Read Kurmanji Încîl Lêwiyî 24 Bible Online

Lêwiyî 24 - Kurmanji Încîl bible

Lêwiyî 24

¹Xudan ji Mûsa re got:

²«Li gelê Îsraîl emir bike, bila rûnê xas ê zeytê ji te re bîne ku ronahiya qendîlê hergav pêxistî bimîne.

³Wê Harûn ji êvarê heta serê sibê, li hizûra min qendîlê herdem pêxistî bihêle ku li Konê Hevdîtinê, li derveyî perdeya li ber Şahidiyê ye. Wê ev di nav nifşên we de qanûneke herheyî be.

⁴Wê bike ku qendîlên li ser şamdanka zêrê xas li hizûra Xudan hergav pêxistî bin.

⁵«Tê ji arvanê hûr duwanzdeh kiloran bipêjî. Wê her yek ji wan, ji dehan duyê efayekê[23] be.

⁶Hûnê wan li ser sifreyeke ji zêrê xas, li hizûra Xudan şeş bi şeş li ser hev rêz bikin.

⁷Tê guniya xas deynî ber rêzikên nên ku bibe para diyarkirî ya dikeve cihê nên. Ev pêşkêşiya şewitandinê ya ji bo Xudan e.

⁸Wê ev nan, her Roja Septê, hergav li hizûra Xudan bêne rêzkirin. Wê ji bo gelê Îsraîl bibe peymaneke herheyî.

⁹Wê ev para Harûn û kurên wî be û wê wî li dereke pîroz bixwin. Çimkî ev ji pêşkêşiyên şewitandinê yên ji bo Xudan e û gelekî pîroz e. Wê herdem para wan be.»

¹⁰Di nav gelê Îsraîl de zilamek hebû ku diya wî Îsraîlî, bavê wî jî Misrî bû. Li artêşgehê di navbera wî û yekî Îsraîlî de şer derket.

¹¹Kurê jinika Îsraîlî çêrî navê Xudan kir û nalet anî. Ew anîn ba Mûsa. Diya wî ji eşîra Dan, Şelomîta keça Dîvrî bû.

¹²Ew avêtin girtîgehê û li benda fermana Xudan man.

¹³Xudan ji Mûsa re got:

¹⁴«Kesê nalet aniye derxe derveyî artêşgehê û hemû kesên ew bihîstine bila destên xwe deynin ser serê wî û tevahiya civatê wî kevir bikin.

¹⁵Tê ji gelê Îsraîl re bêjî: ‹Her kesê ku naletê li Xwedê bîne, wê cezayê gunehê xwe bikişîne.

¹⁶Kesê çêrî navê Xudan bike wê esse bê kuştin. Wê tevahiya civatê esse wî kevir bike. Çi xerîb, çi welatî, her kesê çêrî navê Xudan bike wê bê kuştin.

¹⁷«‹Kesê zilamekî bikuje, wê esse bê kuştin.

¹⁸Kesê heywanê yekî din bikuje, wê ji bo wî bergîdanê bide û aştiyê bike, di ber jiyanê de jiyan.

¹⁹Kesê zirarê bide cîranê xwe, wê eynî tişt bi wî jî bê kirin,

²⁰di ber şikandinê de şikandin, di ber çav de çav, di ber diran de diran. Çi kes bi çi awayî zirar kiribe, wê eynî tişt bi wî jî bê kirin.

²¹Kesê heywanekî kuştibe wê bergîdana wî bide lê kesê mirovekî kuştiye wê bê kuştin.

²²Çi xerîb, çi welatî, wê ji bo we rê û rêbaz yek be. Çimkî ez Xwedayê we Xudan im.›»

²³Mûsa ev ji gelê Îsraîl re got. Wan kesê nalet aniye derxistin derveyî artêşgehê, kevir kirin û kuştin. Gelê Îsraîl çawa ku Xudan li Mûsa emir kiriye, kir.