Read Kurmanji Încîl Lêwiyî 22 Bible Online

Lêwiyî 22 - Kurmanji Încîl bible

Lêwiyî 22

¹Xudan ji Mûsa re got:

²«Ji Harûn û kurên wî re bêje: ‹Bila ji bo pêşkêşiyên pîroz ên ku gelê Îsraîl pêşkêşî min dikin baldar bin ku navê min ê pîroz mirdar nebe. Ez Xudan im.›

³Ji wan re bêje: ‹Heger kesekî ji ziriyeta we di nav hemû nifşên we de, gava qirêj dibe, nêzîkî pêşkêşiyên pîroz bibe ku gelê Îsraîl pêşkêşî min dike, wê ji hizûra min bê avêtin. Ez Xudan im.

⁴«‹Kesê ji ziriyeta Harûn ku bi nexweşiya çerman ketibe yan herikîna wî hebe, heta ku paqij nebe, wê ji pêşkêşiyên pîroz nexwe. Kesê bi tiştekî ku cesed pê bûye bibe û mirdar bûye, kesê menî jê diherike,

⁵kesê bi afirîdê ku bi erdê ve dişêle û mirovan mirdar kiriye bibe, qirêjbûna wî ji çi dibe bila be,

⁶her kesê ku bi tiştekî wiha dibe, wê heta êvarê qirêj bê hesibandin û heta ku bedena xwe neşo, wê ji pêşkêşiyên pîroz nexwe.

⁷Gava roj çû ava wê paqij bibe û bikaribe pêşkêşiyên pîroz bixwe. Çimkî ev xwarina wî ye.

⁸Wê ji laşê heywanên çolê yê ku mirî hatiye dîtin an ji aliyê heywanên din ve hatiye perçekirin nexwe û bi vî awayî xwe qirêj neke. Ez Xudan im.

⁹«‹Wê kahin peywirên min pêk bînin. An na wê sûcdar bên hesibandin û ji ber vê yekê bimirin. Xudanê ku ew pîroz kirine ez im.

¹⁰«‹Ji xeynî malbata kahin, wê tu kes ji pêşkêşiya pîroz nexwe, ne xerîbên li ba kahin dijîn û ne jî kesên li ba wan biheq dixebitin.

¹¹Lê koleyên ku kahin bi pere kirîne û kesên ku li mala wî hatine dinyayê dikarin jê bixwin.

¹²Keça kahin a ku bi kesekî ne kahin re zewiciye, wê ji pêşkêşiyên pîroz nexwe.

¹³Lê keça kahin a jinebî yan mêrê xwe berdayî ku zarokên wê çênebûne û ziviriye mala bavê xwe ya ku di ciwaniya xwe de lê dima, dikare ji nanê bavê xwe bixwe. Tu kesê ne kahin nikare jê bixwe.

¹⁴«‹Heger kesek bi nezanî ji tiştê pîroz bixwe, wê ji pêncan yekê wî deyne ser û bide kahin.

¹⁵Wê tu kes tiştên pîroz ên ku gelê Îsraîl pêşkêşî Xudan dikin mirdar neke.

¹⁶An na, wê ew kes sûcê xwarina van tiştên pîroz bîne ser kesên din jî. Çimkî Xudanê ku wan pîroz dike ez im.›»

¹⁷Xudan ji Mûsa re got:

¹⁸«Bi Harûn, kurên wî û tevahiya gelê Îsraîl re bipeyive û ji wan re bêje: ‹Kesê ji Mala Îsraîl an ji xerîbên di Îsraîlê de dijîn, gava nedreke sozdanê, pêşkêşiyeke şewitandinê ku pêşkêşiya dilxwaziyê ye, pêşkêşî Xudan bike,

¹⁹ji bo ku ji bo we bê qebûlkirin, pêşkêşiya dewar, mî yan bizin, divê nêr û bêqisûr be.

²⁰Hûnê tiştê biqisûr pêşkêş nekin, çimkî wê ji bo we neyê qebûlkirin.

²¹Her kesê bixwaze qurbana aştiyê wekî nedreke sozdanê an wekî pêşkêşiyeke dilxwaziyê pêşkêşî Xudan bike, ji pêz an dewêr, ji bo ku ew bê qebûlkirin divê bêqisûr be. Wê tu qisûr tê de tunebe.

²²Hûnê heywanekî kor, seqet, birîndar an birîna wî kêmgirtî, gurî yan bi qalik pêşkêşî Xudan nekin. Hûnê wekî pêşkêşiya şewitandinê, tu heywanekî wiha li ser gorîgehê pêşkêşî Xudan nekin.

²³Hûn dikarin ga yan pezê ku di beşeke ji bedena wî de zêdehî yan kêmahî heye, wekî pêşkêşiya dilxwaziyê pêşkêş bikin. Lê wê wekî pêşkêşiya sozdanê neyê qebûlkirin.

²⁴Hûnê heywanekî batîlêdayî, hincirandî, li hev badayî yan jêkirî pêşkêşî Xudan nekin. Hûnê li welatê xwe vê yekê nekin.

²⁵Hûnê heywanên wiha ji xerîban nestînin û wekî xwarin pêşkêşî Xwedayê xwe nekin. Çimkî ew xerab û biqisûr in, wê ji bo we neyên qebûlkirin.›»

²⁶Xudan ji Mûsa re got:

²⁷«Gava golik, berxik an karikek çêbe, wê heft rojan li ba maka xwe bimîne. Ji roja heştan û pêve ew dikare wekî pêşkêşiya şewitandinê ji Xudan re bê pêşkêşkirin û qebûlkirin.

²⁸Lê çi dewar, çi pez, hûnê heywanekî bi têjikê wî re di heman rojê de serjê nekin.

²⁹«Gava hûn pêşkêşiya spasdariyê pêşkêşî Xudan dikin, hûnê wê wisa pêşkêş bikin ku ji bo we bê qebûlkirin.

³⁰Wê goştê wê di heman rojê de bê xwarin. Hûnê nehêlin dotira rojê. Ez Xudan im.

³¹«Hûnê emrên min bikin û pêk bînin. Ez Xudan im.

³²Hûnê navê min ê pîroz mirdar nekin. Ezê di nav gelê Îsraîl de pîroz bêm zanîn. Ez Xudan im, ez we pîroz dikim.

³³Ji bo ku ez bibim Xwedayê we min hûn ji welatê Misrê deranîn. Xudan ez im.»