Read Kurmanji Încîl Lêwiyî 7 Bible Online

Lêwiyî 7 - Kurmanji Încîl bible

Lêwiyî 7

¹«‹Rê û rêbaza pêşkêşiya berdêlê ev e. Ev gelekî pîroz e.

²Wê pêşkêşiya berdêlê li dera ku qurbanên şewitandinê tên serjêkirin bê serjêkirin û xwîna wê bi her aliyên gorîgehê ve bê reşandin.

³Wê tevahiya bezê wê bên pêşkêşkirin; dûvê bibez, bezê ûr û roviyan,

⁴herdu gurçik, bezê ser gurçikan û perdeya kezeba ku wê bi gurçikan re veqetîne, pêşkêş bike.

⁵Wekî pêşkêşiya şewitandinê ya ji bo Xudan, wê kahin wan li ser gorîgehê bişewitîne. Ev pêşkêşiya berdêlê ye.

⁶Her zilamê ji ziriyeta kahinan e dikare ji vê bixwe. Divê li dereke pîroz bê xwarin, çimkî gelekî pîroz e.

⁷«‹Pêşkêşiya paqijiyê çi be, pêşkêşiya berdêlê jî ew e. Rê û rêbazên herduyan yek in. Wê para kahin be ku kefaretê dide.

⁸Çermê qurbana şewitandinê jî ji kahin re ye ku wê pêşkêş dike.

⁹Her pêşkêşiya dexlê ya ku di tenûrê de hatiye pehtin û di taweyê de yan li ser sêlê tê çêkirin, wê ji kahinê ku wê pêşkêş dike re be.

¹⁰Lê her pêşkêşiya dexlê ya rijî yan bi rûnê zeytê hatiye hevîrkirin ji hemû kurên Harûn re ye. Wê bi hevpariyê bê parîkirin.

¹¹«‹Rê û rêbaza qurbana aştiyê ya ku pêşkêşî Xudan e, ev e:

¹²Heger kesek pêşkêşî ji bo spaskirinê pêşkêş bike, wê bi vê qurbana şikirdariyê re kadeyê şikeva yê ku bi rûnê zeytê hatiye hevîrkirin, nanê sêlê yê şikeva ku rûn li ser hatiye kirin û kadeyên ji arvanê hûr yên ku bi rûnê zeytê hatiye hevîrkirin pêşkêş bike.

¹³Wê bi qurbana aştiyê ya ji bo spaskirinê re kilorên ku bi hevîrtirş hatine çêkirin jî pêşkêş bike.

¹⁴Wê ji her pêşkêşiyan nanek pêşkêş bike û wê ev pêşkêşî ji wî kahinî re be ku xwîna qurbana aştiyê li gorîgehê direşîne.

¹⁵Wê goştê qurbana şikirdariyê ya aştiyê, roja ku pêşkêşî tê dayîn bê xwarin. Wê heta serê sibê nehêle.

¹⁶«‹Heger qurbana tê pêşkêşkirin nedreke sozdayînê yan pêşkêşiya dilxwaziyê be, wê goştê wê roja ku hatiye pêşkêşkirin bê xwarin, yê mayî jî dotira rojê bê xwarin.

¹⁷Lê wê goştê qurbanê roja sisiyan bê şewitandin.

¹⁸Heger ji goştê qurbana aştiyê roja sisiyan bê xwarin, wê qebûl nebe û ji kesê ku pêşkêş kir re neyê hesibandin. Çimkî wê qirêj bê hesibandin û kesê ku jê bixwe jî wê sûcdar bê dîtin.

¹⁹«‹Goştê ku bi tiştekî qirêj bibe wê neyê xwarin, wê bê şewitandin. Goştên din jî wê hemû kesên paqij bikaribin jê bixwin.

²⁰Lê heger kesê ku qirêj tê hesibandin, ji goştê qurbana aştiyê ya ji bo Xudan bixwe, wê ji nav gelê xwe bê avêtin.

²¹Kesê ku destê xwe bi tiştekî qirêj bike — bi qirêjiya ku ji mirov tê, bi heywanekî qirêj an bi hemû tiştekî kirêt — û ji goştê qurbana aştiyê ya ji bo Xudan bixwe, wê ji nav gelê xwe bê avêtin.›»

²²Xudan ji Mûsa re got:

²³«Ji gelê Îsraîl re bêje: ‹Hûnê bezê ga, mî yan bizinan nexwin.

²⁴Bezê termê heywanê ku ji ber xwe miriye yan ji aliyê heywanên çolê ve hatiye perçekirin dikare ji bo karekî bê xebitandin lê hûnê esse nexwin.

²⁵Her kesê ku ji bezê heywanekî ku dibe pêşkêşiya şewitandinê ya ji bo Xudan bixwe, wê ji nav gelê xwe bê avêtin.

²⁶Hûnê xwînê esse nexwin. Li tu dera ku hûn lê dijîn, hûnê tu xwîna çivîk an heywanekî nexwin.

²⁷Her kesê xwînê daqurtîne, wê ji nav gelê xwe bê avêtin.›»

²⁸Xudan ji Mûsa re got:

²⁹«Ji gelê Îsraîl re bêje: ‹Yekî ku dixwaze qurbana aştiyê pêşkêşî Xudan bike, wê perçeyekî qurbana aştiyê pêşkêşî Xudan bike.

³⁰Wê pêşkêşiya xwe ya ku bi êgir ji Xudan re dide bi destê xwe bîne. Wê bezê heywên bi singê wê re bîne û ewê sing bilind bike û pêşkêşî Xudan bike.

³¹Wê kahin bez li ser gorîgehê bişewitîne, lê wê sing para Harûn û kurên wî be.

³²Hûnê hêta rastê yê qurbana xwe ya aştiyê wekî para wî bidin kahin.

³³Ji kurên Harûn her kî bez û xwîna pêşkêşiya aştiyê pêşkêş dike, wê hêta rastê para wî be.

³⁴Min ji qurbanên aştiyê yên ku Îsraîlî pêşkêş dikin, singê hejandinê û hêta ku wekî diyarî tê dayîn, wekî para Îsraîlê ya herheyî dan Harûnê Kahin û kurên wî.›»

³⁵Roja ku Harûn û kurên wî bi kahintî hatin tayînkirin, ji pêşkêşiyên ku ji Xudan re tên şewitandin ev para wan ket.

³⁶Roja ku Xudan ew kifş kirin, wî li gelê Îsraîl emir kir ku ev perçeyên hanê para wan a herheyî ye.

³⁷Rê û rêbazên qurbanên şewitandinê, pêşkêşiyên dexlê, pêşkêşiyên guneh, pêşkêşiyên sûc, pêşkêşiyên tayînkirî û pêşkêşiyên aştiyê ev in.

³⁸Xudan ev emrê hanê li Çiyayê Sînayê, çaxê ku ji gelê Îsraîl xwestibû li Beriya Sînayê pêşkêşiyan pêşkêşî wî bikin, li Mûsa kir.