Read Kurmanji Încîl Hoşêya 10 Bible Online

Hoşêya 10 - Kurmanji Încîl bible

Hoşêya 10

¹Îsraîl mêweke berdar e Ku fêkiyê xwe dide. Li gorî zêdebûna fêkî, Gorîgehên xwe jî zêde dikirin. Li gorî zêdebûna xweşiya welatê xwe, Kêlên kevirîn jî xweşik dikirin.

²Dilê wan hîlekar e, Divê ew niha cezayê sûcên xwe bikişînin. Xudan wê gorîgehên wan xera bike, Kêlên wan tune bike.

³Wê gavê wê bêjin: «Padîşahê me tuneye, Çimkî em ji Xudan netirsiyan! Heger padîşahê me hebûya jî, Gelo wê çi ji me re bikira?»

⁴Gotinên vala dikin, Peymanan girê didin, Sondên derewîn dixwin. Loma jî dozên wan Wê mîna giyayê bi jehrî li zeviyên ajotî şîn bibin.

⁵Ji ber pûtê golikî yê li Bêtawenê. Xelkê Sameryayê wê bitirse. Wê gelê wî li pey wî şînê bike, Wê kahinên pûtperest ên wî şîn bikin. Çimkî rûmeta wî çûye.

⁶Herwiha wê ew pût, Ji padîşahê mezin re wek diyarî, Ji Aşûrê re bê şandin. Wê bibe şerma Efrayîm, Îsraîl ji ber şîreta xwe, wê şerm bike.

⁷Samerya, tevî padîşahê xwe Wê wek qirşika li ser avê here û winda bibe.

⁸Wê bilindciyên perizînê yên Awenê[18] xera bibin, Ew bû gunehê Îsraîlê. Wê li ser gorîgehên wan strî û dirî şîn bibin. Wê ji çiyan re bêjin: «Me veşêrin!» Wê ji giran re bêjin: «Bi ser me de bikevin!»

⁹«Ya Îsraîl ji rojên Gîvayê ve te guneh dikirin; Hûn hê jî wisa dikin. Şerê li Gîvayê ya li dijî xeraban, Ma nakeve ser wan?

¹⁰Gava ez bixwazim, ezê wan bînim rê. Ji ber ku wan xwe bi cotê gunehan ve girê da, Wê netewe li dijî wan li hev bicivin.

¹¹Efrayîm wek çêleka perwerdekirî ye, Ew ji gêrekirinê hez dike. Ezê nîr bixim stûyê wê yê bedew, Ezê bi Efrayîm bidim cotkirin, Bila Cihûda jî cot bike. Wê ziriyeta Aqûb ji bo xwe tevrik bike.

¹²Hûn ji bo xwe rastdariyê biçînin, Ji bo xwe berê dilovaniyê hilînin. Erdê xwe yê beyar cot bikin. Çimkî dema lêgerîna Xudan e, Wê bê û rastiyê li ser we bibarîne.

¹³We xerabî cot kir, We neheqî dirût, We berê derewan xwar. We bawerî bi riya xwe Û zêdebûna mêrxasên xwe anî.

¹⁴Loma wê di nav gelê we de, xirecira şer derkeve, Wê tevahiya bircên te bên xerakirin. Çawa ku Şalman di roja şer de Bêtarbêlê xera kir, Dayikan tevî zarokan li erdê xistin û perçe kirin.

¹⁵Ya Bêt-Êl, ji ber xerabiya te ya mezin, Wê ev tişt bên serê te jî. Serê sibê Padîşahê Îsraîlê wê esse helak bibe.