Read Kurmanji Încîl Lêwiyî 4 Bible Online

Lêwiyî 4 - Kurmanji Încîl bible

Lêwiyî 4

¹Xudan ji Mûsa re got:

²«Ji gelê Îsraîl re bêje: ‹Gava kesek bi nezanî guneh bike û tiştekî Xudan nekirina wî emir kiriye bike, wê wiha bike:

³Heger kahinê hatiye kifşkirin guneh bike û gel gunehkar bike, divê ji ber sûcê kiriye, wê wekî pêşkêşiya paqijiyê[3] conegayekî bêqisûr pêşkêşî Xudan bike.

⁴Wê conegê bîne ber deriyê Konê Hevdîtinê, li hizûra Xudan, destê xwe deyne ser serê conegê û li hizûra Xudan conegê serjê bike.

⁵Wê kahinê kifşkirî hinek xwîna conegê hilde û bîne Konê Hevdîtinê.

⁶Wê tiliya xwe di nav xwînê re bike, li ber perdeya Cihê Herî Pîroz, li hizûra Xudan heft caran bireşîne.

⁷Piştre wê kahin li Konê Hevdîtinê, li hizûra Xudan xwînê li qiloçên gorîgehê bixûra bêhnxweş bixe. Wê xwîna mayî ya conegê li erdê gorîgeha qurbana şewitandinê ya li ber deriyê Konê Hevdîtinê birijîne.

⁸Wê tevahiya bezê conegê hilîne ku wekî pêşkêşiya paqijiyê tê dayîn. Wê tevahiya bezê ûr û roviyan,

⁹herdu gurçik, bezê ser gurçikan û perdeya kezebê pêşkêş bike ku wê ji gurçikan veqetîne.

¹⁰Çawa ku ji gayê qurbana aştiyê hatiye veqetandin, wê kahin wan li ser gorîgeha qurbana şewitandinê bişewitîne.

¹¹Wê ser û piyên conegê, eyarê wî, hemû goştê wî, ûr û rovî û rêxa wî,

¹²derîne dereke paqij a derveyî artêşgehê, dera xwelî lê tê rêtin û li ser êzingan bişewitîne. Wê li dera xwelî lê tê rêtin bên şewitandin.

¹³«‹Heger tevahiya civata Îsraîl bi nezanî gunehekî ku Xudan nekirina wî emir kiriye, bêyî ku haya civatê jê hebe jî bike, wê sûcdar bê hesibandin.

¹⁴Gava gunehê wan hat bihîstin, wê civak wekî pêşkêşiya paqijiyê conegayekî pêşkêş bike û wî bînin ber deriyê Konê Hevdîtinê.

¹⁵Wê li hizûra Xudan, rîspiyên civatê destê xwe deynin ser serê conegê û wî li hizûra Xudan serjê bikin.

¹⁶Wê kahinê kifşkirî xwîna conegê bîne Konê Hevdîtinê.

¹⁷Wê kahin tiliya xwe di nav xwînê re bike û li hizûra Xudan, li ber perdeyê heft caran bireşîne.

¹⁸Wê xwînê li kon, li qiloçên gorîgeha hizûra Xudan bixe. Wê xwîna mayî ya conegê li erdê gorîgeha qurbana şewitandinê ya li ber deriyê Konê Hevdîtinê birijîne.

¹⁹Wê tevahiya bezê conegê hilîne û li ser gorîgehê bişewitîne.

²⁰Çawa ku wî bi conegayê ku bi awayê pêşkêşiya paqijiyê hat dayîn kir, wê bi vî jî bike. Bi vî awayî wê kahin ji bo wan kefaretê bide û wê ew bên bexişandin.

²¹Wê conegê derîne derveyî artêşgehê û çawa ku bi conegayê pêşî kiribû wê wî jî bişewitîne. Ev pêşkêşiya paqijiyê ya ji bo civakê ye.

²²«‹Heger kesek ji serekan guneh bike û tiştekî ku Xwedayê wî Xudan nekirina wî emir kiriye bike, ew sûcdar tê hesibandin.

²³Gava haya wî ji gunehê kiriye hebe, wê nêriyekî bêqisûr pêşkêş bike.

²⁴Wê destê xwe deyne ser serê nêrî û li dera ku qurbanên şewitandinê tên serjêkirin, li hizûra Xudan wî serjê bike. Ev pêşkêşiya paqijiyê ye.

²⁵Wê kahin bi tiliya xwe ji pêşkêşiya paqijiyê hilîne û li qiloçên gorîgeha qurbana şewitandinê bixe. Wê xwîna mayî li erdê gorîgeha qurbana şewitandinê birijîne.

²⁶Wê tevahiya bezê wê, wekî bezê pêşkêşiyên qurbana aştiyê li ser gorîgehê bişewitîne. Wê kahin vê ji bo gunehên wî kefaretê bide û wê bê bexişandin.

²⁷«‹Heger kesekî ji gel, tiştekî ku Xudan nekirina wî emir kiriye bike û bi nezanî guneh bike, ew sûcdar tê hesibandin.

²⁸Gava haya wî ji gunehê kiriye hebe, ji bo gunehê ku kiriye, wê bizineke bêqisûr pêşkêş bike.

²⁹Wê destê xwe deyne ser serê pêşkêşiya paqijiyê û li dera ku qurbanên şewitandinê tên serjêkirin, serjê bike.

³⁰Wê kahin bi tiliya xwe ji xwîna pêşkêşiya paqijiyê hilîne û li qiloçên gorîgeha qurbana şewitandinê bixe. Wê xwîna mayî li erdê gorîgehê birijîne.

³¹Çawa ku bezê ser qurbana aştiyê hilanî, wê tevahiya bezê wê jê biqetîne. Wê kahin li ser gorîgehê bişewitîne ku bêhna wê bi Xudan xweş e. Bi vî awayî wê kahin ji bo wî kefaretê bide û wê ew kes bê bexişandin.

³²«‹Heger kesek wekî pêşkêşiya paqijiyê miyekê pêşkêş bike, divê mê û bêqisûr be.

³³Wê destê xwe deyne ser serê pêşkêşiya paqijiyê û wekî pêşkêşiya paqijiyê, li dera ku qurbanên şewitandinê tên serjêkirin, serjê bike.

³⁴Wê kahin bi tiliya xwe ji xwîna pêşkêşiya paqijiyê hilîne û li qiloçên gorîgeha qurbana şewitandinê bixe. Wê xwîna mayî li erdê gorîgeha qurbana şewitandinê birijîne.

³⁵Çawa ku bezê ser miya qurbana aştiyê hilanî, wê tevahiya bezê wê jê biqetîne. Wê kahin vê bezê li ser pêşkêşiyên şewitandinê, li ser gorîgehê bişewitîne. Bi vî awayî wê kahin ji bo gunehê wî kefaretê bide û wê ew kes bê bexişandin.