Read Kurmanji Încîl Daniyêl 10 Bible Online

Daniyêl 10 - Kurmanji Încîl bible

Daniyêl 10

¹Di sala sisiyan a padîşahiya Koreşê Padîşahê Parsê de, sirek ji Daniyêlê ku bi navê Bêlteşassar tê zanîn re vebû. Ev tişt rast bû û li ser şerekî mezin bû. Daniyêl di dîtiniya xwe de ev yek fêm kir.

²Di wan rojan de ez Daniyêl, min sê hefteyan şîn kir.

³Heta sê hefte temam nebû, min xwarina baş nexwar, goşt û şerab di qirika min re neçû û min qet rûn li xwe neda.

⁴Di roja bîst û çarê meha pêşî de, gava ez li ber keviya çemê mezin, li ber Dîcleyê bûm,

⁵min serê xwe bilind kir û dît ku va ye, zilamekî cilên kitanî wergirtî û li nava wî kembereke ji zêrê xasê Ûfazê girêdayî disekine.

⁶Bedena wî wek fîrûze bû. Rûyê wî wek brûskê dibiriqî û çavên wî wek xetîreyên bi pêt bûn. Milên wî û lingên wî wek tûnc dibiriqîn, dengvedana dengê wî wek dengvedana dengê komekê bû.

⁷Îcar ez Daniyêl, tenê min dîtinî dît, yên bi min re nedîtin. Lê lerizînekê bi wan girt û ji bo ku xwe veşêrin reviyan.

⁸Bi vî awayî ez tenê mam, min ev dîtiniya mezin dît û taqeta min nema. Rûyê min çilmisî û min nikaribû xwe bida hev.

⁹Min dengvedana gotinên wî bihîstin, ez ketim erdê û di xeweke giran re çûm.

¹⁰Piştre destek li min ket, wî ez rakirim ser dest û çokan.

¹¹Wî ji min re got: «Daniyêlo, zilamê ku gelek jê hatiye hezkirin. Rabe ser lingan û gotinên ku ez ji te re dibêjim fêm bike. Çimkî ez hatim ba te.» Piştî vê gotinê ez bi lerizîn rabûm ser lingan.

¹²Wî ji min re got: «Netirse Daniyêl! Ji roja ku te biryar da fêmdar bibî û xwe li ber Xwedê bitewînî vir ve, duaya te hat bihîstin. Loma ji ber gotinên te ez hatim.

¹³Lê serokê welatê Parsan, bîst û yek rojan li dijî min sekinî. Piştre, ji serokên pêşî Mîxayîl hat alîkariya min. Çimkî ez li wir, li ba Padîşahê Parsê hatibûm girtin.

¹⁴Niha ez hatim ku ji te re bêjim, ka wê di rojên dawî de çi bê serê gelê te. Çimkî ev dîtinî li ser pêşerojê ye.»

¹⁵Gava wî ev ji min re got, min berê xwe bi alî erdê ve kir û ez bêzar mam.

¹⁶Piştre, yekî ku dişibiya kurê mirovan dest da lêvên min. Min devê xwe vekir, ez peyivîm û min ji yê li ber min disekine re got: «Ezbenî, bi vê dîtiniyê re diêşim û nikarim xwe bidim hev.

¹⁷Ez xulamê te, ez çawa dikarim bi te re bipeyivim? Hêza min nema, hilma min çikiya.»

¹⁸Piştre yê ku dişibiya kurê mirovan cardin dest li min da û ez hêzdar kirim.

¹⁹Wî ji min re got: «Netirse, tu ew kes î ku pir jê hatiye hezkirin. Silametî li ser te be. Hêzdar be, belê hêzdar be.» Çaxê ew bi min re peyivî ez hêzdar bûm û min got: «Bipeyive ezbenî, çimkî te ez hêzdar kirim.»

²⁰Wî ji min re got: «Ma tu dizanî ez ji bo çi hatim ba te? Niha ezê bizivirim û herim bi serokê Parsan re şer bikim. Piştî ku ez çûm, wê serokê Yewnanistanê bê.

²¹Lê belê, ezê ya ku di Kitêba Rastîn de hatiye nivîsandin ji te re bêjim. Ji bilî serokê we Mîxayîl, yekî ku li dijî wan alîkariya min bike tuneye.