Read Kurmanji Încîl Daniyêl 5 Bible Online

Daniyêl 5 - Kurmanji Încîl bible

Daniyêl 5

¹Bêlşassarê Padîşah ji hezar zilamên xwe yên giregir re ziyafeteke mezin da û bi wan re şerab vexwar.

²Gava Bêlşassar bi kêf vedixwar, wî emir da ku firaxên zîvîn û zêrîn bînin ku Nebûxadnessarê bavkalê wî ji Perestgeha Orşelîmê anîbûn.

³Wan firaxên zêrîn ên ji Perestgehê, ji Mala Xwedê ya li Orşelîm derxistine anîn. Paşê padîşah û zilamên wî yên mezin, jin û cariyên wan bi van firaxan vexwar.

⁴Wan şerab vexwar û pesnê îlahên zêrîn, zîvîn, tûncîn, darîn, kevirîn û hesinî dan.

⁵Ji nişkave, tiliyên destê mirovekî xuya bûn. Wî li ser dîwarê qesrê nivîsî ku li pêşberî şamdankê bû. Padîşah li destê ku dinivîsî dinihêrî.

⁶Wê gavê rûyê padîşah çilmisî, fikrên wî ew tirsand, movika pişta wî sist bû û çokên wî lerizîn.

⁷Wî bi dengekî bilind gazî kir ku ew falbaz, stêrnas û şehrezayên Babîlê bînin. Wî ji şehrezayên Babîlê re got: «Kî ji we vê nivîsê bixwîne û şîrove bike, wê kincên binevşî lê bê kirin, gerdeniyeke zêrîn bikeve stû. Wê ew bibe serwerê sisiyan ê welat.»

⁸Hemû şehrezayên padîşah ketin hûndir lê wan nikaribû nivîsê bixwînin û şîrove bikin.

⁹Li ser vê yekê tirsa Bêlşassarê Padîşah zêdetir bû û rûyê wî bêtir çilmisî. Şehrezayên wî şaş û metel man.

¹⁰Şahbanûya ku dengê padîşah û zilamên mezin bihîst hat cihê ziyafetê û got: «Ya padîşah, tu her û her bijî! Bila ya ku di hişê te re derbas dibe te netirsîne û rûyê te neçilmise.

¹¹Li welatê te zilamek heye ku ruhê îlahên pîroz pê re ye. Di dema kalikê te Nebûxadnessar de bi feraset, pêşbînî û şehrezabûna xwe ya îlahî dihat naskirin. Kalikê te Nebûxadnessarê Padîşah ew wek serokê sêrbaz, falbaz û stêrnasan tayîn kiribû.

¹²Pê re ruhekî berz, zanabûn, feraset, ruhê şîrovekirina xewnan, zanabûna mamikan û vekirina girêkan heye. Navê wî Daniyêl e. Lê Padîşah navê wî kiribû Bêlteşassar. Bila niha gazî wî bikin ku nivîsê bixwîne û şîrove bike.»

¹³Daniyêl anîn ba padîşah û wî ji Daniyêl re got: «Daniyêlê ku kalikê min ê padîşah ji Cihûdayê di nav sirgûniyan de anîbû tu yî?

¹⁴Ji bo te dibêjin ku ruhê îlahan bi te re heye, ronahî, fêmdarî û şehrezabûneke zêde li ba lê ye.

¹⁵Falbaz û zilamên şehreza anîn ba min ku vê nivîsê bixwînin û şîrove bikin lê wan nikaribû.

¹⁶Min bihîst ku tu dikarî şîrove bikî û siran vekî. Niha heger tu vê nivîsê bixwînî û şîrove bikî, wê kincên binevşî li te bên kirin û gerdeniya zêrîn bixin stûyê te. Tê li welêt bibî serwerê sisiyan.»

¹⁷Daniyêl bersiva padîşah da û got: «Bila diyariyên te ji te re bin, xelatên xwe jî bide hinekên din. Lê ezê dîsa jî, nivîsê bixwînim û ji te re şîrove bikim.

¹⁸«Ya padîşah, Xwedayê Herî Berz padîşahî, mezinahî, berzî û rewnaqî da bavkalê te Nebûxadnessar.

¹⁹Ji ber mezinahiya ku da wî hemû gel, milet û mirovên ku ji hemû zimanan jê tirsiyan û li ber wî lerizîn. Wî bixwesta dikuşt, bixwesta sax dihişt. Bixwesta bilind dikir, bixwesta nizim dikir.

²⁰Lê gava quretî kir û ji rê derket, ji ser textê padîşah hat avêtin û rûmeta wî jê hat standin.

²¹Ji nav mirovan hat avêtin û dilê wî bû wek dilê heywanan. Bi kerên çolê re jiya, wek dewaran giya xwar û bedena wî li ber xunava ezmanan şil bû. Heta ku hîn bû serweriya Xwedayê Herî Berz di ser padîşahiya mirovan re ye û dilê wî ji kê re bixwaze padîşahiyê dide, wisa ma.

²²«Ya Bêlşassar, tu kurê wî bavkalî yî. Te ev tişt zanibû lê te dîsa jî nefsa xwe neşikand.

²³Te li hember Rebê Ezmanan xwe mezin kir. Firaxên Perestgeha wî anîn ba te, te û giregirên te, jin û cariyên te, we bi wan şerab vexwar. We pesnê îlahên zîvîn, zêrîn, tûncîn, kevirîn, darîn û ji hesin da û we rûmet neda Xwedê. Xwedayê ku hilma te di destê wî de ye û bi hemû riyên te dizane.

²⁴Loma Xwedê destê ku ev nivîs nivîsand şand.

²⁵«Nivîsa ku hat nivîsîn ev e: MENÊ, MENÊ, TEQEL û PARSÎN.

²⁶«Wateya van gotinan ev e: MENÊ[5]; Xwedê rojên padîşahiya te hesibandin û dawî lê anî.

²⁷TEQEL[6]; tu di mêzînê de hatî kişandin û kêm derketî.

²⁸PERES[7]; padîşahiya te di nav Med û Parsan de hat parîkirin.»

²⁹Paşê Bêlşassar ferman da û kincên binevşî li Daniyêl kirin û gerdeniya zêrîn xistin stûyê wî. Wî li ser padîşahiyê kirin kesê sisiyan.

³⁰Bêlşassarê Padîşahê Babîlê wê şevê hat kuştin.

³¹Daryûsê Medî padîşahî bi dest xist. Wî çaxî ew şêst û du salî bû.