Read Kurmanji Încîl Lêwiyî 14 Bible Online

Lêwiyî 14 - Kurmanji Încîl bible

Lêwiyî 14

²«Rê û rêbazên roja paqijbûna kesê nexweşiya çerman, ev in: Wê kesê nexweş bînin ba kahin.

³Wê kahin wî derxe derveyî artêşgehê û lê binêre. Heger nexweşî baş bûbe,

⁴wê kahin emir bike ku ji bo kesê tê paqijkirin du çivîkên paqij ên sax, dara sedrê, tayê sor û giyayê cehtirê bînin.

⁵Wê kahin emir bike ku yek ji çivîkan, di dîzikekê de, li ser ava kaniyê[9] bê serjêkirin.

⁶Wê çivîka sax, dara sedrê, tayê sor û giyayê cehtirê li xwîna çivîka li ser ava kaniyê hatiye serjêkirin bixe.

⁷Wê xwînê heft caran bireşîne ser kesê ku ji nexweşiya çerman tê paqijkirin û wî paqij bihesibîne. Wê çivîka sax jî berde çolê.

⁸Kesê tê paqijkirin wê kincên xwe bişo, hemû mûyên xwe kur bike û serê xwe bişo. Wê bi vî awayî paqij bê hesibandin. Êdî ew dikare bikeve artêşgehê lê wê heft rojan li derveyî kon bimîne.

⁹Wê di roja heftan de hemû por û mûyên xwe kûr bike. Wê porê xwe, rihê xwe, birûyên xwe û hemû mûyên di bedena xwe de kur bike. Wê kincên xwe bişo. Piştî bedena xwe bi avê şûşt, wê paqij bê hesibandin.

¹⁰«Wê di roja heştan de, du berxên nêr ên bêqisûr, berxeke mê ya bêqisûr a yek salî, pêşkêşiya dexlê ji dehan sisê efa[10] arvanê hûrê ku bi rûnê zeytê hatiye hevîrkirin û logek[11] rûnê zeytê bîne.

¹¹Kahinê karê paqijiyê dike wê kesê ku wê paqij be û tevahiya van tiştan li hizûra Xudan, li ber deriyê Konê Hevdîtinê bide sekinandin.

¹²Wê kahin berxekî hilde û wekî pêşkêşiya berdêlê berx û logekê rûnê zeytê pêşkêş bike û wan wekî pêşkêşiya hejandinê li hizûra Xudan bihejîne.

¹³Wê berx li Pîrozgehê, li dera ku pêşkêşiya paqijiyê û qurbana şewitandinê tê serjêkirin, serjê bike. Çimkî wekî pêşkêşiya paqijiyê, pêşkêşiya berdêlê jî ya kahin e. Ew gelekî pîroz e.

¹⁴Wê kahin hinek xwîna pêşkêşiya berdêlê hilde, li nermika guhê rastê û tiliyên mezin ên destê rastê û lingê wî yê rastê yên kesê tê paqijkirin bide.

¹⁵Wê kahin hinekî ji loga rûnê zeytê hilde û birijîne çenga destê xwe yê çepê.

¹⁶Wê tiliya destê xwe yê rastê di rûnê zeytê yê di destê wî ya çepê de ye bike û ber bi hizûra Xudan heft caran bireşîne.

¹⁷Wê kahin ji rûnê di destê wî de maye, bi ser nermika guhê rastê û tiliyên mezin ên destê rastê û lingê wî yê rastê yên kesê tê paqijkirin de û bi ser xwîna pêşkêşiya berdêlê de bireşîne.

¹⁸Wê rûnê zeytê yê di kefa destê wî de maye di serê kesê tê paqijkirin de bide. Wê li hizûra Xudan wî paqij bike ji bo wî kefaretê bide.

¹⁹Ji bo kefareta vî kesî, wê kahin pêşkêşiya paqijiyê pêşkêş bike. Paşê wê qurbana şewitandinê serjê bike.

²⁰Wê kahin qurbana şewitandinê û pêşkêşiya dexlê li gorîgehê pêşkêş bike. Bi vî awayî wê kahin ji bo wî kefaretê bide û wê paqij bibe.

²¹«Heger ew kes belengaz be û hêza wî têra dayîna wê neke, ji bo kefareta xwe wê wekî pêşkêşiya berdêlê ya hejandinê berxekî û wekî pêşkêşiya dexlê, ji dehyeka efaya[12] arvanê hûr û logek rûnê zeytê bîne.

²²Li gorî hêza wî wê du qumrî yan du têjikên kevokan jî bîne. Wê yek bibe pêşkêşiya paqijiyê, ya din jî bibe qurbana şewitandinê.

²³Ji bo paqijbûna xwe wê di roja heştan de van hemûyan bîne hizûra Xudan û li ber deriyê Konê Hevdîtinê bide kahin.

²⁴Wê kahin berxê pêşkêşiya berdêlê û logek rûnê zeytê hilde û wekî pêşkêşiya hejandinê li hizûra Xudan bihejîne.

²⁵Wê kahin berxê pêşkêşiya berdêlê serjê bike, ji xwîna wî hilde û bi ser nermika guhê rastê û tiliyên mezin ên destê rastê û lingê wî yê rastê yên kesê tê paqijkirin de bireşîne.

²⁶Wê hinek rûnê zeytê birijîne destê xwe yê çepê.

²⁷Wê tiliya destê xwe yê rastê di rûnê zeytê yê ku di destê wî yê çepê de ye bike û heft caran li hizûra Xudan bireşîne.

²⁸Wê kahin ji rûnê zeytê di destê wî de maye, bi ser nermika guhê rastê û tiliyên mezin ên destê rastê û lingê wî yê rastê yên kesê tê paqijkirin de û bi ser cihê xwîna pêşkêşiya berdêlê de bireşîne.

²⁹Wê rûnê zeytê yê di kefa destê wî de maye li serê kesê ku tê paqijkirin bixe û bi vî awayî li hizûra Xudan ji bo wî kefaretê bide.

³⁰Li gorî hêza wî, wê ji qumriyan an kevokan bîne.

³¹Wê yek wekî pêşkêşiya paqijiyê, ya din jî wekî qurbana şewitandinê, bi pêşkêşiya dexlê re pêşkêş bike. Wê kahin bi van ji bo zilamê tê paqijkirin li hizûra Xudan kefaretê bide.»

³²Rê û rêbazên paqijiya kesê nexweşiya çerman û hêza wî kêm e, ev in.

³³Xudan ji Mûsa û Harûn re got:

³⁴«Gava hûn herin welatê Kenanê yê ku ezê bi milkî bidim we, heger ez nexweşiya kûfikê bixim maleke li welatê we,

³⁵wê xweyê malê were ba kahin û bêje: ‹Min li mala xwe tiştekî wekî nexweşiyê dît.›

³⁶Hê beriya ku here li nexweşiyê binêre, wê kahin emir bike ku her tiştê di malê de derxin derve. Yan na, wê hemû tiştên li malê qirêj bên hesibandin. Paşê wê here li malê binêre.

³⁷Wê li nexweşiyê binêre. Heger nexweşî wekî dexmeyên kesk û sor li dîwarên malê be û di dîwêr de kûrbûyî xuya bike,

³⁸wê kahin ji malê derkeve û heft rojan malê girtî bihêle.

³⁹Wê roja heftan careke din were û lê binêre. Heger nexweşî li dîwaran belav bûbe,

⁴⁰wê kahin emir bike ku kevirên bi nexweşî ji dîwêr bikişînin û bavêjin dereke qirêj a derveyî bajêr.

⁴¹Wê mal ji hûndir ve seredor bide terişandin û xerca ku bi terişandinê derxistine bavêjin dereke qirêjî ya derveyî bajêr.

⁴²Wê kevirên din bînin bixin cihê wan keviran û xerceke din bînin û pê malê biseyînin.

⁴³«Heger piştî ku ew keviran derxin, malê bikolin û ji nû ve biseyînin, nexweşî careke din li malê derkeve,

⁴⁴wê kahin here lê binêre. Heger nexweşî li malê belav bûbe, ew nexweşiya kûfikê ya bêderman e û qirêj e.

⁴⁵Wê mal bê hilweşandin û kevir, kêran û hemû xerca wê bibin derveyî bajêr û bavêjin dereke qirêj.

⁴⁶Her kesê di dema mal hatiye girtin de bikeve malê, wê ew kes heta êvarê qirêj bê hesibandin.

⁴⁷Wê her kesê li malê razê yan xwarinê bixwe kincên xwe bişo.

⁴⁸«Heger kahin were, lê binêre û piştî ku mal hat seyandin, kûfik belav nebûbe, wê malê paqij bihesibîne. Wî çaxî nexweşiya kûfikê derbas bûye.

⁴⁹Ji bo paqijbûna malê, wê du çivîk, dara sedrê, tayê sor û giyayê cehtirê hilde.

⁵⁰Wê çivîkekê di dîzikekê de, li ber ava kaniyê[13] serjê bike.

⁵¹Wê dara sedrê, tayê sor, giyayê cehtirê û çivîka sax di xwîna çivîka hatiye serjêkirin û li nav avê bixe û heft caran bi ser malê de bireşîne.

⁵²Bi vî awayî wê kahin bi xwîna çivîkê, avê, çivîka sax, dara sedrê, giyayê cehtirê û tayê sor malê paqij bike.

⁵³Wê çivîka sax berde çolê, derveyî bajêr. Bi vî awayî wê ji bo malê kefaretê bide û wê mal paqij bibe.»

⁵⁴Rê û rêbazên her cure nexweşiyên çerman, gurîtî,

⁵⁵kûfika kincan û malan,

⁵⁶werim, qalikavêtin û dexman ev in.

⁵⁷Rê û rêbazên van nexweşiyan ev in. Bi van rê û rêbazan qirêjî û paqijî tên zanîn.