Read Kurmanji Încîl Lêwiyî 10 Bible Online

Lêwiyî 10 - Kurmanji Încîl bible

Lêwiyî 10

¹Nadav û Avîhû yên kurên Harûn bixûrdankên xwe hildan, agir xistin hûndirê wan û bixûr danîn ser. Wan li hizûra Xudan, agirekî xerîb ku wî li wan emir nekiriye pêşkêş kir.

²Agirek ji hizûra Xudan rabû û ew daqurtandin. Ew li hizûra Xudan mirin.

³Mûsa ji Harûn re got: «Xudan gotibû: ‹Bi saya kesên ku nêzîkî min dikin, Ezê pîroziya xwe nîşan bidim. Li ber çavê tevahiya gel, Ezê birûmet bim.›» Harûn bêdeng ma.

⁴Mûsa gazî Mîşaêl û Êlsafan ên kurên Ûzziyêlê apê Harûn kir û got: «Werin, birayên xwe ji ber Pîrozgehê hildin û derxin derveyî artêşgehê.»

⁵Ew hatin û wekî Mûsa got bi mîntanên li ser wan ew deranîn derveyî artêşgehê.

⁶Mûsa ji Harûn û ji kurên wî Êlazar û Îtamar re got: «Porên xwe neyinin xwarê, kincên xwe jî neçirînin. Yan na hûnê jî bimirin û wê Xudan li tevahiya civatê hêrs bibe. Lê bila mirovên we û tevahiya Mala Îsraîl, ji bo agirê Xudan bigirîn.

⁷Ji deriyê Konê Hevdîtinê veneqetin, an na hûnê bimirin. Çimkî rûnê kifşkirina Xudan li ser we ye.» Wan bi ya Mûsa kirin.

⁸Xudan ji Harûn re got:

⁹«Gava hûn ketin Konê Hevdîtinê, divê tu û kurên te mey û şerabê venexwin, an na hûnê bimirin. Wê ev di nav nifşên we de qanûneke herheyî be.

¹⁰Divê hûn tiştên pîroz û mirdar, tiştên paqij û qirêj ji hev veqetînin.

¹¹Divê hûn hemû qanûnên ku Xudan bi riya Mûsa ji gelê Îsraîl re got hînî wan bikin.»

¹²Mûsa ji Harûn û kurên wî yên saxmayî Êlazar û Îtamar re got: «Ji pêşkêşiya dexlê ya ji bo Xudan ya mayî hilînin û wî bê hevîrtirş li ber gorîgehê bixwin. Çimkî gelekî pîroz e.

¹³Hûnê wî li dereke pîroz bixwin, çimkî ev para te û kurên te ku ji pêşkêşiyên şewitandinê ya ji bo Xudan e. Çimkî wisa li min hatiye emirkirin.

¹⁴Singê pêşkêşiya hejandî û hêta ku hat pêşkêşkirin, tu û kur û keçên xwe dikarin li dereke paqij bixwin. Çimkî ev, ji qurbanên aştiyê yên ku Îsraîlî pêşkêş dikin para te û kurên te ye.

¹⁵Singê hejandinê û hêta ku hat pêşkêşkirin bi bezê pêşkêşiyên şewitandinê re bînin û wekî pêşkêşiyên hejandinê li hizûra Xudan bihejînin. Wekî Xudan emir kiriye, wê ev her û her para te û kurên te bin.»

¹⁶Mûsa li ser nêriyê pêşkêşiya paqijiyê pirs kir, çimkî ew hatibû şewitandin. Ew li Harûn û kurên wî yên saxmayî Êlazar û Îtamar hêrs bû û got:

¹⁷«We çima pêşkêşiya paqijiyê li dereke pîroz nexwar? Ew gelekî pîroz e. Ji bo ku hûn sûcên civatê rakin û li hizûra wî ji bo wan kefaretê bidin, Xudan ew dabû we.

¹⁸Va ye, xwîna nêrî nehatiye hûndirê pîrozgehê. Wekî min emir kir, divê hûn esse li dera pîroz bixwin.»

¹⁹Harûn ji Mûsa re got: «Va ye, wan îro pêşkêşiya xwe ya paqijiyê û qurbana şewitandinê pêşkêşî Xudan kirin û ev tişt jî hatin serê min. Heger min îro ji pêşkêşiya paqijiyê bixwara, gelo wê li çavê Xudan xweş bihata?»

²⁰Gava Mûsa ev bihîst, razî bû.