Read Kurmanji Încîl Lêwiyî 11 Bible Online

Lêwiyî 11 - Kurmanji Încîl bible

Lêwiyî 11

¹Xudan ji Mûsa û Harûn re got:

²«Ji gelê Îsraîl re bêjin: ‹Ji hemû heywanên li ser erdê, heywanên ku hûn dikarin bixwin ev in:

³Her heywanên ku dikayên û simên wan ên rastîn ango simên qelaştî hene.

⁴Lê di nav yên ku dikayên û simqelaştî ne de, heywanên ku hûnê goştê wan nexwin ev in: Deve dikayê lê simên wê neqelaştî ne, ev ji bo we qirêj e.

⁵Kurîbeşk dikayê lê simên wê neqelaştî ye, ji bo we qirêj e.

⁶Kîvroşk dikayê lê simên wê neqelaştî ye, ji bo we qirêj e.

⁷Simên berêz qelaştî û terikandî ye lê nakayê, ji bo we qirêj e.

⁸Hûnê goştê van heywanan nexwin, xwe bi termê wan jî nekin. Ev ji bo we qirêj in.

⁹«‹Ji hemû heywanên nav avê, hûnê bi tenê heywanên biperik û bipûlik bixwin, çi di çêm de, çi jî di deryayan de dijîn.

¹⁰Hemû jîndarên ku di çem û deryayan de dijîn — hem yên ku di koman de dijîn hem jî yên din — lê bêperik û bêpûlik in, ji bo we kirêt in

¹¹û ji bo we wê kirêt bibin. Hûnê goştê wan nexwin û wê mirarên wan jî ji bo we kirêt bên hesibandin.

¹²Hemû jîndarên di avan de dijîn û bêperik û bêpûlik in, ji bo we kirêt in.

¹³«‹Hûnê van çivîkan kirêt bihesibînin. Wê ev neyên xwarin, ew kirêt in: Eylo, teyrê bereta, sîsarkê reş,

¹⁴baz û her cureyên başokan,

¹⁵hemû cureyên qijakan,

¹⁶bûm, kundê kor, qaqlîbaz, her cureyên şahbazan,

¹⁷bûmê biçûk, masîgir, bûmê mezin,

¹⁸bûmê bixwêlî, bûmê beriyê, sîsark,

¹⁹legleg, her cureyên masîxuran, niqor û şevşevok.

²⁰«‹Her cure kêzikên biperik ên li ser çar lingên xwe diçin ji bo we kirêt in.

²¹Ji kêzikên biperik ên li ser çar lingên xwe diçin, hûn dikarin goştê hinekan ji wan ên ku ji bo xwe hil bavêjin, lingên xwe dixebitînin bixwin.

²²Ji nav wan, hûn dikarin van heywanan bixwin. Hûn dikarin hemû cureyên kuliyan; kuliyê biçûk, circirk, circirkê tebaxê bixwin.

²³Lê hemû kêzikên çarling û biperik ên din ji bo we kirêt in.

²⁴«‹Tiştên ku wê we qirêj bikin ev in. Her kesê ku xwe bi termê van heywanan bike, wê heta êvarê qirêj bê hesibandin.

²⁵Her kesê ku termê wan hilgire, wê kincên xwe bişo û heta êvarê qirêj bê hesibandin.

²⁶Her heywanê ku simê wî terikandî lê neqelaştî ne û nakayê, ji bo we qirêj e.

²⁷Ji nav heywanên ku bi çar piyan rêve diçin, her heywanê ku bi ser lepên xwe rêve diçe ji bo we qirêj e. Her kesê ku bi termê wan bûye, wê heta êvarê qirêj bimîne.

²⁸Her kesê ku termê wan hilgire, wê kincên xwe bişo û heta êvarê qirêj bimîne. Ev heywan ji bo we qirêj in.

²⁹«‹Ji heywanên ku li ser rûyê erdê dişêlin ev ji bo we qirêj in: Koremişk, mişk û hemû cureyên gumgumokan;

³⁰maregisk, mazîzerk, erbeq, homeq û bukalemûn.

³¹Ev heywanên ku bi erdê ve dişêlin ji bo we qirêj in û her kesê ku xwe bi termê wan bike wê heta êvarê qirêj bimîne.

³²Her tiştê ku bi termê van bikeve, wê qirêj bibe — hemû taximên darîn, kinc, çerm û çûx, her tiştê ku kar pê tê kirin — wê wan bixin nav avê û wê heta êvarê qirêj bimîne. Piştre wê paqij bibe.

³³Heger yekî ji van bikeve dîzikê, hemû tiştê tê de ye wê qirêj bibe û hûnê dîzikê bişikênin.

³⁴Hemû xwarina avî ya ji vê dîzikê û hemû vexwarina ji vê dîzikê wê qirêj bibe.

³⁵Termê ji van bikeve ser çi, wê wan qirêj bike. Heger termê wan bikeve ser tenûrê yan jî ser ocaxê, wê bên hilweşandin. Ew ji bo we qirêj in û wê qirêj bimînin.

³⁶Kanî û sarinca ku av tê de civiya ye paqij e. Lê yê ku bi termê wan bibe wê qirêj bibe.

³⁷Heger termê yekî ji van bikeve ser tovê tê reşandin, tov paqij e.

³⁸Lê tov di nav avê de be û termê wan bikeve ser, tov ji bo we qirêj e.

³⁹«‹Ji heywanên ku goştê wan tê xwarin yek bimire, kesê ku bi laşê wan bibe heta êvarê qirêj dimîne.

⁴⁰Kesê ku ji termê wan bixwe, wê kincên xwe bişo û heta êvarê qirêj bimîne. Kesê ku term hilgire wê kincên xwe bişo û heta êvarê qirêj bimîne.

⁴¹«‹Heywanên biçûk ên li ser rûyê erdê kirêt in û wê neyên xwarin.

⁴²Heywanên li ser zikê xwe dişêlin, an jî li ser çar lingên xwe yan zêdetir lingan diçin, hûnê yekê ji wan jî nexwin, çimkî kirêt in.

⁴³Hûn bi yekê ji wan jî xwe qirêj û kirêt nekin û nekevin rewşeke qirêj.

⁴⁴Çimkî Xwedayê we Xudan ez im. Xwe pîroz bikin û pîroz bibin. Çimkî ez pîroz im. Xwe bi tu heywanekî biçûk ên li ser rûyê erdê qirêj nekin.

⁴⁵Çimkî ji bo ez bibim Xwedayê we, Xudanê ku hûn ji welatê Misrê deranî ez im. Pîroz bin, çimkî ez pîroz im.

⁴⁶«‹Rê û rêbazên heywên, çivîk û hemû jîndarên ku di avan de dilivin û bi erdê ve dişêlin ev in

⁴⁷ku hûn ji yên qirêj û yên paqij û ji heywanê tê xwarin û nayê xwarin veqetînin.›»