li ber sêwî û jinebiyan nekeve. Çimkî hemû Xwedênenas û xerabkar in, Her dev ehmeqiyê dike. Dîsa jî wê hêrsa Xudan danekeve, Destê wî li dijî wan dirêjkirî bimîne.

¹⁸Çimkî xerabî wekî agir dişewitîne. Devî û diriyan dixwe û diqedîne, Daristanên gur pê dixe Û stûnên dûyê bilind dibin.

¹⁹Welat bi xezeba Xudanê Karîndar şewitî, Wê gel ji bo êgir bibe êm. Wê heyfa bira li bira neyê.

²⁰Wê ji vir ve xwarinê hilde, Lê birçî bimîne. Wê ji wir ve bixwe, Lê têr nebe. Wê goştê zarokên xwe jî bixwe.

²¹Wê Minaşşe Efrayîm, Efrayîm jî Minaşşe bixwe. Wê herdu bavêjin ser Cihûdayê. Lê dîsa jî wê hêrsa Xudan danekeve, Wê destê wî li dijî wan dirêjkirî bimîne.