Read Kurmanji Încîl Daniyêl 9 Bible Online

Daniyêl 9 - Kurmanji Încîl bible

Daniyêl 9

¹Kurê Ahaşwêroşê Medî Daryûs, di yeksaliya padîşahiya xwe de, li ser welatê Babîlê hatibû kifşkirin.

²Di yeksaliya padîşahiya wî de, ez Daniyêl min ji Nivîsên Pîroz fêm kir ku li gorî peyva Xudan ku ji Yêremyayê Pêxember re hatibû, wê wêranbûna Orşelîmê heftê salan berdewam bike.

³Loma min berê xwe bi alî Reb Xwedê ve kir, bi dua, bi rojî û lavakirinê, min çûx li xwe kir û ez di nav xweliyê de rûniştim.

⁴Min ji Xwedayê xwe Xudan re dua kir, ez li xwe mikur hatim û min got: «Ya Reb, Xwedayê mezin û bi heybetê ku bi hezkirên xwe, bi kesên ku emrê wî dikin re peymana çêdike û girêdayî dimîne!

⁵Em ji emrên te, rê û rêbazên te qetiyan, me guneh kir, me sûc kir, me xerabî kir û me serî hilda.

⁶Me guh neda pêxemberên ku li ser navê te bi padîşahên me, serokên me, bav û kalên me û bi tevahiya gelê welêt re peyivîn.

⁷«Tu dadperwer î, ya Reb! Ji ber ku em ne dilsoz bûn te em avêtin welatên dûr û nêzîk. Em ew Cihûyên ku li wan deran dijîn, rûniştiyên Orşelîmê, hemû Îsraîlî îro em di nav şermê de ne.

⁸Ya Xudan, me li dijî te guneh kir. Loma jî em, padîşahên me, serokên me, bav û kalên me şermezar in.

⁹Tevî ku em li dijî te rabûn, Tu, Xwedayê me Reb, dilrehm û bexişkar î.

¹⁰Me guhdariya gotina Xwedayê xwe Xudan nekir. Me Şerîeta ku bi riya xulamên xwe yên pêxember da ber me, pêk neanî.

¹¹Tevahiya gelê Îsraîlê Şerîeta te binpê kir, pişta xwe da te û guhdariya te nekir. «Loma jî nifira hatiye kirin û sonda hatiye xwarin pêk hat, ya ku di Şerîeta xulamê Xwedê Mûsa de hatiye nivîsandin bi ser me de hat. Çimkî me li ber te guneh kir.

¹²Te xerabiya mezin bi ser me de anî, gotinên ku te ji bo me û ji bo serokên me got, pêk hatin. Tişta ku hat serê Orşelîmê, li ser tevahiya rûyê erdê nehatiye serê tu bajarî.

¹³Bi awayê ku di Şerîeta Mûsa de nivîsandiye, ev hemû xerabî hatin serê me. Lê dîsa jî em ji xerabiyên xwe nezivirîn. Ya Xudan, me kerema te nexwest û me guh neda rastiya te.

¹⁴Îcar Xudan dev ji xerabiya ku bi ser me de anî berneda. Çimkî her tiştê ku Xwedayê me Xudan dike rast e. Lê me guhdariya wî nekir.

¹⁵«Xwedayê me Reb, te bi destê xwe yê hêzdar gel ji welatê Misrê derxist û heta îro nav û dengê xwe deranî. Lê me guneh kir, xerabî kir.

¹⁶Ya Reb, ez ji bo hemû karên te yên dadperwer ji te lava dikim tu hêrsa xwe ji ser bajarê xwe Orşelîmê, ji ser Çiyayê xwe yê pîroz rakî. Çimkî ji ber gunehên me û xerabiyên bav û kalên me, Orşelîm û gelê te, li pêş hemûyên ku li der û dora me ne şermezar bûn.

¹⁷«Xwedayê min, tu dua û lavakirina xulamê xwe bibihîze. Ya Reb, ji bo xatirê navê xwe, berê xwe bide Pîrozgeha wêran.

¹⁸Ya Xwedayê min, guh bide û bibihîze, çavên xwe veke û bajarê xwe yê wêran bibîne. Em ne ji ber rastbûna xwe, lê ji ber dilovaniya te ya mezin lavayî te dikin.

¹⁹Ya Reb bibihîze! Ya Xudan bibexişîne. Ya Reb, baş guhdar be û bike. Ya Xwedayê min, ji bo xatirê navê xwe bi derengî nexe. Çimkî bajar jî, gel jî yê te ye.»

²⁰Gava ez dipeyivîm û min dua dikir, li gunehên xwe û gunehên Îsraîla gelê xwe mikur dihatim, ji bo Çiyayê Pîroz ê Xwedayê xwe li pêş Xwedayê xwe Xudan min lava dikir.

²¹Gava min dua dikir, kesê ku min berê di dîtiniya xwe de dîtibû, Cebraîl, di dema pêşkêşiya ber êvarê de bi lez firiya[12] û hat ba min.

²²Ew bi min re peyivî û got: «Daniyêlo, ji bo ku ez şehrezayî û fêmdariyê bidim te hatim.

²³Te çawa ku ji Xwedê re lava kir, duaya te hat bihîstin û ez hatim ji te re bêjim. Çimkî tu gelekî hatî hezkirin. Loma ji peyam û dîtiniyê fêm bike.

²⁴«Ji bo ku neheqî bê rakirin, dawî li guneh bê, sûc bên bexişandin, rastiya herheyî bê avakirin, dîtinî û pêxemberî bê morkirin û yê ku Herî Pîroz bê rûnkirin[13], ji bo gelê te û bajarê te yê pîroz, heftê car heft dem[14] hatiye diyarkirin.

²⁵«Îcar bizanibe û fêm bike. Ji dema emrê jinûveavakirina Orşelîmê derketiye, heta ku serwerê kifşkirî bê, wê heft car heft dem derbas bibin. Wê di nav şêst û du heft deman de, Orşelîm ji nû ve bi kuçe û xendekên xwe ve bê avakirin. Lê wê ev di dema tengasiyê de çêbe.

²⁶Di dawiya şêst û du heft deman de, kesê kifşkirî wê bê kuştin û wê piştgirên wî tunebin. Gelê serokê nûhatî, wê bajêr û Pîrozgehê wêran bike. Wê dawiyeke wekî tofanê pêk were û wê şer jî heta dawiyê bidome. Biryara wêrankirinê jî hatiye dayîn.

²⁷Wê bi gelek kesan re, ji bo heft deman peymaneke saxlem çêke. Lê piştî ku nîvê heft demê derbas bû, wê qurban û pêşkêşiyê rake. Heta biryara wêrankirinê, wê serokê wêranker tiştên kirêt deyne ser beşê jorîn ê Perestgehê.»