Read Kurmanji Încîl Lêwiyî 18 Bible Online

Lêwiyî 18 - Kurmanji Încîl bible

Lêwiyî 18

¹Xudan ji Mûsa re got:

²«Bi gelê Îsraîl re bipeyive û ji wan re bêje: ‹Ez Xwedayê we Xudan im.

³Hûnê li gorî kirinên welatê Misrê nekin ku hûn li wir diman. Hûnê li gorî kirinên welatê Kenanê jî nekin ku ez we dibim wir. Hûnê li gorî qanûnên wan tevnegerin.

⁴Li gorî rê û rêbazên min, hûnê tevbigerin. Hûnê qanûnên min pêk bînin. Ez Xwedayê we Xudan im.

⁵Hûnê qanûn û rêbazên min pêk bînin. Kesê ku van tiştan bike, wê bi saya wan bijî. Xudan ez im.

⁶«‹Wê tu kes ji bo ku tazîbûna merivekî xwe veke, nêzîk nebe. Ez Xudan im.

⁷Tê tazîbûna diya xwe venekî ku namûsa bavê te ye. Ew diya te ye. Tê tazîbûna wê venekî.

⁸Tê tazîbûna jina bavê xwe venekî. Ew namûsa bavê te ye.

⁹Tê tazîbûna xwişkên xwe yên ji diya xwe yan ji bavê xwe, çi heq çi jî dêmarî venekî.

¹⁰Tê tazîbûna keça keça xwe yan keça kurê xwe venekî. Çimkî namûsa wan namûsa te ye.

¹¹Tê tazîbûna keça jina bavê xwe venekî. Ew ji bavê te ye û xwişka te ye.

¹²Tê tazîbûna xwişka bavê xwe venekî. Ew namûsa bavê te ye.

¹³Tê tazîbûna xaltîka xwe venekî. Ew namûsa diya te ye.

¹⁴Tê tazîbûna jina apê xwe venekî, tê nêzîkî wê nebî. Ew jinapa te ye.

¹⁵Tê tazîbûna bûka xwe venekî. Ew jina kurê te ye. Tê tazîbûna wê venekî.

¹⁶Tê tazîbûna jina birayê xwe venekî. Ew namûsa birayê te ye.

¹⁷Tê tazîbûna jinekê û keça wê venekî. Tê tazîbûna keça keça wê an keça kurê wê jî venekî. Ew merivên wê ne. Nêzîkbûna wan riswatî ye.

¹⁸Heta ku jina te dijî, tê xwişka wê ji xwe re nestînî û tazîbûna wê venekî.

¹⁹«‹Tê xwe nêzîkî jina bi potan ketiye û qirêj bûye nekî. Tê tazîbûna wê venekî.

²⁰Tê bi jina cîranê xwe re ranezî. Tê xwe pê qirêj nekî.

²¹Ji bo ku ji Molekê[18] îlah re di êgir de bê qurbankirin, tê tu kes ji ziriyeta xwe nedî. Tê bi vî awayî navê Xwedê mirdar nekî. Xudan ez im.

²²Çawa ku mêrek bi jinekê re radize, tê bi mêrekî re ranezî. Ev kirêt e.

²³Tê bi heywanan re ranezî. Tê bi vî awayî xwe qirêj nekî. Wê tu jin jî nêzîkî heywanekî nebe ku pê re raze. Ev kirêtî ye.

²⁴«‹Bi van kirinan xwe qirêjî nekin. Çimkî miletên ku ezê ji ber we biqewirînim, xwe bi wan qirêj kirin.

²⁵Loma welat qirêj bû. Ji ber neheqiya wî, min welat ceza kir û welat jî rûniştiyên xwe vedireşe.

²⁶Welatî û xerîbên di nav we de dijîn, hûnê qanûn û rêbazên min pêk bînin û van tiştên kirêt nekin.

²⁷Çimkî tevahiya kesên beriya we li welêt diman, van tiştên kirêt kirin û welat qirêj bû.

²⁸Heger hûn jî welêt qirêj bikin, wê welat, çawa ku kesên beriya we vereşandin, we jî vereşîne.

²⁹«‹Her kesê ji van tiştên kirêt bike, wê ji nav gelê xwe bê avêtin.

³⁰Peywirên min pêk bînin û van tiştên kirêt nekin ku hûn qirêj nebin. Xwedayê we Xudan ez im.›»