Read Kurmanji Încîl Lêwiyî 16 Bible Online

Lêwiyî 16 - Kurmanji Încîl bible

Lêwiyî 16

¹Piştî mirina herdu kurên Harûn ên ku nêzîkî Xudan bûbûn û miribûn,

²Xudan ji Mûsa re got: «Ji kekê xwe Harûn re bêje bila herdem neçe Cihê Herî Pîroz. Heger herdem pişt perdeyê û nêzîkî Derxûnê Bexişandinê[14] ku li ser Sindoqa Peymanê ye biçe, wê bimire. Çimkî ez li ser derxûn, di nav ewran de xuya dibim.

³Wê Harûn bi conegayekî pêşkêşiya paqijiyê û beranekî qurbana şewitandinê bikeve Cihê Herî Pîroz.

⁴Wê mîntanê kitan û derpiyên kitan li xwe bike, şûtikê kitan li nava xwe girê bide û şaşika kitan li serê xwe bipêçe. Ev kincên pîroz in. Wê bedena xwe bi avê bişo û wan li xwe bike.

⁵Wê civata Îsraîl, wekî pêşkêşiya paqijiyê du nêrî û wekî qurbana şewitandinê jî beranekî bide Harûn.

⁶«Wê Harûn wekî pêşkêşiya paqijiyê conegayek ji bo xwe pêşkêş bike. Wê ji bo xwe û mala xwe kefaretê bide.

⁷Piştre wê herdu nêriyan hilde û bibe hizûra Xudan, ber deriyê Konê Hevdîtinê.

⁸Wê Harûn pişkan li ser herduyan bavêje. Wê yek ji Xudan re, yek ji Ezazel[15] re bikeve.

⁹Wê Harûn nêriyê ku bi pişk ji Xudan re ketiye bîne û wekî pêşkêşiya paqijiyê pêşkêş bike.

¹⁰Lê wê nêriyê ku bi pişk para Ezazel ketiye, wekî kefareta ji bo gel, bi saxî pêşkêşî Xudan bike. Wê wî berde çolê û bişîne ba Ezazel.

¹¹«Wê Harûn ji bo xwe, wekî pêşkêşiya paqijiyê conegê bîne, ji bo xwe û mala xwe kefaretê bide. Wê wî wekî pêşkêşiya paqijiyê ji bo xwe serjê bike.

¹²Wê bixûrdankek ku bi perengên êgir ên ji ser gorîgehê tije kiriye û du destên ku bi bixûra bêhnxweş a ku hûr hatiye tijekirin, hilde derbasî pişt perdeyê bibe.

¹³Wê li hizûra Xudan bixûrê bavêje ser perengên êgir ku dûyê bixûrê, derxûnê ku li ser Sindoqa Şahidiyê[16] ye binixême. Yan na wê ew bimire.

¹⁴Wê ji xwîna conegê jî hilde û bi tiliya xwe bi ser derxûn ve û bi ser pêşiya derxûn ve bireşîne. Wê bi tiliya xwe heft caran li pêş derxûn xwînê bireşîne.

¹⁵«Piştre wê ji bo gel nêriyê pêşkêşiya paqijiyê serjê bike, xwîna wî bibe pişt perdeyê û çawa ku bi xwîna conegê kir, wê xwîna nêrî jî bi ser derxûn ve û bi pêşiya derxûn ve bireşîne.

¹⁶Bi vî awayî wê di ber qirêjiyên gelê Îsraîl de, di ber guneh û neheqiyên wan de, ji bo Cihê Herî Pîroz kefaretê bide. Wê ji bo Konê Hevdîtinê vê bike, çimkî di nava qirêjiyên mirovan de dimîne.

¹⁷Di dema Harûn diçe Cihê Herî Pîroz û ji bo xwe, mala xwe û tevahiya civaka Îsraîlê kefaretê dide de, heta ku ew derkeve derve, wê tu kes li Konê Hevdîtinê nemîne.

¹⁸Paşê wê Harûn derkeve here gorîgeha ku li hizûra Xudan e û ji bo wê kefaretê bide. Wê ji xwîna conegê û ji xwîna nêrî hilde û seredor di qiloçên gorîgehê de bide.

¹⁹Wê bi tiliya xwe xwînê heft caran bi ser gorîgehê ve bireşîne. Bi vî awayî wê gorîgehê ji qirêjiyên gelê Îsraîl paqij û pîroz bike.

²⁰«Piştî ku Harûn ji bo Cihê Herî Pîroz, Konê Hevdîtinê û gorîgehê kefaretdayînê qedand, wê nêrî bi saxî bîne.

²¹Wê Harûn herdu destên xwe deyne ser serê nêriyê sax û li hemû neheqî, serhildan û gunehên gelê Îsraîl mikur bê. Bi vî awayî wê van bide ser serê nêrî û bi zilamekî ku ji bo vî karî hatiye tayînkirin, nêrî berde çolê.

²²Wê nêrî, hemû sûcên gelê Îsraîl lê barkirî here diyarekî bêber. Wê zilam nêrî berde çolê.

²³«Piştre wê Harûn bikeve Konê Hevdîtinê. Gava bikeve Cihê Herî Pîroz, wê cilên kitan ên li xwe kirine derîne û li wir bihêle.

²⁴Wê li dereke pîroz bedena xwe bi avê bişo û kincên xwe li xwe bike. Piştre wê derkeve, qurbanên şewitandinê yên ku ji bo wî û ji bo gel pêşkêş bike û ji bo xwe û gel kefaretê bide.

²⁵Wê bezê pêşkêşiya paqijiyê li ser gorîgehê bişewitîne.

²⁶«Zilamê ku nêriyê ji bo Ezazel berdaye çolê, wê kincên xwe û bedena xwe bi avê bişo. Paşê dikare bikeve artêşgehê.

²⁷Wê conega û nêriyê ku wekî pêşkêşiya paqijiyê hatine pêşkêşkirin û xwîna wan ji bo kefaretdayînê anîne Cihê Herî Pîroz, derxin derveyî artêşgehê. Li wir wê rêx, eyar, goştên wan bê şewitandin.

²⁸Kesê ku ev şewitandin, wê kincên xwe û bedena xwe bişo û piştre dikare bikeve artêşgehê.

²⁹«Wê ev ji bo we qanûneke herheyî be. Hûnê di roja dehê meha heftan de, dev ji nefsa xwe berdin û wê tu kes Îsraîlî û xerîbên nav xwe nexebitîne.

³⁰Çimkî wê rojê, ji bo paqijbûna we, wê kefaret bê dayîn. Hûnê li hizûra Xudan ji hemû gunehên xwe paqij bibin.

³¹Ew roj, ji bo we Roja Septê ya bêhnvedanê ye. Hûnê dev ji nefsa xwe berdin. Ev qanûneke herheyî ye.

³²Di nifşên bê de, wê kahinê ku hatiye kifşkirin û di cihê bavê xwe de hatiye tayînkirin vê kefaretê bide. Wê kincên pîroz ên kitan li xwe bike.

³³Wê ji bo Cihê Herî Pîroz, pêşiya Konê Hevdîtinê û gorîgehê kefaretê bide. Wê ji bo kahinan û tevahiya gel kefaretê bide.

³⁴Wê ev ji bo we bibe qanûneke herheyî. Salê carekê, ji bo tevahiya gunehên gelê Îsraîl kefaret bê dayîn.» Harûn çawa ku Xudan li Mûsa emir kiriye, kir.