Read Kurmanji Încîl Lêwiyî 8 Bible Online

Lêwiyî 8 - Kurmanji Încîl bible

Lêwiyî 8

¹Xudan ji Mûsa re got:

²«Harûn û kurên wî, kincên kahintiyê, rûnê kifşkirinê, conegayê pêşkêşiya paqijiyê, herdu beranan û selika nanê şikeva hilde

³û tevahiya civatê li ber deriyê Konê Hevdîtinê bicivîne.»

⁴Mûsa çawa ku Xudan lê emir kiriye, kir. Gava civat li ber deriyê Konê Hevdîtinê civand,

⁵Mûsa ji civatê re got: «Emrê Xudan ev e.»

⁶Mûsa Harûn û kurên wî anîn ba xwe ku wan bişo.

⁷Wî mîntan li Harûn kir, şûtik li pişta wî girê da, xiftan lê kir û êfod da ser. Bi şerîda êfodê ya ku bi hosteyî hatiye honandin girê da.

⁸Bersing danî ser û Ûrîm û Tûmmîm kir hûndirê bersing.

⁹Wî şaşik danî serê wî û lewha zêrîn, yanî taca pîroz da pêşiya şaşikê. Mûsa çawa ku Xudan lê emir kiriye, kir.

¹⁰Paşê Mûsa rûnê kifşkirinê hilda, kon û her tiştê hûndir rûn kir û ew pîroz kir.

¹¹Wî rûn heft caran bi ser gorîgehê de reşand û gorîgeh û hemû taximên gorîgehê — teştê tevî lingên wê — rûn kir û ew pîroz kir.

¹²Wî rûnê kifşkirinê bi serê Harûn de rijand. Bi vî awayî wî ew kifş û pîroz kir.

¹³Mûsa kurên Harûn jî anîn, mîntan li wan kirin. Şûtik li pişta wan girê dan û kum danîn ser serê wan. Mûsa çawa ku Xudan lê emir kiriye, kir.

¹⁴Paşê wî conegayê pêşkêşiya paqijiyê anî. Harûn û kurên wî destê xwe danîn ser serê conegê

¹⁵û Mûsa ew serjê kir. Ji bo ku gorîgehê paqij bike, wî bi tiliyên xwe xwîn li derdora qiloçên gorîgehê xist û xwîna mayî rijand erdê gorîgehê. Bi vî awayî wî gorîgeh paqij û pîroz kir.

¹⁶Tevahiya bezê ûr û roviyan, perdeya kezebê, herdu gurçik û bezê ser wan li ser gorîgehê şewitandin.

¹⁷Wî ji bermayiya conegê; eyar, goşt û rêxa wî, li derveyê artêşgehê şewitandin. Mûsa çawa ku Xudan lê emir kiriye, kir.

¹⁸Paşê wî beranê qurbana şewitandinê anî. Harûn û kurên xwe destê xwe danîn ser serê berên

¹⁹û Mûsa ew serjê kir. Xwîna wî bi her aliyên gorîgehê ve reşand.

²⁰Wî beran perçe kir û serê berên, bezê wî yên hûndir û perçeyên wî şewitandin.

²¹Wî ûr û rovî û pepikên wî bi avê şûştin û tevahiya berên li ser gorîgehê şewitand. Ev qurbana şewitandinê bû ku bêhna xweş bide. Ev pêşkêşiya şewitandinê ya ji bo Xudan bû. Mûsa çawa ku Xudan lê emir kiriye, kir.

²²Paşê beranê din, beranê tayînkirinê pêşkêş kir. Harûn û kurên wî destê xwe danîn ser serê berên

²³û Mûsa ew serjê kir. Wî hinekî xwîna wî li nermika guhê rastê yê Harûn, li tiliya wî ya mezin ya destê rastê û li tiliya wî ya mezin ya lingê rastê da.

²⁴Gava kurên Harûn anîn, wî xwîn li nermika guhên wan ê rastê, li tiliyên wan ên mezin ên destê rastê û lingê rastê da. Xwîna mayî bi her aliyên gorîgehê ve reşand.

²⁵Wî bezê heywên, dûvê bibez yê wî, bezê ûr û roviyên wî, perdeya kezebê, herdu gurçik, bezê gurçikan û hêta rastê hilda.

²⁶Wî ji selika nanê şikeva yê ku li hizûra Xudan e nanekî, kadeyê bi rûn û nanê sêlê hilda û danî ser bêz û hêta rastê.

²⁷Wî tev xistin nav kulmên Harûn û kurên wî. Wî ev li hizûra Xudan wekî pêşkêşiya hejandinê, hejandin.

²⁸Mûsa ew ji kulmên wan hilda û bi qurbana şewitandinê li ser gorîgehê şewitandin. Ev pêşkêşiya tayînkirinê bû ku bêhna xweş bide. Ev pêşkêşiya şewitandinê ya ji bo Xudan e.

²⁹Piştre Mûsa sing hilda û wekî pêşkêşiya hejandinê li hizûra Xudan hejand. Ev para Mûsa ya beranê pêşkêşiya tayînkirinê bû. Mûsa çawa ku Xudan lê emir kiriye, kir.

³⁰Mûsa rûnê kifşkirinê û ji xwîna ser gorîgehê hilda, bi kincên Harûn û yên kurên wî ve reşand. Bi vî awayî wî Harûn, kurên wî û kincên wan pîroz kirin.

³¹Mûsa ji Harûn û kurên wî re got: «Goşt li ber deriyê Konê Hevdîtinê bikelînin û wî li wê derê bi nanê ku di selikên pêşkêşiyên tayînkirinê de ye bixwin. Wekî min emir kir û got: ‹Wê Harûn û kurên wî bixwin.›

³²Ya ku ji ber goşt û nan dimîne bişewitînin.

³³Heft rojan ji deriyê Konê Hevdîtinê dernekevin, heta ku rojên we yên tayînkirinê temam dibin. Çimkî ji bo tayînkirina we, heft roj dixwaze.

³⁴Hemû tiştên ku îro hatin kirin, ji bo ku gunehên we bên bexişandin Xudan emir kir.

³⁵Hûnê li ber deriyê Konê Hevdîtinê heft rojan bi şev û roj bisekinin û peywirên Xudan pêk bînin ku hûn nemirin. Çimkî wiha li min hat emirkirin.»

³⁶Harûn û kurên wî hemû tiştên ku Xudan bi riya Mûsa emir kiriye bi cih anîn.