Read Kurmanji Încîl Lêwiyî 2 Bible Online

Lêwiyî 2 - Kurmanji Încîl bible

Lêwiyî 2

¹«‹Gava kesek pêşkêşiya dexlê pêşkêşî Xudan bike, divê pêşkêşî ji arvanê hûr be. Wê rûn birijîne ser û guniyê deyne ser.

²Wê bîne ba kurên Harûn ku kahin in. Wê kahin jê kulmek arvanê hûr û rûnê zeytê bi tevahiya guniyê ve hilde û para diyarkirî ya li ser gorîgehê bişewitîne. Ev pêşkêşiya şewitandinê ye ku bêhna wê bi Xudan xweş tê.

³Ya ku ji ber pêşkêşiya dexlê dimîne, wê ji bo Harûn û kurên wî be. Ev di nav pêşkêşiyên şewitandinê yên Xudan de ya herî pîroz e.

⁴«‹Gava tu pêşkêşiya dexlê ya di tenûrê de hatiye pehtin pêşkêş dikî, divê ji arvanê hûr be. Divê ev kadeyê şikeva be ku bi rûnê zeytê hatiye hevîrkirin. Yan jî nanê sêlê yê şikeva be ku rûn li ser hatiye kirin.

⁵Heger pêşkêşiya te ya dexlê li ser sêlê hatibe pehtin, divê ji arvanê hûr ê bi rûnê zeytê hatiye hevîrkirin û bêhevîrtirş be.

⁶Tê wî perçe bikî û rûnê zeytê bi ser de birijînî. Ev pêşkêşiya dexlê ye.

⁷Heger pêşkêşiya te, dexla di taweyê de hatibe pehtin, divê ji arvanê hûr û rûnê zeytê be.

⁸Tê pêşkêşiya dexlê ya ku wiha hatiye çêkirin pêşkêşî Xudan bikî. Gava ew hat anîn, wê kahin bibe gorîgehê.

⁹Paşê wê kahin wekî para diyarkirî ji pêşkêşiya dexlê hilde û li ser gorîgehê bişewitîne. Ev pêşkêşiya şewitandinê ye ku bêhna wê bi Xudan xweş tê.

¹⁰Ya ku ji ber pêşkêşiya dexlê dimîne wê ji bo Harûn û kurên wî be. Ev di nav pêşkêşiyên şewitandinê yên Xudan de ya herî pîroz e.

¹¹«‹Divê tu car pêşkêşiya dexlê ya ku pêşkêşî Xudan tê kirin bi hevîrtirş nebe. Divê hûn di nav pêşkêşiya şewitandinê ya ji bo Xudan e de, qet hevîrtirş û hingiv neşewitînin.

¹²Hûnê wan wekî pêşkêşiya pêşî pêşkêşî Xudan bikin lê wê ji bo bêhna xweş wê daneyinin ser gorîgehê.

¹³«‹Tê hemû pêşkêşiyên xwe yên dexlê xwê bikî. Tê ji ser pêşkêşiya dexlê xwêya peymana Xwedayê xwe kêm nekî. Tê hemû pêşkêşiyan xwê bikî.

¹⁴«‹Heger tu ji berên te yên pêşî pêşkêşiya dexlê ya berê pêşî pêşkêşî Xudan dikî, tê simbilên genimê teze hatine jêkirin û li ser êgir hatine qelandin û kutan pêşkêş bikî.

¹⁵Tê rûnê zeytê û guniyê deynî ser. Ev pêşkêşiya dexlê ye.

¹⁶Wê kahin wekî para diyarkirî ji genimê kutayî û rûnê zeytê hilîne û bi tevahiya guniyê ve bişewitîne. Ev pêşkêşiyeke şewitandinê ya ji bo Xudan e.