Read Kurmanji Încîl Lêwiyî 17 Bible Online

Lêwiyî 17 - Kurmanji Încîl bible

Lêwiyî 17

¹Xudan ji Mûsa re got:

²«Bi Harûn, kurên wî û bi tevahiya gelê Îsraîl re bipeyive û ji wan re bêje: ‹Ya ku Xudan emir kiriye ev e:

³Her kesê ji Mala Îsraîl ku li artêşgehê yan li derveyî artêşgehê, gayek, miyek an bizinekî serjê bike

⁴û wekî pêşkêşiya ji Xudan re neyine ber deriyê Konê Hevdîtinê, ber Meskenê Xudan, wê li ser wî zilamî xwîn bê hesibandin. Ji bo ku wî xwîn rijandiye, wê ji nav gelê xwe bê avêtin.

⁵Ev wisa ye ku wê gelê Îsraîl qurbanên ku li çolê serjê dikin, li hizûra Xudan bidin kahin, li ber deriyê Konê Hevdîtinê û wekî qurbana aştiyê pêşkêşî Xudan bikin.

⁶Wê kahin xwînê li ber deriyê Konê Hevdîtinê, bi ser gorîgeha Xudan ve bireşîne û bezê wê bişewitîne ku bêhna wê bi Xudan xweş tê.

⁷Bi vî awayî wê gelê Îsraîl êdî qurbanên xwe pêşkêşî nêriyên cinoyî[17] neke. Wê ev ji bo hemû nifşên wan qanûneke herheyî be.›

⁸«Ji wan re bêje: ‹Kesê ji Mala Îsraîl an ji xerîbên di nav wan de dijîn ku qurbana şewitandinê yan qurbaneke din pêşkêş bike

⁹û ji bo ku wê pêşkêşî Xudan bike, neyine ber deriyê Konê Hevdîtinê, wê ji nav gelê xwe bê avêtin.

¹⁰«‹Heger kesê ji Mala Îsraîl an ji xerîbên di nav wan de dijîn, çi cure xwînê daqurtîne, ezê bi hêrs berê xwe bidim wî û ji nav gel bavêjim.

¹¹Çimkî canê goşt di xwînê de ye û min ew da we ku hûn li ser gorîgehê ji bo canên xwe kefaret bidin. Ya ku ji bo can dibe kefaret, xwîn e.

¹²Loma min ji gelê Îsraîl re got: Wê tu kesek ji nav we xwînê nexwe û xerîbên di nav we de dijîn jî wê xwînê nexwin.

¹³«‹Kesê ji gelê Îsraîl û ji xerîbên ku di nav we de dijîn ku çivîk an heywanekî goştê wî tê xwarin nêçîr bike, wê xwîna wî birijîne û bi axê veşêre.

¹⁴Çimkî canê goşt di xwînê de ye. Loma min ji gelê Îsraîl re got: Hûnê xwîna tu goştî nexwin. Canê hemû goştî di xwîna wî de ye. Kesê xwînê bixwe, wê ji nav gelê xwe bê avêtin.

¹⁵«‹Çi welatî çi jî xerîb, hemû kesên ji we ku ji termê heywanê bi xwe miriye yan ji aliyê heywanekî çolê ve hatiye perçekirin bixwe, wê kincên xwe bişo, serê xwe bişo û heta êvarê qirêj bê hesibandin. Piştre wê paqij bibe.

¹⁶Heger ew kincên xwe û serê xwe neşo, wê bê cezakirin.›»