Read Kurmanji Încîl Daniyêl 1 Bible Online

Daniyêl 1 - Kurmanji Încîl bible

Daniyêl 1

¹Di sala sisiyan a padîşahiya Yehoyaqîmê Padîşahê Cihûdayê de, Nebûxadnessarê Padîşahê Babîlê bi ser Orşelîmê de girt û dor li bajêr pêça.

²Reb Yehoyaqîmê Padîşahê Cihûdayê û hin taximên li Mala Xudan kir destê Nebûxadnessar. Nebûxadnessar ew bi xwe re birin diyarê Şînarê[1] û danîn nav xizneya perestgeha îlahê xwe.

³Nebûxadnessarê Padîşah ferman da Aşpenazê berpirsiyarê karmendên qesrê ku hin Îsraîliyên ciwan ên ji malbata padîşah an jî hin esilzade bên bijartin û wan bînin qesrê.

⁴Divê ev xort bêqisûr û lihevhatî bin, di her mijarê de zana û zanyar bin, guhê wan li ser hînbûnê be û wê di xizmeta qesrê de bixebitin, ziman û nivîsandina Kildanî hîn bibin.

⁵Padîşah ji sifra xwe xwarin û şerab dida wan. Piştî perwerdekirina sê salan wê bibirana ba padîşah.

⁶Di nav xortên hilbijartî de ji Cihûdayê Daniyêl, Hananya, Mîşaêl û Ezarya hebûn.

⁷Aşpenaz navên nû li wan kir. Wî navê Daniyêl Bêlteşassar, navê Hananya Şadrak, navê Mîşaêl Mêşak û navê Ezarya Eved-Nego danî.

⁸Daniyêl di dilê xwe de biryar da ku xwe bi xwarin û şeraba xweş a padîşah qirêj neke. Wî ji Aşpenaz lava kir ku xwe qirêj neke.

⁹Xwedê kir ku berpirsiyarê karmendên qesrê bi kerem û dilovanî li Daniyêl binêre.

¹⁰Aşpenaz ji Daniyêl re got: «Ez ji xweyê xwe padîşah ditirsim. Wî xwarin û vexwarin daye we. Çima rûyê we li ber xortên din çilmisî be? Hûnê serê min bi padîşah re bixin belayê.»

¹¹Daniyêl ji karmendekî qesrê re ku Aşpenaz ew kiribû berpirsiyarê wî, Hananya, Mîşaêl û Ezarya re wiha got:

¹²«Lava dikim deh rojan xizmetkarên xwe biceribîne. Tenê pincar û avê bide me.

¹³Paşê rûyê me û rûyê wan kesan bide ber hev ku ji xwarinên padîşah xwarine. Li gorî reng û rûçikê me biryara xwe bide.»

¹⁴Karmend bi ya wan kir û ji bo deh rojan ew ceribandin.

¹⁵Piştî deh rojan, ew ji hemû kesên ku xwarinên padîşah xwaribûn çêtir û sihetir bûn.

¹⁶Li ser vê yekê karmend xwarin û şerab hilanîn û wekî berê pincar da wan.

¹⁷Xwedê di her mijarê de xwendin, zanabûn, aqil û şehrezayî da wan. Daniyêl li ser hemû dîtinî û xewnan jî şehreza bû.

¹⁸Piştî dema diyarkirî ya padîşah temam bû, Aşpenaz ew anîn ba Nebûxadnessar.

¹⁹Padîşah bi wan re peyivî. Di nav hemûyan de kesên wek Daniyêl, Hananya, Mîşaêl û Ezarya tunebûn. Loma ew kirin xizmeta padîşah.

²⁰Padîşah şêwra zanabûn û şehrezayiya wan dikir. Wî didît ku her çar jî, ji hemû sêrbaz û falbazên welêt deh qatî zanatir û zêdetir in.

²¹Heta yeksaliya padîşahiya Koreş, Daniyêl li qesrê ma.