Read Kurmanji Încîl Lêwiyî 20 Bible Online

Lêwiyî 20 - Kurmanji Încîl bible

Lêwiyî 20

¹Xudan ji Mûsa re got:

²«Ji gelê Îsraîl re bêje: ‹Kesekî ji gelê Îsraîl an ji xerîbên di nav we de dijîn ku zarokekî xwe pêşkêşî Molekê îlah[19] bike, wê esse bê kuştin. Wê gelê welêt wî kevir bike.

³Ezê bi hêrs berê xwe bidim wî û ji nav gel bavêjim. Çimkî wî ji ziriyeta xwe pêşkêşî Molekê îlah kir û bi vî awayî Pîrozgeha min qirêj kir û navê min ê pîroz mirdar kir.

⁴Heger gava ew zarokê xwe pêşkêşî Molek bike, gelê welêt jê re çavên xwe bigire û wî nekuje,

⁵ezê bi hêrs berê xwe bidim wî kesî û malbata wî. Ezê wî û her kesê li pey wî bi Molek bêbextî bike ji nav gelê xwe bavêjim.

⁶«‹Her kesê ku berê xwe bide cinbazan û kesê bi ruhan dişêwire, bi vî awayî bêbextî dike. Ezê bi hêrs berê xwe bidim wan û ji nav gelê xwe bavêjim.

⁷Loma xwe pîroz bikin û pîroz bin. Çimkî ez Xwedayê we Xudan im.

⁸Hûnê qanûnên min bikin û pêk bînin. Xudanê ku hûn pîroz dikin ez im.

⁹«‹Her kesê ku naletê li diya xwe yan li bavê xwe bîne, wê esse bê kuştin. Ji ber ku wî naletê li diya xwe yan li bavê xwe aniye, xwîna wan li ser wan e.

¹⁰«‹Heger zilam bi jina kesekî din re zinayê bike, wê hem ew zilam, hem ew jin esse bên kuştin.

¹¹Kesê ku bi jina bavê xwe re razê, tazîbûna bavê xwe vekiriye. Loma wê herdu esse bên kuştin. Xwîna wan li ser wan e.

¹²Heger zilamek bi bûka xwe re razê, wê herdu esse bên kuştin. Wan kirêtî kiriye, xwîna wan li ser wan e.

¹³Heger zilamek, çawa ku bi jinekê re razê bi mêrekî re razê, wan tiştekî kirêt kiriye, wê ew esse bên kuştin. Xwîna wan li ser wan e.

¹⁴Heger zilamek hem bi jinekê û hem jî bi diya wê re bizewice, ev riswatî ye. Ji bo ku riswatiyên wiha di nav we de çênebin, wê her sê bên şewitandin û kuştin.

¹⁵Zilamek ku bi heywanekî re razê, wê esse bê kuştin. Hûnê heywên jî bikujin.

¹⁶Heger jinek, ji bo ku xwe bide heywanekî nêzîkî wî bibe, hûnê jinikê û heywên bikujin. Xwîna wan li ser wan e.

¹⁷«‹Heger zilamek xwişka xwe ya ji diya xwe yan ji bavê xwe, ji xwe re bistîne, tazîbûna wê bibîne û jinik jî tazîbûna wî bibîne, ev şerm e. Wê bi eşkereyî ji nav gel bên avêtin, çimkî wî tazîbûna xwişka xwe vekiriye. Wê sûcdar bê hesibandin.

¹⁸Heger zilamek bi jina bi potan ketiye re razê û tazîbûna wê veke, wî dera wê ya ku diherike vekiriye û jinikê jî dera xwe ya ku diherike vekiriye. Wê herdu ji nav gel bên avêtin.

¹⁹«‹Hûnê tazîbûna xaltîka xwe û meta xwe venekin, çimkî ew namûsa merivên we ne. Wê sûcdar bên hesibandin.

²⁰Kesê ku bi jina apê xwe re razê, wî tazîbûna apê xwe vekiriye. Wê herdu sûcdar bên hesibandin û bêyî ku bibin xweyî zarok bimirin.

²¹Heger zilamek jina birayê xwe bistîne, ev kirêtî ye. Wî tazîbûna birayê xwe vekiriye, wê nebe xweyî zarok.

²²«‹Hûnê hemû qanûnên min û hemû rê û rêbazên min bikin û pêk bînin ku ew welatê hûn lê bijîn ez we dibimê, we venereşe.

²³Hûnê di rê û rêbazên miletên ku ez ji pêş we berdidim wan de rêve neçin. Ji bo ku wan ev tişt kirin, min ji wan nefret kir.

²⁴Lê min ji we re got: Hûnê axa wan mîras bistînin. Ezê wî welatê ku şîr û hingiv jê diherike bi milkî bidim we. Xwedayê we Xudanê ku hûn ji miletên din veqetandin ez im.

²⁵«‹Hûnê heywanê qirêj ji heywanê paqij û çivîka qirêj ji çivîka paqij veqetînin. Hûnê xwe bi heywanan, bi çivîkan an bi afirîdên bi erdê ve dişêlin ve kirêt nekin ku min ji bo we bi qirêjî bi nav kirin.

²⁶Hûnê ji bo min pîroz bin, çimkî ez Xudanê pîroz im. Ji bo ku hûn bibin yên min, min hûn ji gelên din veqetandin.

²⁷«‹Çi zilam çi jî jina cinbaz an bi ruhan dişêwire, wê esse bê kuştin. Wê ew bên kevirkirin, xwîna wan li ser wan e.›»