Read Kurmanji Încîl Lêwiyî 23 Bible Online

Lêwiyî 23 - Kurmanji Încîl bible

Lêwiyî 23

¹Xudan ji Mûsa re got:

²«Bi gelê Îsraîl re bipeyive û ji wan re bêje: ‹Cejnên min, cejnên Xudan ên ku hûnê wekî civînên pîroz diyar bikin, ev in.

³«‹Hûnê şeş rojan bixebitin. Lê roja heftan Sept e, roja bêhnvedanê û civîna pîroz e. Hûnê tu karekî nekin. Li hemû derên ku hûn dijîn, ev ji Xudan re Sept e.

⁴«‹Cejnên Xudan, civînên pîroz ên ku hûnê di rojên kifş de diyar bikin ev in:

⁵Ber êvara çardehê meha pêşî, wê bibe Cejna Derbasbûnê ya Xudan.

⁶Roja panzdehan a heman mehê jî Cejna Nanê Şikeva ya Xudan e. Hûnê heft rojan nanê şikeva bixwin.

⁷Hûnê di roja pêşî de civîneke pîroz çêkin. Hûnê karê xwe yê rojane nekin.

⁸Hûnê heft rojan pêşkêşiyên şewitandinê pêşkêşî Xudan bikin û wê di roja heftan de civîna pîroz be. Hûnê karên xwe yên rojane nekin.›»

⁹Xudan ji Mûsa re got:

¹⁰«Bi gelê Îsraîl re bipeyive û ji wan re bêje: ‹Gava hûn werin welatê ez didim we û berê wê hilînin, hûnê qevdekî ji berê pêşî bidin kahin.

¹¹Wê kahin roja piştî Septê wî li hizûra Xudan bihejîne ku hûn bên qebûlkirin.

¹²Di roja ku qevd hatiye hejandin de, hûnê wekî pêşkêşiya şewitandinê berxekî bêqisûr ê yeksalî pêşkêşî Xudan bikin.

¹³Hûnê bi berx re, wekî pêşkêşiya dexlê ji dehan duyê efaya[21] arvanê hûrê ku bi rûn hatiye hevîrkirin pêşkêşî Xudan bikin. Wê pêşkêşiya şewitandinê ew be ku bêhna wê bi Xudan xweş tê. Bi vê re jî hûnê wekî pêşkêşiya rijandinê çarîka hînekê şerabê pêşkêş bikin.

¹⁴Heta we pêşkêşiya Xwedayê xwe anî, tam heta wê rojê, hûnê nan, genimê qelandî û simbilên teze nexwin. Li her dera ku hûn dijîn, wê ev di nav nifşên we de qanûneke herheyî be.

¹⁵«‹Ji roja piştî Septê, ji roja ku we qevdê hejandinê bir pê ve hûnê destpê bikin û heft hefteyan bijmêrin.

¹⁶Heta roja piştî Septa heftan pêncî rojan bijmêrin û wê rojê pêşkêşiya dexlê ya nû pêşkêşî Xudan bikin.

¹⁷Ji dera hûn lê dijîn, hûnê wekî pêşkêşiya hejandinê du nanî bînin. Wê nan ji berê pêşî bin û ji dehan duyê efayeke arvanê hûr hatibin çêkirin. Wê ji bo Xudan bin û bi hevîrtirş hatibin pehtin.

¹⁸Hûnê bi nên re heft berxên yeksalî yên bêqisûr, conegayek û du beranan pêşkêş bikin. Wê ev bi pêşkêşiya dexlê û pêşkêşiya rijandinê re, pêşkêşiya şewitandinê ya ji Xudan re be. Wê ev pêşkêşiya şewitandinê bin ya ku bêhna wê bi Xudan xweş tê.

¹⁹Hûnê wekî pêşkêşiya paqijiyê nêriyekî, wekî qurbana aştiyê du berxên yeksalî pêşkêş bikin.

²⁰Wê kahin du berxan, bi nanê ku ji berê pêşî hatiye çêkirin re, li hizûra Xudan bihejîne. Ev pêşkêşiyên ku ji Xudan re pîroz in, ji kahin re ne.

²¹Wê ew roj wekî civîna pîroz bê diyarkirin û hûnê karê xwe yê rojane nekin. Li her dera ku hûn dijîn, wê ev di nav nifşên we de qanûneke herheyî be.

²²«‹Gava we berê diyarê xwe hilanî, hûnê kujên zeviyên xwe bi tevahî neçinin, simbilên ku dikevin erdê nedin hev. Hûnê wan ji bo bindest û xerîban bihêlin. Xwedayê we Xudan ez im.›»

²³Xudan ji Mûsa re got:

²⁴«Ji gelê Îsraîl re bêje: ‹Roja pêşî ya meha heftan roja bêhnvedanê ye, wê borî bê lêxistin, civîna pîroz û bîranînê[22] bê çêkirin.

²⁵Hûnê wê rojê karê xwe yê rojane nekin û pêşkêşiya şewitandinê pêşkêşî Xudan bikin.›»

²⁶Xudan ji Mûsa re got:

²⁷«Roja dehê meha heftan jî roja kefaretê ye. Hûnê civîneke pîroz çêkin û hûnê dev ji nefsa xwe berdin. Hûnê pêşkêşiya şewitandinê pêşkêşî Xudan bikin.

²⁸Hûnê tevahiya wê rojê tu karekî nekin. Çimkî ew roja kefaretê ye ku ji bo we li hizûra Xudan kefaret bê dayîn.

²⁹Kesê ku wê rojê dev ji nefsa xwe bernedabe, wê ji nav gelê xwe bê avêtin.

³⁰Kesê ku wê rojê karekî bike, ezê ji nav gel tune bikim.

³¹Hûnê tu karekî nekin. Li her dera ku hûn dijîn, wê ev di nav nifşên we de qanûneke herheyî be.

³²Wê ew roj ji bo we roja bêhnvedanê be û hûnê dev ji nefsa xwe berdin. Di roja nehê mehê de, hûnê ji êvarê heta êvara din Septa xwe bigirin.»

³³Xudan ji Mûsa re got:

³⁴«Ji gelê Îsraîl re bêje: ‹Di panzdehê meha heftan de Cejna Holikan a ji bo Xudan destpê dike û heft rojan dajo.

³⁵Wê di roja pêşî de civîna pîroz bê çêkirin û hûnê karê xwe yê rojane nekin.

³⁶Hûnê heft rojan pêşkêşiyên şewitandinê pêşkêşî Xudan bikin. Hûnê di roja heştan de civîneke pîroz çêkin û pêşkêşiyên şewitandinê pêşkêşî Xudan bikin. Ev civîna mezin e, hûnê karê xwe yê rojane nekin.

³⁷«‹Cejnên Xudan ên ku hûnê wekî civînên pîroz diyar bikin ev in. Hûnê van pêşkêşî Xudan bikin; qurbanên şewitandinê û qurbanên din, pêşkêşiyên dexlê û pêşkêşiya rijandinê. Hûnê her yekê di roja wê de pêşkêş bikin.

³⁸Ev ji Septên Xudan, ji diyariyan, ji hemû nedrên sozdanê û ji hemû pêşkêşiyên dilxwaziyê ên ku hûn didin Xudan, cuda ne.

³⁹«‹Herwiha di panzdehê meha heftan de, gava hûn berên welatê xwe berhev dikin, hûnê heft rojan cejna Xudan bikin. Wê roja pêşî û roja heştan rojên bêhnvedanê bin.

⁴⁰Hûnê roja pêşî fêkiyên xweş ên darên we, guliyên xurmeyan, guliyên darên ku pelên wan gur in û spîndarên geliyan bidin hev û li hizûra Xwedayê xwe Xudan heft rojan şa bibin.

⁴¹Hûnê vê her sal heft rojan wekî cejna Xudan pîroz bikin. Hûnê vê cejnê di meha heftan de, di nav nifşên we de wekî qanûneke herheyî pîroz bikin.

⁴²Hûnê heft rojan di holikan de rûnin. Wê hemû welatiyên Îsraîlî di holikan de rûnin

⁴³ku nifşên we bizanibin gava min gelê Îsraîl ji welatê Misrê deranî, min ew di holikan de da rûniştandin. Ez Xwedayê we Xudan im.›»

⁴⁴Bi vî awayî Mûsa cejnên Xudan ji gelê Îsraîl re diyar kirin.