Read Kurmanji Încîl Lêwiyî 27 Bible Online

Lêwiyî 27 - Kurmanji Încîl bible

Lêwiyî 27

¹Xudan ji Mûsa re got:

²«Bi gelê Îsraîl re bipeyive û ji wan re bêje: ‹Heger kesek soz bide ku kesekî din ji Xudan re kifş bike, wê li gorî berdêla te bê kifşkirin[26].

³Berdêla mêrekî ji bîst salî heta şêstan, li gorî şekelê Pîrozgehê[27], wê pêncî şekel be.

⁴Heger jin be, wê berdêla wê sî şekel be.

⁵Heger kes ji pênc salî heta bîst salî be, wê ji bo kur bîst şekel, ji bo keçikê deh şekel be.

⁶Heger ji yek mehî heta pênc salan be, wê berdêla kur pênc şekel zîv, berdêla keçikê jî sê şekel zîv be.

⁷Heger şêst salî yan mezintir be, wê berdêla mêr panzdeh şekel, berdêla jinê jî deh şekel be.

⁸Heger kesek feqîr û hêza wî têra berdêlê neke, wê li pêş kahin bisekine û wê kahin bi qasî hêza kesê ku ji Xudan re kifş kir, berdêlê diyar bike.

⁹«‹Heger kesek soz bide ku wê heywanekî pêşkêşî Xudan bike, wê ew heywan ji bo Xudan pîroz bê hesibandin.

¹⁰Kesê soz daye nikare wî biguherîne yan ji bo wî berdêlê bide. Wê xerab bi baş re, baş jî bi xerab re neguherîne. Heger ew bixwaze ji bo wî heywanekî din bide jî, wê herdu heywan pîroz bên hesibandin û pêşkêşkirin.

¹¹Heger li ser heywanekî qirêj ku ji Xudan re nayê pêşkêşkirin be, wê wî bibin pêşberî kahin.

¹²Heywan baş an xerab be, wê kahin berdêla wî bihesibîne û berdêlê diyar bike.

¹³Lê heger xweyî bixwaze heywên bi şûn ve bistîne, wê ji pêncan yekê berdêla ku kahin diyar kiriye jî deyne ser.

¹⁴«‹Heger kesek soz bide ku wê xaniyekî ji Xudan re kifş bike, wê kahin berdêla wî diyar bike. Çi baş çi xerab be, wê li gorî berdêla ku kahin diyar kiriye, be.

¹⁵Heger ew kes bixwaze xênî bi şûn de bistîne, wê ji pêncan yekê berdêla kahin diyar kiriye jî deyne ser.

¹⁶«‹Heger kesek soz bide ku zeviyeke ji milkê wî ji Xudan re kifş bike, wê berdêla wê li gorî tovê ku ew direşînin be. Wê ji bo omerek cehê[28] tov re, pêncî şekel bê hesibandin.

¹⁷Heger ew soza zeviyê di Sala Azadiyê de bide, wê berdêla ku hatiye hesibandin derbas bibe.

¹⁸Heger wî soza zeviyê piştî Sala Azadiyê dabe, wê kahin li gorî salên ku ji Sala Azadiyê re mane berdêla zeviyê bihesibîne. Wî çaxî wê berdêla zeviyê kêmtir be.

¹⁹Heger kesê ku soza zeviyê daye bixwaze wê bi şûn de bistîne, wê ji pêncan yekê berdêla ku kahin diyar kiriye jî deyne ser û wê zevî jê re bimîne.

²⁰Heger berdêla di ber zeviyê de nehatibe dayîn an wî zevî firotibe kesekî din, êdî ew bi şûn ve nayê standin.

²¹Lê gava zevî di Sala Azadiyê de tê kirîn, wê wekî zeviya hatiye veqetandin ji Xudan re pîroz be û bibe milkê kahin.

²²«‹Heger kesek soz bide ku zeviyeke ne milkê wî ye lê bi pere kiriye, ji Xudan re kifş bike,

²³wê kahin heta Sala Azadiyê berdêla zeviyê bihesibîne û berdêlê diyar bike. Wê ew kes berdêlê di wê rojê de bide. Ew berdêl ji Xudan re pîroz e.

²⁴Di Sala Azadiyê de, wê zevî li xweyê milkê ku jê hatiye kirîn vegere.

²⁵Hemû berdêlên ku tên hesibandin wê li gorî şekelê Pîrozgehê[29] bin. Bîst gera şekelek e.

²⁶«‹Her heywanê pêşî ku hatiye dinyayê, yê Xudan e. Tu kes nikare heywanekî pêşî ji Xudan re kifş bike. Çi dewar, çi pez, hemû êdî yê Xudan in.

²⁷Heger ji nav heywanên qirêj be, kesê ku dikire wê berdêla ku kahin diyar dike bide û ji pêncan yekan jî deyne ser. Heger berdêla wî neyê dayîn, wê li gorî berdêla ku kahin kifş kiriye bê firotin.

²⁸«‹Çi mirov, çi heywan û çi jî zeviya ku bi milkî maye, her tişta kesekî ku ji Xudan re hatiye veqetandin, wê neyê firotin û bi şûn de neyê standin. Çimkî her tişta veqetandî ji Xudan re gelekî pîroz e.

²⁹Wê tu berdêla kesê ku ji Xudan re hatiye veqetandin neyê dayîn. Wê esse bê kuştin.

³⁰«‹Tovê erdê be yan jî tovê fêkiyê darê be, hemû dehyeka[30] ji erdê ya Xudan e. Ew ji Xudan re pîroz e.

³¹Heger kesek bixwaze berdêla pareke dehyekên xwe bide ku bi şûn de bistîne, wê ji pêncan yekê wê deyne ser.

³²Hemû dehyekên pêz û dewêr, her heywanê dehan ê di hejmartinê de ku di bin darê şivan re derbas dibe, ji Xudan re pîroz e.

³³Wê xweyê pêz, ya baş û xerab, ji hev neqetîne û bi hev neguherîne. Heger biguherîne, wê herdu heywanên ku hatine guhertin jî pîroz bên hesibandin. Li ser vê yekê berdêlên wan wê neyên dayîn û wê bi şûn de neyên standin.›»

³⁴Emrên ku Xudan li Çiyayê Sînayê ji bo gelê Îsraîl dan ev in.