Read Kurmanji Încîl Daniyêl 8 Bible Online

Daniyêl 8 - Kurmanji Încîl bible

Daniyêl 8

¹Di sê saliya padîşahiya Bêlşassarê padîşah de, ez Daniyêl, piştî dîtiniya berê, min dîtiniyeke din dît.

²Min di dîtiniyê de, xwe li Keleha Sûsa ya li herêma Elamê, li kêleka Çemê Ûlayê dît.

³Min dêhna xwe dayê ku beranek li kêleka çêm sekiniye. Du strûyên wî yên dirêj hene. Ji herdu strûyan, yê ku paşê çêbûbû ji yê berê dirêjtir bû.

⁴Min dît ku beran bi strûyê xwe li aliyê rojava, li aliyê bakur û li aliyê başûr dixe. Tu heywanî pê nikaribû û kes ji destê wî rizgar nedibû. Her ku diçû beran hêzdartir dibû.

⁵Gava ez li ser vê yekê difikirîm ji nişkave, ji aliyê rojava, nêriyek hat. Strûyekî berbiçav di nav herdu çavên wî de hebû û lingê wî li erdê nediketin. Ber bi rûyê erdê ve gelekî dilezand çawa ku lingên wî li erdê nediketin.

⁶Bi hêz û bi hêrsa xwe, ber bi beranê du strû ve çû ku li ber çem disekinî.

⁷Min dît ku ew nêzîkî berên bû, li dijî wî hêç bû, li berên xist û herdu strûyên wî şikandin. Wî beran li erdê xistin, perçiqand û tu hêzeke beran tunebû ku li dijî wî rabe. Êdî tu kesê ku beran ji destê wî rizgar bike nemabû.

⁸Nêrî gelekî xurt bû, lê belê di vê dema xurtbûnê de strûyê wî şikest. Îcar di şûna wî strûyî de, li çar aliyên dinyayê, çar strûyên berbiçav derketin.

⁹Îcar ji strûyekî ji wan, strûyekî biçûk derket. Ber bi başûr, rojhilat û Welatê Xweş[9] ve dihat û her ku diçû mezin dibû.

¹⁰Ewqas mezin bû ku gihîşt artêşa ezmanan. Wî ji vê artêşê hinek û hin stêr anîn xwarê û ew perçiqandin.

¹¹Wî xwe bi qasî Pêşengê Artêşa Ezmanan[10] mezin kir. Pêşkêşiya rojane ya ji bo Xwedê hat rakirin. Pîrozgeh jî hat hilweşandin.

¹²Ji ber serhildanê li dijî pêşkêşiya rojane derketin. Rastî ket bin lingan. Strûyê biçûk her çi xwest kir û gihîşt armanca xwe.

¹³Piştre min dengê pîrozekî bihîst. Dema ku ew dipeyivî pîrozekî din got: «Ev dîtiniya li ser pêşkêşiya rojane, serhildana xerakirinê û binpêkirina dera pîroz û artêşan, wê heta kengê bidome?»

¹⁴Dengê pîroz ji min re got: «Ev rewş wê 2 300 şev û rojan bidome, paşê wê Pîrozgeh ji nû ve bê sererastkirin.»

¹⁵Ez Daniyêl, çaxê min ev dîtinî dît, min xwest fêm bikim. Min dît ku yekî di şiklê mirovan de li pêş min sekiniye.

¹⁶Min ji nav Çemê Ûlayê dengê zilamekî bihîst. Wî gazî dikir û digot: «Ya Cebraîl, dîtiniyê jê re bêje.»

¹⁷Cebraîl nêzîkî min bû. Ez ji tirsan ketim erdê. Wî ji min re got: «Ya kurê mirovan, bizanibe ku ev dîtinî ji bo zemanê dawiyê ye.»

¹⁸Gava ew bi min re dipeyivî, ez deverû çûbûm erdê û ne li ser hişê xwe bûm. Wî destê xwe dirêjî min kir û ez rakirim ser piyan.

¹⁹Wî got: «Piştî ku xezeba Xwedê danî, tiştê ku bibe ezê ji te re bêjim. Çimkî dîtinî li ser zemanê dawiyê yê ku hatiye kifşkirin bi xwe ye.

²⁰Ew beranê du strû ê ku te dît, padîşahên Med û Parsan e.

²¹Ew nêrî Padîşahê Yewnanan e. Strûyê mezin ê di nav herdu çavên wî de, padîşahê pêşî ye.

²²Çar strûyên ku di şûna strûyê şikestî de dertên, çar padîşahên milet in ku wê rabin. Lê wê bi qasî padîşahê pêşî hêzdar nebin.

²³«Beriya ku dawiya van padîşahiyan bê, wê xerabî pir zêde bibin û wê padîşahekî wisa derkeve ku di xapandinê de hoste be.

²⁴Wê gelek hêzdar be, lê wê ev hêz ne jê be. Wê bi awayekî nedîtî wêran bike û wê bigihîje armanca xwe. Tişta ku bixwaze wê bike. Wê kesên hêzdar û Gelê Pîroz tune bike.

²⁵Wê bi fen û fûtan bi ser bikeve. Wê gelek kesên di ewlehiyê de, tune bike. Wê li dijî Serokê Serokan[11] rabe. Lê wê ji nişkave bişikê.

²⁶«Ev dîtinî rast e ku êvarê û serê sibê ji te re hat gotin. Lê tu eşkere neke. Çimkî li ser rojên dûr in.»

²⁷Ez Daniyêl ji halê xwe ketim û bi rojan nexweş mam. Paşê ez baş bûm û min karên padîşah berdewam kirin. Ji ber vê dîtiniyê ez şaş û metel mabûm. Lê min fêm nedikir.