Read Kurmanji Încîl Daniyêl 2 Bible Online

Daniyêl 2 - Kurmanji Încîl bible

Daniyêl 2

¹Di dusaliya padîşahiya xwe de Nebûxadnessar xewnek dît, ruhê wî aciz bû û xew lê herimî.

²Padîşah emir kir ku gazî sêrbaz, falbaz, efsûnkar û stêrnasan bikin. Xwest ku xewna wî şîrove bikin. Hemû hatin ba padîşah.

³Padîşah ji wan re got: «Min xewneke xerab dît, ruhê min tengav bû. Dixwazim hûn xewna min şîrova bikin.»

⁴Stêrnasan bi zimanê aramî[2] got: «Ya padîşah, tu her bijî! Tu xewna xwe ji xulamên xwe re bêje ku em şîrove bikin.»

⁵Padîşah ji wan re got: «Biryara min ev e: Heger hûn xewnê û şîrova wê ji min re nebêjin, hûnê bên perçekirin û wê xaniyên we bibin şikêra keviran.

⁶Lê heger xewnê şîrove bikin, hûnê diyarî û xelatên mezin ji min bistînin û bên rûmetkirin. Loma xewnê û şîrova wê ji min re bibêjin.»

⁷Wan cardin bersiv da û got: «Bila padîşah ji van xizmetkarên xwe re xewna xwe bêje, emê jî şîrove bikin.»

⁸Padîşah got: «Ez dizanim, hûn wext dixwazin, çimkî hûn dizanin ku min biryara xwe daye.

⁹Lê hûn şîrova xewna min nekin, ji bo we cezayek heye. Bi hêviya ku rewşa wê biguhere, we di nav xwe de li hev kiriye ku ji min re tiştekî xelet û derew bêjin. Niha xewna min ji min re bêjin. Ez bizanim ku hûn dikarin şîrove bikin an na.»

¹⁰Wan bersiva padîşah da û got: «Kesê ku bikaribe vê daxwaza padîşah bîne cih li dinyayê tuneye. Tu padîşah, tu efendî yan serwerekî ji sêrbaz, ji falbaz an ji stêrnasekî tiştekî wiha nexwestiye.

¹¹Daxwaza padîşah pêk nayê. Ji bilî îlahên ku di nav mirovan de najîn, tu kes tuneye ku vê yekê ji padîşah re eşkere bike.»

¹²Li ser vê yekê padîşah gelek hêrs bû û emir kir ku li Babîlê hemû zilamên şehreza bên kuştin.

¹³Ji ber ku fermana kuştina wan jî derket, li Daniyêl û hevalên wî jî geriyan.

¹⁴Daniyêl rabû bi Aryokê fermandarê parêzvanên padîşah re bi zanayî û aqilmendî peyivî. Çimkî Aryok ketibû ku kuştina şehrezayên Babîlê.

¹⁵Wî ji Aryok re got: «Gelo çima fermana padîşah ewqas hişk e?» Aryok mesele ji Daniyêl re got.

¹⁶Li ser vê yekê Daniyêl ket hûndir û ji padîşah wext xwest ku ew dixwaze şîrova xewna wî bike.

¹⁷Piştre Daniyêl çû mala xwe û ji hevalên xwe Hananya, Mîşaêl û Ezarya re mesele got.

¹⁸Wî xwest ku ew ji bo sira vê xewnê ji Xwedayê Ezmanan alîkariyê bixwazin ku ew û hevalên wî, tevî zilamên şehreza yên Babîlê neyên kuştin.

¹⁹Paşê ev sir bi şev di xewnê de ji Daniyêl re hat eşkerekirin. Li ser vê yekê Daniyêl pesnê Xwedayê Ezmanan da.

²⁰Daniyêl wiha got: «Navê Xwedê her û her pîroz be! Şehrezayî û hêz ya wî ye.

²¹Yê ku dem û demsalan diguherîne ew e. Ew padîşahan derdixe ser text û tîne xwarê. Ew şehrezayiyê dide şehrezayan Û serwextiyê dide zanayan.

²²Tiştên kûr û bi dizî ew vedike, Dizane çi di tariyê de heye. Ronahî herdem pê re ye.

²³Ya Xwedayê bavkalên min, Te şehrezayî û hêz da min. Ya ku me ji te xwest, te ji min re vekir, Ez spasdar im û pesnê te didim. Çimkî, te xewna padîşah ji min re got.»

²⁴Li ser vê yekê Daniyêl dîsa çû ba Aryokê berpirsiyar. Daniyêl ji Aryok re got: «Tu şehrezayên Babîlê nekuje. Min bibe ba padîşah ku ez xewna wî şîrove bikim.»

²⁵Aryok yekser Daniyêl bir ba padîşah û got: «Min di nav sirgûnên Cihûdayê de, zilamek dît ku dikare xewna padîşah şîrove bike.»

²⁶Padîşah ji Daniyêl re got ku navê wî yê din Bêlteşassar e: «Ma tu dikarî xewna min bêjî û şîrova wê bikî?»

²⁷Daniyêl bersiv da padîşah û got: «Sira ku padîşah xwestiye, zilamên şehreza, falbaz û sêrbaz nikarin eşkere bikin.

²⁸Lê belê li ezmanan Xwedayek heye ku siran vedike. Wî ji Nebûxadnessarê Padîşah re gotiye ka wê di rojên pêş de çi bibin. Xewn û dîtiniya ku te di nav nivînan de dîtiye ev e:

²⁹«Tu, ya padîşah, di nav nivînan de tu difikirî ka wê di rojên pêş de çi biqewime. Kesê ku siran eşkere dike li te peyda bû.

³⁰Herçî ez im, ne ku ji mirovên din şehrezatir im, lê ji bo ku tu maneya dîtiniya xwe bizanî û fikrên dilê xwe fêm bikî, ev sir ji min re hat eşkerekirin.

³¹«Ya padîşah, te di dîtiniya xwe de, li pêş xwe peykerekî mezin dît. Ew peykerê li pêş te, gelek mezin û bi têra xwe dibiriqî û dîtina wî tirsdar bû.

³²Serê wî ji zêrê xas, sing û milên wî ji zîv, zik û qorikên wî ji tûnc,

³³lingên wî ji hesin, piyên wî hinek ji hesin, hinek ji gilê bû.

³⁴Gava te bala xwe dayê, kevirek bêyî destlêketinê hat xwarê, li piyê peykerê ji hesin û ji gilê pêkhatî ket û ew perçe perçe kir.

³⁵Hesin, gil, tûnc, zêr û zîv bi hev re perçe bûn. Wek hûrikên kaya bênderê hûr bûn û bayê ew bi xwe re birin. Herçî kevirê li peyker ket, bû çiyayekî mezin û tevahiya erdê tije kir.

³⁶«Xewna ku te dît ev e. Ezê niha xewna te şîrove bikim.

³⁷Padîşahê min, tu padîşahê padîşahan î. Xwedayê Ezmanan hêz, xurtî, rûmet û serwerî dane te.

³⁸Wî mirov, heywanên çolê, çivîkên ezmên kirin destê te. Wî tu li ser hemûyan kirî serwer. Ew serê zêrîn tu yî.

³⁹Wê piştî te, padîşahiyeke ji ya te kêmtir rabe û li tevahiya dinyayê serweriyê bike. Paşê wê padîşahiya sisiyan rabe ku ew jî ya tûnc e.

⁴⁰Wê padîşahiya çaran wek hesin hêzdar be. Çimkî hesin her tiştî perçe dike û dişikêne. Wê wek hesin hemûyan bişikêne û perçe bike.

⁴¹Ji ber ku pî û tilî ji gil û hesin in, wê ew padîşahî perçe bibe. Lê wê hêza hesin jî pê re hebe, çimkî te dît ku hesin û gil tevlihev e.

⁴²Ji ber ku ling û tiliyên wî ji hesin û gilê ne, wê beşekî padîşahiyê hêzdar be, yê din jî qels be.

⁴³Madem te dît gil û hesin tevlihev e, naxwe wê gelan jî tevlihev bin. Çawa ku hesin û gil li hev nakeve, wê ew jî li ba hev nemînin.

⁴⁴«Di rojên wan padîşahan de, wê Xwedayê Ezmanan padîşahiyeke wiha ava bike ku tu caran hilneweşe û qet nekeve destê gelên din. Wê ev padîşahî, hemû padîşahiyan perçe bike, biqedîne û wê herdem li ser piyan bimîne.

⁴⁵Te bixwe dît. Bêyî destlêketinê kevirek ji çiyê ket û hesin, tûnc, gil, zêr û zîv perçe kirin. Li ser vê yekê Xwedayê Mezin jî, ji padîşah re eşkere ku wê ji niha û pê ve çi biqewime. Loma ev xewn jî, şîrova wê jî rast e.»

⁴⁶Nebûxadnessarê Padîşah li pêş Daniyêl deverû çû erdê. Wî emir kir ku qurban û pêşkêşiyên bêhnxweş bidin wî.

⁴⁷Padîşah ji Daniyêl re got: «Madem te ev sir vekir, naxwe Xwedayê we, li ser hemû îlah û padîşahan e û yê ku siran eşkere dike ew e.»

⁴⁸Padîşah Daniyêl danî ser meqama bilind û gelek diyariyên mezin dan wî. Wî ew li ser hemû herêmên Babîlê kir serek û li ser hemû şehrezayên wê kir qeymeqam.

⁴⁹Daniyêl ji padîşah xwest, wî jî Şadrak, Mêşak û Eved-Nego kirin serkarên herêma Babîlê. Lê Daniyêl li qesrê ma.