Read Kurmanji Încîl Lêwiyî 25 Bible Online

Lêwiyî 25 - Kurmanji Încîl bible

Lêwiyî 25

¹Xudan li Çiyayê Sînayê bi Mûsa re peyivî û got:

²«Bi gelê Îsraîl re bipeyive û ji wan re bêje: ‹Gava hûn çûn welatê ez didim we, wê welat ji bo Xudan Septa bêhnvedanê bigire.

³Hûnê şeş salan zeviya xwe biçînin, rezê xwe şeş salan bikesixînin û berê xwe berhev bikin

⁴lê di sala heftan de, wê ji bo welêt Septa bi tevahî bêhnvedanê be. Wê Septa ji bo Xudan be, hûnê zeviya xwe neçinin û rezê xwe nekesixînin.

⁵Hûnê berhemê ji ber xwe çêbûye neçinin û tiriyê dêliya ku nehatiye kesaxtin nexin embaran. Wê ji bo welêt saleke bi tevahî bêhnvedanê be.

⁶Di Sala Septê de welat çi berî bide, wê ji bo we, xulam û xadimên we, kesên li ba we biheq dixebitin û xerîbên di nav we de dijîn, bibe xwarin.

⁷Wê ev ji bo heywanên we yên kedî û heywanên çolê jî bibe xwarin.

⁸«‹Hûnê heft Salên Septê bijmêrin ku heft carên demên heft salan bên jimartin. Wê çil û neh sal bikin.

⁹Di roja dehê meha heftan a wê salê de, di Roja Kefaretê de, wê li tevahiya welêt bi dengê bilind li boriyê bê xistin.

¹⁰Hûnê sala pênciyan pîroz bihesibînin û wê ji bo hemû rûniştiyên welêt azadî bê diyarkirin. Wê ew sal ji bo we bibe Sala Azadiyê. Wê herkes ji we vegere ser milkê xwe û ba malbata xwe.

¹¹Wê sala pênciyî ji bo we bibe Sala Azadiyê, hûnê wê salê çandiniyê nekin, berhemê ji ber xwe çêbûye hilneyinin û tiriyê ku dêliya wî nehatiye kesaxtin nedin hev.

¹²Çimkî Sala Azadiyê ji bo we pîroz e. Hûnê tenê ya ku li zeviyê ji ber xwe çêbûye bixwin.

¹³«‹Di Sala Azadiyê de wê herkes ji we vegere ser milkê xwe.

¹⁴Heger hûn tiştekî bifiroşin cîranê xwe yan tiştekî ji destê cîranê xwe bikirin, neheqiyê li hev nekin.

¹⁵Gava hûn tiştek ji cîranê xwe bikirin, hûnê tenê li gorî hejmara salên hilanînê bikirin ku ji Sala Azadiyê maye. Wê jî tenê li gorî berên salan bifiroşe we.

¹⁶Heger hejmara salan zêde be wê berdêl zêde be, heger hejmara salan kêm be wê berdêl bê daxistin. Çimkî ew hemû berên xwe yên salan difiroşe te.

¹⁷Hûnê neheqiyê li hev nekin lê hûnê ji Xwedayê xwe bitirsin. Çimkî ez Xwedayê we Xudan im.

¹⁸«‹Hûnê qanûnên min bikin. Miqate bin ku hûn rê û rêbazên min pêk bînin û li welêt di ewlehiyê de rûnin.

¹⁹Wê welat fêkiyê xwe bide û heta hûn têr bibin hûnê jê bixwin û di ewlehiyê de rûnin.

²⁰Dibe ku hûn bêjin: Heger emê neçînin û berê xwe nedin hev, emê di sala heftan de çi bixwin?

²¹Wê gavê ezê emir bikim ku di sala şeşan de bereketa min were ser we û wê welat berê sê salan bide.

²²Hûnê di sala heştan de axa xwe biçînin û heta sala nehan ji hatina berê wê bixwin. Heta berê nû, hûnê ji yê kevin bixwin.

²³«‹Wê tu perçeyê welêt tu caran heta hetayê neyê firotin, çimkî ya min e û hûn xerîb û mêvanên li ba min in.

²⁴Li vî welatê ku milkê we ye, hûnê destûrê bidin ku xweyê esil careke din bikire.

²⁵Heger kesek ji birayên we feqîr bibe û bixwaze ji axa xwe bifiroşe, wê merivê wî yê herî nêzîk here û axa ku wî firotibû bikire.

²⁶Gava kesek di ber wî de bikire tunebe, lê piştre hêza wî çêbe û têra standina wî bike,

²⁷wê salên di ser firotinê re derbas bûne jî bihesibîne û pereyê mayî bide kesê ku milkê xwe firotiyê û axa xwe jî jê bikire.

²⁸Lê heger hêza wî têra standina axa wî neke, axa ku firotiye wê heta Sala Azadiyê di destê kesê kiriye de bimîne. Di Sala Azadiyê de wê axê ji destê xwe derxe û kesê firotiye jî wê vegere ser axa xwe.

²⁹«‹Heger kesek xaniyekî li bajarekî bisûr bifiroşe, mafê wî heye ku heta salekê dîsa xaniyê xwe bikire. Mafê jinûvekirîna xênî salek e.

³⁰Heger di salekê de xênî dîsa neyê kirîn, xaniyê li bajarê sûran, wê heta hetayê di destê kesê kiriye de bimîne. Di Sala Azadiyê de jî wê xanî ji xweyê wê neyê kirîn.

³¹Lê xaniyên gundan ên ku bi sûran nehatine pêçan, wê wekî zeviyan bêne hesibandin. Xweyê esil dikare dîsa bikire û wê ew xanî di Sala Azadiyê de dîsa bêne kirîn.

³²«‹Lê li bajarên Lêwiyiyan, Lêwî hergav dikarin xaniyên ku wan firotine dîsa bikirin.

³³Heger Lêwî nikare xaniyê xwe yê li bajarekî dîsa bikire, wê xanî di Sala Azadiyê de lê bê vegerandin. Çimkî xaniyên li bajarên Lêwiyiyan, milkê wan ên li nav gelê Îsraîl in.

³⁴Lê zeviyên ku li dora bajaran in nayên firotin, çimkî ew milkê wan ên herheyî ne.

³⁵«‹Heger birayekî te feqîr bibe û hewcedarî te bibe, tê jê re bibî alîkar. Wê li ba te wekî xerîb an mêvanekî bimîne.

³⁶Tê faîz an kar jê nestînî. Tê ji Xwedayê xwe bitirsî û destûr bidî ku ew li ba te bijî.

³⁷Tê bi faîz pereyê xwe nediyê û ji xwarina ku tu didî kar nekî.

³⁸Ez Xwedayê we Xudan im. Min hûn ji welatê Misrê deranîn ku ez welatê Kenanê bidim we û ji we re bibim Xwedê.

³⁹«‹Heger birayekî te li ba te feqîr bibe û xwe bifiroşe te, tê nekî ku wê wekî kole xulamiyê bike.

⁴⁰Wê li ba te wekî kesê bi destmiza xwe dixebite yan mêvanekî be. Wê heta Sala Azadiyê li ba te xulamiyê bike.

⁴¹Wê ew tevî zarokên wî, ji ba te rabin vegerin malbata xwe û milkê bav û kalên xwe.

⁴²Çimkî ew xulamên min in. Min ew ji welatê Misrê deranîn, wê bi koletî neyên firotin.

⁴³Tê ji wan re xweyiyekî zordar nebî. Tê ji Xwedayê xwe bitirsî.

⁴⁴«‹Xulam û xadimên we wê ji miletên derdora te bin. Xulam û xadimên we ji wan bin.

⁴⁵Herwiha hûn dikarin zarokên xerîbên di nav we de dijîn, li welatê we hatibin dinyayê an jî li dereke din çêbûbin, bikirin û bibin xweyî.

⁴⁶Hûn dikarin wan bi milkî ji zarokên xwe re jî bihêlin. Hûnê koleyên xwe ji nav wan bikirin. Lê hûn li birayên xwe, li gelê Îsraîl xweyitiyê û zordariyê nekin.

⁴⁷«‹Heger xerîb an mêvanekî di nav we de dijî dewlemend bibe û birayekî we feqîr bibe û xwe bifiroşe yê xerîb an mêvanekî ku di nav we de dijî yan jî zarokên yê xerîb,

⁴⁸piştî ku hatin firotin, berdêla wî dikare bê dayîn. Birayekî wî,

⁴⁹mamê wî, pismamê wî an merivekî wî yê nêzîk dikare di ber wî de berdêl bide. Heger ew bi xwe bikaribe, ew jî dikare ji bo azadiya xwe berdêl bide.

⁵⁰Wê bi kesê ku ew kiriye re, ji sala ku xwe firotiyê heta Sala Azadiyê hesab bike. Wê berdêla firotina wî, li gorî salan, wekî destmiza karkerê ku dixebite bê hesibandin.

⁵¹Heger hê gelek sal mabin, wê li gorî wan salan berdêla azadiya xwe, li gorî pereyê ku pê hatiye kirîn bide.

⁵²Heger heta Sala Azadiyê tenê çend sal mabin, wê li gorî wê bihesibîne û berdêla azadiya xwe bide.

⁵³Wê li ba xweyê xwe wekî karkerê ku salewext hatiye girtin bijî. Wê xweyê wî li ber çavê we bi zordarî xweyitiyê lê neke.

⁵⁴«‹Heger bi vî awayî ji bo azadiya wî berdêl neyê dayîn, wî çaxî ew û zarokên wî, wê di Sala Azadiyê de azad bibin.

⁵⁵Çimkî gelê Îsraîl xulamên min in. Ew xulamên min ên ku min ew ji welatê Misrê deranîn. Ez Xwedayê we Xudan im.