Read Kurmanji Încîl Lêwiyî 13 Bible Online

Lêwiyî 13 - Kurmanji Încîl bible

Lêwiyî 13

²«Heger di çermê mirovekî de werim, qalik an dexmek hebe ku dikare nexweşiya çerman[8] be, wê wî bibin ba Harûnê Kahin an kurên wî yên kahin.

³Wê kahin li nexweşiya çerman binêre. Heger di dera nexweş de, mû spî bûbin û nexweşî kûr bûbe, ev nexweşiya çerman e. Kahinê ku lê binêre wê wî qirêj bihesibîne.

⁴Heger dexma çerm spî be, kûr nebûbe û mûyên li ser spî nebûbin, wê kahin kesê nexweş heft rojan li dereke girtî bihêle.

⁵Wê kahin di roja heftan de li kesê nexweş binêre. Heger li gorî wî nexweşî sekinî be û li ser çerm belav nebûbe, wê kahin heft rojên din jî wî li dereke girtî bihêle.

⁶Di roja heftan de wê careke din lê binêre. Heger nexweşî kêm bûbe û li ser çerm belav nebûbe, wê kesê nexweş paqij bihesibîne. Ev tenê qalik e. Wê nexweş kincên xwe bişo û paqij bê hesibandin.

⁷Lê heger piştî ku ew ji bo paqijbûnê xwe nîşanî kahin dide, qalik li ser çermê wî belav bibe, wê dîsa here ba kahin.

⁸Gava kahin binêre qalik li ser çerm belav bûye, wê wî qirêj bihesibîne. Ew bi nexweşiya çerman ketiye.

⁹«Heger kesek bi nexweşiya çerman bikeve, wê wî bibin ba kahin.

¹⁰Wê kahin lê binêre. Heger li ser çerm wermeke spî hebe, mûyên li ser spî bûbin û li dera werimî çerm sor bûbe,

¹¹ev nexweşiyeke çerman a mayînde ye. Wê kahin wî kesî qirêj bihesibîne lê li dera girtî nede hiştin. Çimkî ew êdî qirêj e.

¹²«Heger bi qasî ku kahin dibîne nexweşiya çerman ji serî heta binî tevahiya bedenê rapêçaye,

¹³wê kahin lê binêre û wî kesê ku nexweşî li tevahiya bedena wî belav bûye paqij bihesibîne. Çimkî êdî nexweşî spî bûye û paqij e.

¹⁴Lê heger çermê wî sor bûbe, ew qirêj e.

¹⁵Wê kahin li çermê sor binêre û nexweş qirêj bihesibîne. Çermê sor qirêj tê hesibandin û ev nexweşiya çerman e.

¹⁶Heger çermê sor biguhere û spî bibe, wê nexweş careke din here ba kahin.

¹⁷Wê kahin li nexweş binêre, heger nexweşî spî bûbe, wê kahin kesê nexweş paqij bihesibîne. Ew paqij e.

¹⁸«Heger kunêra li ser çerm baş bûbe

¹⁹lê paşê di cihê kunêrê de wermeke spî yan dexmeke sorikî-spî derkeve, wê ew nîşanî kahin bide.

²⁰Wê kahin lê binêre. Heger birîna xuyayî kûr bûbe û mûyên li ser birînê spî bûbin, wê ew kes qirêj bê hesibandin. Ev nexweşiyeke çerman e ku di kunêrê de derketiye.

²¹Lê gava kahin lê binêre, di nexweşiyê de mûyê spî tuneye, ew kûr nebûye û kêm bûye, wê kesê nexweş heft rojan li dereke girtî bihêle.

²²Heger nexweşî li çerm belav bûbe, wê kahin wî qirêj bihesibîne. Ev nexweşî ye.

²³Lê heger dexim sekinî be û belav nebûbe, ev qalikê kunêrê ye. Wê kahin wî paqij bihesibîne.

²⁴«Heger di çerm de şewat hebe û di vê derê de dexmeke sorikî-spî yan jî spî hebe,

²⁵wê kahin lê binêre. Heger mûyên ser dexmê spî û kûr bûbin, di wê şewatê de nexweşiya çerman heye. Wê kahin wî qirêj bihesibîne, çimkî ew bi nexweşiya çerman ketiye.

²⁶Lê heger kahin lê binêre û mûyên ser dexmê, spî û kûr nebûbe û kêm bûbe, wê kahin kesê nexweş heft rojan li dereke girtî bihêle.

²⁷Roja heftan wê kahin careke din wî bibîne. Heger dexim belav bûbe, wê wî qirêj bihesibîne. Ew nexweşiya çerman e.

²⁸Heger dexim li ser çerm sekinîbe, belav nebûbe û kêm bûbe, ev wermeke ji ber şewatê ye. Wê kahin wî paqij bihesibîne, çimkî ev qalikê şewatê ye.

²⁹«Heger di serî yan di erçena jin an mêrekî de nexweşî hebe,

³⁰wê kahin li nexweşiyê binêre. Heger kûr bûbe û mûyên li ser zer û zirav bûbin, wê kahin kesê nexweş qirêj bihesibîne. Ew gurî ye û ev nexweşiyeke çerman a serî yan erçenê ye.

³¹Gava kahin li nexweşiya gurîtiyê binêre, heger kûr nebûbe û mûyên reş li ser tunebe, wê nexweş heft rojan li dereke girtî bihêle.

³²Wê di roja heftan de careke din li nexweşiyê binêre. Heger gurîtî li ser çerm belav nebûbe, mûyê zer li ser tunebe û kûr nebûbe,

³³wê nexweş porê xwe kur bike lê dest nede cihên gurî. Wê kahin wî heft rojên din li dereke girtî bihêle.

³⁴Kahin di roja heftan de wê careke din li cihê gurîbûyî binêre. Heger gurîtî li çerm belav nebûbe û kûr nebûbe, wê kahin kesê nexweş paqij bihesibîne. Wê nexweş kincên xwe bişo û paqij bê hesibandin.

³⁵Lê piştî ew paqij hat dîtin, gurîtî li çerm belav bibe,

³⁶wê kahin dîsa lê binêre. Heger gurîtî belav bûbe, wê kahin li mûyekî zer negere. Nexweş qirêj e.

³⁷Lê heger li ber çavê kahin gurîtî sekinîbe û mûyê reş di ser de derketibe, wî çaxî nexweşî nemaye. Ew paqij e. Wê kahin wî paqij bihesibîne.

³⁸«Heger di çermê mêrekî an jinekê de dexmên spî hebin,

³⁹wê kahin lê binêre. Heger dexmên li ser çerm spîçolkî bin, ew tenê dexmên sor in û di çerm de derketine. Ew kes paqij e.

⁴⁰«Heger porê zilamekî weşiyabe, ev kes serût e û ew paqij e.

⁴¹Heger pêşiya serê wî weşiyabe, eniya wî vebûye. Ew paqij e.

⁴²Lê heger di rûtiya serê wî yan eniya wî de dexmên sorikî-spî derketibin, ev nexweşiya çerman e.

⁴³Wê kahin lê binêre. Heger werma nexweşiya li ser serê wî yê rût an li ser eniya wî ya rût sorikî-spî be û bişibe nexweşiya çerman,

⁴⁴naxwe ew bi nexweşiya çerman ketiye. Ew qirêj e. Wê kahin wî qirêj bihesibîne. Nexweşî li serê wî ketiye.

⁴⁵«Kesê bi vê nexweşiyê ketiye, wê herdem bi kincên qetiyayî bigere û porê wî hatibe xwarê. Wê devê xwe bigire û bêje: ‹Qirêj, ez qirêj im!›

⁴⁶Di hemû rojên ku nexweşî pê re ye de, wê qirêj bê hesibandin. Ew qirêj e, wê bi tena serê xwe, li derveyî artêşgehê bimîne.

⁴⁷«Heger di kincekî de kûfik bê dîtin; di kincekî hirî yan kitan de,

⁴⁸di tayê qumaşê hirî yan tayê qumaşê kitan de yan jî di çerm an tiştekî ku ji çerm hatiye çêkirin de

⁴⁹û ev kûfika ku di qumêş, çerm an tiştê ji çerm hatiye çêkirin de keskayî yan sorikî bê dîtin, ev nexweşiya kûfikê ye û divê nîşanî kahin bidin.

⁵⁰Wê kahin lê binêre û heft rojan li dereke girtî bihêle.

⁵¹Wê roja heftan careke din lê binêre. Heger kûfika di kinc, qumêş, çerm an tiştê çermîn de — karekî çerm çi be jî — belav bûbe, ev kûfikeke bêderman e. Wê qirêj bê hesibandin.

⁵²Kinc û qumaşên hirî, kitan û hemû tiştên çermîn ku tê de kûfik bê dîtin, wê ji aliyê kahin ve bên şewitandin. Çimkî ev kûfikeke bêderman e. Wê bê şewitandin.

⁵³«Heger kahin bibîne ev kûfika di kinc, qumêş an tiştekî çermîn de ye belav nebe,

⁵⁴wê emir bike ku ew tişta bi kûfik were şûştin û heft rojên din di dereke girtî de bê hiştin.

⁵⁵Tiştê bi kûfik, piştî ku hatin şûştin, wê kahin careke din lê binêre. Tevî ku kûfik nebûbe jî, heger rengê wî neguherîbe, wê qirêj bê hesibandin. Hûnê bişewitînin, çimkî yan ji hûndir ve yan jî ji derve ve kûfikê lê xistiye.

⁵⁶«Piştî tiştê bi kûfik hat şûştin, heger kahin li dera kûfikê lê xistiye binêre û bibîne kûfik kêm bûye, wê dera kûfikî ya di kinc, qumêş an çerm de biqetîne.

⁵⁷Heger di kinc, qumêş an tiştê çermîn de dîsa kûfik bê dîtin, wî çaxî kûfik belav dibe û hûnê wî tiştî bişewitînin.

⁵⁸Heger kûfik ji kinc, qumêş an tiştê çermîn ê ku hatiye şûştin derbas bûbe, wê dîsa bê şûştin û paqij bê hesibandin.»

⁵⁹Rê û rêbazên paqijî û qirêjiya li ser kinc û qumaşên hirî û kitan û hemû tiştên çermîn ên bi kûfik ev in.