Read Kurmanji Încîl Lêwiyî 9 Bible Online

Lêwiyî 9 - Kurmanji Încîl bible

Lêwiyî 9

¹Di roja heştan de Mûsa gazî Harûn, kurên wî û rîspiyên Îsraîliyan kir.

²Wî ji Harûn re got: «Ji bo pêşkêşiya paqijiyê golikekî bêqisûr û ji bo qurbana şewitandinê beranekî bêqisûr hilîne û pêşkêşî Xudan bike.

³Ji gelê Îsraîl re bêje: ‹Ji bo pêşkêşiya paqijiyê nêriyekî û ji bo qurbana şewitandinê golikek û berxekî yeksalî yê bêqisûr bînin.

⁴Ji bo pêşkêşiya aştiyê ya ji bo Xudan ga û beranekî, tevî pêşkêşiyeke dexlê ya ku bi rûnê zeytê hatiye hevîrkirin bînin. Çimkî wê Xudan îro li we xuya bibe.›»

⁵Tiştên ku Mûsa emir kiribû anîn ber deriyê Konê Hevdîtinê. Tevahiya civatê nêzîk bû li hizûra Xudan sekinîn.

⁶Mûsa got: «Ya ku Xudan li we emir kiriye ev e ku rûmeta wî li we xuya bibe.»

⁷Wî ji Harûn re got: «Nêzîkî gorîgehê bibe, pêşkêşiya xwe ya paqijiyê û qurbana xwe ya şewitandinê pêşkêş bike û ji bo xwe û gel kefaretê bide. Wekî Xudan emir kiriye, pêşkêşiya gel jî pêşkêş bike û kefaretê bide.»

⁸Harûn nêzîkî gorîgehê bû û golikê pêşkêşiya paqijiyê yê ji bo xwe serjê kir.

⁹Kurên wî xwîna wî jê re anî. Harûn tiliya xwe xist nav xwînê û li qiloçên gorîgehê xist. Xwîna mayî jî rijand erdê gorîgehê.

¹⁰Lê çawa ku Xudan li Mûsa emir kiribû, wî bezê pêşkêşiya paqijiyê, gurçikên wî û perdeya kezebê li ser gorîgehê şewitandin.

¹¹Wî goşt û eyarê wî li derveyî artêşgehê şewitandin.

¹²Paşê wî qurbana şewitandinê serjê kir. Kurên Harûn xwînê jê re anî û wî jî xwîn bi her aliyên gorîgehê ve reşand.

¹³Wan hemû perçeyên pêşkêşiyê û serê wî jî da Harûn. Harûn ew li ser gorîgehê şewitandin.

¹⁴Wî ûr û rovî û pepikên wî şûştin û bi qurbana şewitandinê li ser gorîgehê şewitandin.

¹⁵Paşê Harûn pêşkêşiya gel pêşkêş kir. Wî nêriyê pêşkêşiya paqijiyê ya ji ber gel hilda, serjê kir û wekî ya pêşî, ev jî wekî pêşkêşiya paqijiyê pêşkêş kir.

¹⁶Paşê wî qurbana şewitandinê li gorî rê û rêbazan pêşkêş kir.

¹⁷Wî pêşkêşiya dexlê jî pêşkêş kir. Wî kulmekî jê hilda û bi qurbana şewitandinê ya ku her sibe tê pêşkêşkirin li ser gorîgehê şewitand.

¹⁸Wî ga û beranê qurbanên aştiyê ya ji ber gel serjê kirin. Kurên wî xwîna wan jê re anîn û wî jî xwîn bi her aliyên gorîgehê ve reşand.

¹⁹Kurên wî bezê gê û berên, dûvê bibez, bezê ûr û roviyan, herdu gurçik, bezê ser gurçikan perdeya kezebê,

²⁰danîn ser singan. Paşê Harûn bez li ser gorîgehê şewitand.

²¹Wekî Mûsa emir kiribû, wî sing û hêta rastê wekî pêşkêşiyên hejandinê li ber Xudan hejandin.

²²Harûn destên xwe ber bi gel ve hildan, ew pîroz û bereket kir. Piştre pêşkêşiya paqijiyê, qurbana şewitandinê û pêşkêşiya aştiyê pêşkêş kirin û berjêr bû.

²³Mûsa û Harûn ketin Konê Hevdîtinê. Gava derketin, wan gel pîroz û bereket kir. Wî çaxî rûmeta Xudan li tevahiya gel xuya bû.

²⁴Agirek ji hizûra Xudan rabû û bez û qurbana şewitandinê ya ku li ser gorîgehê ye daqurtand. Gava tevahiya gel ev dît, ji kêf qîriya û deverû çû erdê.