Read Kurmanji Încîl Hoşêya 1 Bible Online

Hoşêya 1 - Kurmanji Încîl bible

Hoşêya 1

¹Peyva Xudan a ku di rojên Ûzziya, Yotam, Ahaz û Hîzqiya, padîşahên Cihûdayê û rojên Yarovamê kurê Yehoaş, Padîşahê Îsraîlê de ji Hoşêyayê kurê Beêrî re hatiye, ev e.

²Peyva Xudan a pêşî ku bi riya Hoşêya hat ev e: Xudan ji Hoşêya re got: «Here ji zinakaran jinekê ji xwe re bîne ku jê zarokên zinayê çêbin. Ji ber ku gelê welêt dev ji min berda, zinayê dike.»

³Bi vî awayî Hoşêya çû û bi Gomera keça Dîvlayîm re zewicî. Jin bi zaro ma û kurek jê re anî.

⁴Xudan jê re got: «Navê kurik deyne Yîzreyêl[1]. Çimkî di demeke nêzîk de ezê tola xwîna ku li Yîzreyêlê hatiye rijandin, ji Mala Yêhû bistînim û dawiya padîşahiya Mala Îsraîlê bînim.

⁵Wê rojê ezê li Deşta Yîzreyêlê kevanê Îsraîlê bişikênim.»

⁶Jin careke din bi zaro ma û keçek anî. Xudan ji Hoşêya re got: «Navê wê bike Lo-Ruhama[2]. Ji ber ku ezê êdî li ber Mala Îsraîlê nekevim, ezê nebexişînim.

⁷Lê ezê li ber Mala Cihûda bikevim. Ezê wan bi Xwedayê wan Xudan rizgar bikim, ne ku bi kevan, şûr, şer, hesp û siwaran.»

⁸Gava jinik Lo-Ruhamayê ji şîr vekir, dîsa bi zaro ma û kurek anî.

⁹Xudan ji Hoşêya re got: «Navê wî deyne Lo-Ammî[3]. Ji ber ku hûn ne gelê min in, ez jî ne Xwedayê we me[4].

¹⁰«Lê dîsa jî hejmara Îsraîliyan wê wekî sêlaka deryayê be. Wê neyê hejmartin û pîvan. Li cihê ji wan re dihate gotin: ‹Hûn ne gelê min in› wê ji wan re bê gotin: ‹Hûn zarokên Xwedayê Jîndar in.›

¹¹Gelên Cihûda û Îsraîlê wê ji nû ve bibe yek. Wê ji xwe serekek kifş bikin û wê ji welatê xwe derkevin. Ji ber ku wê roja Yîzreyêlê bibe rojeke mezin.