Read Kurmanji Încîl Daniyêl 12 Bible Online

Daniyêl 12 - Kurmanji Încîl bible

Daniyêl 12

¹ «Di vê navberê de serokê mezin, Mîxayîlê ku gelê te diparêze rabe. Wê tengasiyeke ji roja ku hûn bûne milet heta îro nehatiye dîtin çêbibe. Wê gavê wê gelê te, hemû kesên ku di nivîsê de hatine nivîsîn rizgar bibe.

²Gelek kesên di nav toza erdê de wê hişyar bibin. Wê hinek bigihîjin jiyana herheyî, hinek jî şermezar bibin û ber bi jiyaneke rûreş ve bên şandin.

³Wê yên şehreza wek qûbeya ezmanî, yên ku gelek kesan li rastiyê zivirandine wek stêran her û her bibiriqin.

⁴Lê tu, Daniyêlo, heta dema ku dawî hat, van gotinan veşêre û nivîsê mor bike. Ji bo ku agahiya wan zêde bibe, wê gelek kes lê bikolin.»

⁵Ez Daniyêl, min dît va ye du zilamên din, yek li vî aliyê çem, yek jî li aliyê din ê çem disekine.

⁶Îcar yekî ji zilamê ku li ser avên çêm disekine û cilên kitanî wergirtine re got: «Wê kengê dawiya van tiştên nedîtî bê?»

⁷ Min zilamê ku li ser avên çêm e û cilên kitanî li xwe kirine bihîst. Wî destê xwe yê rastê û destê xwe yê çepê ber bi ezmanan ve bilind kir, bi navê yê ku her û her dijî sond xwar û got: «Wê ji bo demekê, ji bo sê sal û nîvan[20] bidomîne. Gava hêza gelê pîroz bi tevahî qedandin, wê ev tişt hemû biqedin.»

⁸Min bihîst, lê min fêm nekir, loma min got: «Ezbenî, wê kengê dawiya vê yekê bê?»

⁹Wî got: «Daniyêl, tu here, çimkî heta dema dawiyê ev tişt veşartî û morkirî ne.

¹⁰Wê gelek kes xwe pîr û pak bikin û bêqisûr bikin. Wê xerab xerabiya xwe bidomînin û fêm nekin. Lê belê yên şehreza wê fêm bikin.

¹¹«Ji dema ku pêşkêşiya rojane hat rakirin û tiştê dilqelêq ê ku di şûna wê de hat danîn vir ve wê 1.290 roj derbas bibin.

¹²Xwezî bi wî ku li ber xwe dide û digihîje 1.335 rojan.

¹³«Ya Daniyêl, heta roja dawiyê, riya xwe bidomîne. Tê bigihîjî aramiyê û piştî di dawiya rojan de tê hişyar bibî û xelata xwe bistînî.»