Read Kurmanji Încîl Hoşêya 12 Bible Online

Hoşêya 12 - Kurmanji Încîl bible

Hoşêya 12

¹Efrayîm şivantiya bayê dike, Tevahiya rojê ketiye pey bayê rojhilat. Derew û zordariyê zêdetir dike. Bi Aşûrê re peyman girê dide, Rûnê zeytê dişîne Misrê.

²Doza Xudan bi Cihûda re heye. Wê li gorî riya wî, ziriyeta Aqûb ceza bike, Wê cezayê kirinên wî bide.

³ Di zikê diya xwe de, Aqûb bi pehniya birayê xwe girt. Di mêrantiya xwe de, Bi Xwedê re gulaşê girt.

⁴Bi milyaket re gulaşê girt û bi ser ket, Giriya û jê lava kir ku wî pîroz bike. Wî Xwedê li Bêt-Êlê dît, Ew li wir bi me re axivî.

⁵Xwedayê Karîndar Xudan, Navê wî Xudan e!

⁶Tu jî, vegere Xwedayê xwe. Dilovanî û edaletê ji xwe re bigire, Her dem li benda Xwedayê xwe be.

⁷Wekî tacirê ku di destên wî de Mêzîna derewîn heye, Efrayîm jî ji xapandinê hez dike.

⁸Ew bi xwe dibêje: «Ez gelek dewlemend bûm. Ez bûm xweyî mal, Wê di tevahiya kedên min de Neheqî û gunehê min nebînin.»

⁹«Lê min, Xwedayê te Xudan Tu ji welatê Misrê deranî. Her wekî rojên cejnê, Ezê dîsa te di konan de bidim rûniştandin.

¹⁰Min ji pêxemberan re jî digot. Min dîtiniyan zêde kirin, Min bi riya pêxemberan meselok gotin.»

¹¹Li Gîladê xerabî heye. Bi rastî ew qelp in, Li Gîlgalê gayan qurban dikin. Loma jî gorîgehên wan Wekî şikêrên kevirên zeviyên ajotî ne.

¹²Aqûb reviya çû diyarê Aramê, Îsraîl ji bo jinekê bû xulam, Ji bo jinekê şivantî kir.

¹³Xudan bi riya pêxemberekî, Îsraîl ji Misrê derxist, Bi riya pêxemberekî jî ew parast.

¹⁴Efrayîm Xwedê zêde hêrs kir. Wê Reb heyfa xwîna ku rijandine bistîne, Tinazên wan li wan vegerîne.