Read Kurmanji Încîl Lêwiyî 26 Bible Online

Lêwiyî 26 - Kurmanji Încîl bible

Lêwiyî 26

¹«‹Hûnê ji bo xwe pûtan çênekin, pûtên qewirandî yan kêlên kevirîn çik daneyinin û li welatê xwe kevirên qewartî çênekin ku hûn li ber wan herin ser çokan. Çimkî ez Xwedayê we Xudan im.

²Hûnê Septên min bigirin û ji Pîrozgeha min re hurmetê nîşan bidin. Xudan ez im.

³«‹Heger hûn li gorî qanûnên min rêve herin û emrên min bikin û pêk bînin,

⁴ezê baranê di wextê wê de bibarînim ku ax berê xwe û darên zeviyan fêkiyê xwe bidin.

⁵Wê hilanîna bênderên we heta çûna ser rezan û rakirina rezên we heta dema tovavêtinê bikişîne. Heta hûn têr bibin hûnê bixwin û bi ewlehî li welatê xwe rûnin.

⁶«‹Ezê aştiyê bidim welatê we. Gava hûn razin, hûnê netirsin. Ezê heywanên hov ji welatê we derînim û wê şûr di nav welatê we re derbas nebe.

⁷Hûnê dijminên xwe biqewirînin. Wê bi şûran li pêş we bikevin.

⁸Wê pênc kesên we sed kesan, sed kesên we deh hezar kesan biqewirîne. Wê dijminên we bi şûran li pêş we bikevin.

⁹Ezê berê xwe bidim we û we berdar û zêde bikim. Ezê peymana ku min bi we re kiriye berdewam bikim.

¹⁰Hûnê xwarina hilanînên xwe yên berê ya ku di embaran de ye bixwin. Piştre jî hûnê xwarina maye derxin ku ji xwarina nû re cih çêkin.

¹¹Ezê meskenê xwe li nav we ava bikim û we red nekim.

¹²Ezê di nav we de bim. Ezê bibim Xwedayê we, hûnê jî bibin gelê min.

¹³Ez Xwedayê we Xudan im ku min hûn ji welatê Misrê deranîn. Min darên nîrê li ser stûyê we şikandin û hûn bi serbilindî da meşandin.

¹⁴«‹Lê heger hûn li min guhdarî nekin û tevahiya emrên min pêk neyinin,

¹⁵heger hûn qanûnên min red bikin, nefretê ji rê û rêbazên min bikin, emrên min nekin û peymana min bişikênin,

¹⁶ezê we wiha ceza bikim: Ezê sawê bînim ser we. Ezê ta û werema ku ronahiya çavan ditefîne û canê we dixwe bînim ser we. Hûnê tovên xwe beredayî biçînin, çimkî wê dijminên we berê wan bixwin.

¹⁷Ezê bi hêrs berê xwe bidim we ku dijminên we, we têk bibin. Kesên ku ji we nefretê dikin wê li ser serê we bibin serwer. Kesek li pey we nekeve jî hûnê birevin.

¹⁸«‹Herwiha heger hûn piştî vê yekê jî guhdariya min nekin, ezê ji bo gunehên we cezayê we heft caran zêdetir bikim.

¹⁹Ezê quretiya hêza we bişikênim, ezmanên we bikim wekî hesin û axa we bikim wekî tûnc.

²⁰Wê hêza we beredayî here, wê welatê we ber, darên we fêkî nedin.

²¹«‹Heger hûn li dijî min rabin û guhdariya min nekin, ezê li gorî gunehên we, heft qat belayên din bînim serê we.

²²Ezê heywanên çolê bişînim nav we ku wê we bêzarok bikin û heywanên we bikujin. Hejmara we kêm bikin. Wê riyên we vala bimînin.

²³«‹Heger piştî van hemûyan jî hûn careke din guhdariya min nekin û li dijî min rabin,

²⁴ezê jî li dijî we derkevim û ji ber gunehên we, ezê we heft qat ceza bikim.

²⁵Ezê şûrê ku heyfa peymana hiltîne bişînim ser we. Heger birevin bajarên xwe jî, ezê kulê bixim nav we û hûnê bikevin destê dijmin.

²⁶Gava min nanê[24] we birî, wê deh jin nanê we bi tenê li firinekê bipêjin. Wê nanê we bi kişandin bi şûn de bidin we. Hûnê bixwin lê têr nebin.

²⁷«‹Heger hûn bi vê yekê jî guhdariya min nekin û dîsa li dijî min rabin,

²⁸ezê li dijî we derkevim û ji ber gunehên we, ezê we heft qat ceza bikim.

²⁹Hûnê goştê kurên xwe, goştê keçên xwe bixwin.

³⁰Ezê bilindciyên we yên perizînê tune bikim û gorîgehên we yên bixûrê bînim xwarê. Ezê cendekên we bavêjim ser cendekên pûtên we, ezê ji we nefretê bikim.

³¹Ezê bajarên we bikim wêrane. Ezê pîrozgehên we bikim xirbe û bêhnên we yên xweş bêhn nekim.

³²Ezê welatê we ewqas wêran bikim ku dijminên we yên lê rûnin wê şaş û metel bimînin.

³³Ezê we di nav miletên din de belav bikim û li dijî we şûrê xwe ji kalanê wê derxim. Wê welatê we bibe wêrane û bajarên we bibin xerabe.

³⁴Gava hûn li welatê dijminên xwe ne, wê welatê we di rojên wêranbûna xwe de salên xwe yên Septê qebûl bike. Wê gavê wê welat bêhna xwe vede û salên xwe yên Septê qebûl bike.

³⁵Di salên wêranbûnê de wê bêhna xwe vede ku di salên Septê yên hûn li ser bûn de wê bêhnvedanê nedît.

³⁶«‹Herwiha kesên ji we ku sax mane, ezê tirsê bixim dilê wan. Gava dengê pela bayê bibihîzin, çawa ku ji ber şûr direvin, wê birevin û bikevin. Lê tu kes li pey wan neketiye.

³⁷Bêyî ku kes li pey wan ketibe, çawa ku ji ber şûr direvin, wê bi ser hev de bikevin. Hêza we ya ku hûn li ber dijminên xwe bisekinin, wê tunebe.

³⁸Hûnê di nav miletan de tune bibin. Wê welatê dijmin we daqurtîne.

³⁹Kesên ji we ku sax mane, çi ji ber sûcên xwe, çi jî ji ber sûcên bav û kalên xwe, wê birizin.

⁴⁰«‹Lê heger li sûcên xwe û sûcên bav û kalên xwe mikur werin ku nedilsozî û dijminatiyê li min kirine

⁴¹û ji ber vê yekê min dijminatiyê kir û ew birin welatê dijminên wan, heger wê demê dilên xwe yên bêsinet nizim bikin[25] û bi cezayê gunehê ku kirine qebûl bikin,

⁴²wê gavê ezê peymana xwe ya ku min bi Aqûb re çêkiriye bi bîr bînim. Erê, ezê peymana ku min bi Îshaq û Îbrahîm re çêkiriye û welêt bi bîr bînim.

⁴³Gava ew cezayê sûcên xwe qebûl bikin û bikişînin, wê welat ji wan re bê terikandin. Di wê dema ku welat wêran dibe de, wê rihetiya salên xwe yên Septê bikin. Çimkî wan rê û rêbazên min red kirin û ji qanûnên min nefret kirin.

⁴⁴Bi ser vê yekê jî, gava ew li welatê dijminan in, ezê wan red nekim. Ezê nefretê nekim ku wan telef bikim û peymana xwe ya ku min bi wan re çêkiriye bişikênim. Çimkî ez Xwedayê wan Xudan im.

⁴⁵Lê ezê ji bo xatirê wan, peymana ku min bi bav û kalên wan ên min ew ji welatê Misrê deranîn re çêkiriye bi bîr bînim ku ezê Xwedayê wan bim. Xudan ez im.›»

⁴⁶Qanûn, şerîet û rê û rêbazên ku Xudan li Çiyayê Sînayê, bi riya Mûsa di navbera xwe û gelê Îsraîl de danîn, ev in.