Read Kurmanji Încîl Daniyêl 7 Bible Online

Daniyêl 7 - Kurmanji Încîl bible

Daniyêl 7

¹Di yeksaliya padîşahiya Bêlşassarê Padîşahê Babîlê de, gava di nav nivînên xwe de ye, Daniyêl xewnek dît. Piştre xewna xwe nivîsî.

²Daniyêl got: «Min bi şev di xewna xwe de dît ku ji çar aliyên ezmanan ve ba li deryaya mezin dixe.

³Îcar ji deryayê çar cinawirên mezin derketin ku yek ne mîna yê din bû.

⁴«Cinawirê pêşî wekî şêr bû û mîna eyloyan bi bask bû. Min dêhna xwe dayê ku baskên wî hatin jêkirin, ji erdê rakirin û wek mirovan li ser piyan sekinî û hişê mirovan jê re hat dayîn.

⁵«Cinawirê din wek hirçê bû. Li ser kêlekekê xwe sekinîbû. Di nav diranên wî de sê parsû hebûn. Jê re gotin: ‹Rabe, heta ku tu dikarî goşt bixwe.›

⁶«Piştre min cinawirê din dît ku wek pilingê bû. Li ser pişta wî çar baskên teyran hebûn. Çar seriyên wî hebûn û serwerî dabûn wî.

⁷«Wê şevê min cinawirê çaran dît ku bi saw, tirsdar û gelek hêzdar bû. Diranên wî yên mezin ên ji hesin hebûn. Dixwar û perçe dikir, yên li paş diman di bin lingê xwe de diperçiqand. Ne wek cinawirên din bû. Deh strûyên wî hebûn.

⁸«Min dît ku va ye strûyekî din jî ji nav wan strûyan kok da. Ji strûyên pêşî sê heb ketin. Çavên vî strûyî hebûn ku wek yên mirovan bûn. Devê wî hebû ku bi quretî dipeyivî.

⁹ «Dêhna min hê lê bû, Text hatin danîn. Yê Herheyî li cihê xwe rûnişt. Cilên wî wek berfê spî, Porê serê wî jî wek livayê spî bû. Textê wî pêt bi pêt bû, Tekelên bin wek sotikên agir bûn.

¹⁰ Li pêş wî çemekî ji agir diherikî. Bi hezaran hezar, Jê re xizmet dikirin. Bi deh hezaran deh hezar, Li pêş wî disekinîn. Dadgeh danîn, Kitêb vebûn.

¹¹«Gava min gotinên qure yên strû bihîstin, min dît ku cinawir li ber çavê min hat kuştin. Bedena wî avêtin agirê sincirî û ew tune bû.

¹²Herçî cinawirên din bûn, serwerî ji wan hatibû standin, lê emrê wan ji bo demekî diyarkirî hatibû dirêjkirin.

¹³«Îcar min di xewna wê şevê de dît, yekî ku dişibiya kurê mirov bi ewrên ezmanan re tê. Ew hat heta ber Yê Herheyî û ew anîn ba wî.

¹⁴Serwerî, berzî û padîşahî dan wî. Hemû gel, milet û kesên ji her zimanan jê re xulamî kir. Serweriya wî serweriyeke herheyî ye û padîşahiya wî wê tu caran hilneweşe.»

¹⁵«Ez Daniyêl, ruhê min bi xemgîniyê lerizî û dîtiniyên ku min dîtine ez tirsandim.

¹⁶Ez nêzîkî yekî bûm û min xwest wateya rastîn a tevahiya van tiştan ji min re bêje. «Wî jî ji min re şîrove kir û got:

¹⁷‹Ev her çar cinawir, çar padîşah in ku wê li rûyê erdê xuya bibin.

¹⁸Lê wê pîrozên Xwedayê Herî Berz padîşahiyê bistînin û her û her di destê xwe de bigirin. Erê, her û her.›

¹⁹«Piştre min xwest ku ez li ser cinawirê çaran bizanibim ku ew ne wek hemûyan e, gelek tirsdar e, diranên wî ji hesin in, neynûkên wî ji tûnc in, dixwe û perçe dike û yê mayî di bin lingê xwe de diperçiqîne.

²⁰Paşê min xwest ez li ser deh strûyên serê wî û strûyê din ê ku piştre derket bizanibim. Sê strû ji ber vî strûyî ketibûn û dîtina wî ji yên din mezintir bû. Çavên wî hebûn û devê wî tiştên qure digotin.

²¹Min dît ku ew strû bi pîrozan re şer dike û zora wan dibe.

²²Heta ku Yê Herheyî û Herî Berz hat û biryara xwe ji bo pîrozan da, vê yekê berdewam kir. Êdî ew dem bû ku kesên pîroz padîşahiyê bistînin.

²³«Wî ji min re got: ‹Cinawirê çaran, padîşahiya çaran e. Wê li ser rûyê erdê xuya bibe. Wê ne wekî padîşahiyên din be. Wê tevahiya dinyayê daqurtîne, bicû û perçe bike.

²⁴Herçî deh strû ne, tên wateya deh padîşahên ku wê ji vê padîşahiyê derkevin. Piştî wan wê padîşahekî din derkeve û wê ne wekî yên din be û wê sê padîşahan ji ser textên wan bîne xwarê.

²⁵Wê li dijî Yê Herî Berz gotinên xerab bike û zextê li pîrozên wî bike. Wê bixwaze demên diyarkirî û Şerîetê biguherîne. Wê pîrozan ji bo sê sal û nîvan[8] teslîmî destê wî bikin.

²⁶«‹Paşê wê dadgeh bê danîn, wê serweriyê jê bistînin û wê bi tevahî bê tunekirin.

²⁷Wê padîşahî û serwerî, padîşahiyên bin ezmanan yên mezin bidin pîrozê gelê Yê Berz û padîşahiya wî her û her be. Wê hemû serwer jê re xulamiyê bikin û serî li ber wî deynin.›

²⁸«Dawiya kar heta vê derê ye. Herçî ez Daniyêl im, fikrên min ez gelekî tirsandim û rûyê min çilmisî. Lê min ev tişt di dilê xwe de veşart.»