Read Kurmanji Încîl Lêwiyî 1 Bible Online

Lêwiyî 1 - Kurmanji Încîl bible

Lêwiyî 1

¹Xudan gazî Mûsa kir û ji Konê Hevdîtinê[1] jê re got:

²«Bi gelê Îsraîl re bipeyive û ji wan re bêje: ‹Gava kesekî ji we pêşkêşiyeke heywanî pêşkêşî Xudan kir, divê hûn pez an dewarekî bînin.

³«‹Heger pêşkêşî qurbana şewitandinê ya dewêr be, divê nêr û bêqisûr be. Wê ew kes bîne ber deriyê Konê Hevdîtinê ku ew li hizûra Xwedê bê qebûlkirin.

⁴Wê destê xwe deyne ser serê qurbana şewitandinê û wê ji bo kefareta wî bê qebûlkirin.

⁵Wê conega li hizûra Xudan bê serjêkirin. Wê kurên Harûn ku kahin[2] in xwînê pêşkêş bikin. Wê bi her aliyên gorîgehê ve bireşînin ku li ber deriyê Konê Hevdîtinê ye.

⁶Wê qurbana şewitandinê bê gurandin û perçekirin.

⁷Wê kurên Harûnê Kahin li gorîgehê êgir pêxin û êzingan deynin ser.

⁸Wê kurên Harûn ku kahin in perçeyên wî, tevî ser û bezê wî yên hûndir, deynin ser êzingên agirê li ser gorîgehê.

⁹Lê wê ûr û rovî û pepikên wî bi avê bên şûştin. Paşê wê kahin wan hemûyan wekî qurbana şewitandinê li ser gorîgehê bişewitîne. Ev pêşkêşiya şewitandinê ye ku bêhna wê bi Xudan xweş tê.

¹⁰«‹Heger pêşkêşî qurbana şewitandinê ya pêz be, mî yan bizin, divê nêr û bêqisûr be.

¹¹Wê li bakurê gorîgehê, li hizûra Xudan bê serjêkirin. Wê kurên Harûn ku kahin in xwînê bi her aliyên gorîgehê ve bireşînin.

¹²Wê tevî serê wî û bezê wî yên hûndir bê perçekirin û wê kahin perçeyan li ser êzingên agirê li ser gorîgehê pêxistî ye bi cih bike.

¹³Lê wê ûr û rovî û pepikên wî bi avê bên şûştin. Paşê wê kahin hemûyan li ser gorîgehê bişewitîne û pêşkêş bike. Ev qurbana şewitandinê ye. Ev pêşkêşiya şewitandinê ye ku bêhna wê bi Xudan xweş tê.

¹⁴«‹An heger pêşkêşî qurbana şewitandinê ya ji bo Xudan ya ji çivîkan be, divê ji qumrî yan têjikên kevokan be.

¹⁵Wê kahin bîne gorîgehê, serê wê jêke û li ser gorîgehê bişewitîne. Wê xwîna wê bi ser kêleka gorîgehê ve bê herikandin.

¹⁶Wê kahin xursika çivîkê bi zîrça wê ve derxe û bavêje ser xweliya rojhilatê gorîgehê.

¹⁷Wê bi baskên çivîkê bigire ji hev cuda bike, lê wê bi tevahî ji hev veneqetîne. Paşê wê kahin li ser êzingên agirê li ser gorîgehê pêxistî ye bişewitîne. Ev qurbana şewitandinê ye. Ev pêşkêşiya şewitandinê ye ku bêhna wê bi Xudan xweş tê.