Read Kurmanji Încîl Hoşêya 11 Bible Online

Hoşêya 11 - Kurmanji Încîl bible

Hoşêya 11

¹«Hê gava Îsraîl zarok bû min jê hez kir, Min ji Misrê gazî kurê xwe kir.

²Her gava pêxemberan gazî Îsraîl dikir, Îsraîl xwe ji wan dûr dixist. Qurban ji Baalan re serjê kirin, Ji pûtan re bixûr pêxistin.

³Lê min Efrayîm hînî meşê kir. Min ew dan ber singê xwe, Lê fêm nekirin ku min şifa da wan.

⁴Min ew bi benên qenciya mirovahiyê, Bi girêdanên hezkirinê hilkişandin. Min nîrê wan rakirin, Min xwe tewand û xwarin da wan.

⁵«Wê venegerin welatê Misrê. Aşûr wê li ser wan bibe padîşah. Çimkî wan nexwest li min vegerin.

⁶Wê li ser bajarên wan şûr hilfirin. Wê zirzeyên dergehên wan biqedîne, Ji ber fen û fûtên wan wê wan tune bike.

⁷Gelê min bi biryar e ku ji min dûr bikeve, Heger ew gazî min, gazî Yê Berz bikin jî, Ezê bi tu awayî wan bilind nekim.

⁸«Ya Efrayîm, ezê çawa te bidim destan? Ya Îsraîl, ezê te çawa teslîm bikim? Ezê çawa te bikim wekî Admayê? Ezê çawa wekî Sevoyîmê bi te re tevbigerim? Dilê min peritî, Dilovaniya min dikele.

⁹Ezê hêrsa xwe ya dijwar bi ser we de neşînim, Ezê ji nû ve Efrayîm helak nekim. Çimkî ez Xwedê me, ne mirov im. Ez di nav we de Yê Pîroz im. Êdî ezê bi xezebê neyêm.

¹⁰Wê li pey Xudan bimeşin, Xudanê ku mîna şêr dike gurmînî. Gava ew bike gurmînî jî, Wê zarokên wî ji rojava bi lerz vegerin.

¹¹Wê ji Misrê wek çivîkan, Ji diyarê Aşûrê wek kevokan bilerizin û werin. Ezê wan li malên wan bidim rûniştandin.» Ev e gotina Xudan.

¹²Efrayîm dora min bi derewan, Mala Îsraîl bi hîle pêçaye. Cihûda hê jî serhildêr e, Li dijî Yê Pîroz e.